E faagalo gata Rev Oka Fauolo
Ua silafia uma lava e le mamalu o Samoa le afioga i le Taitaifono o le Fono a Ekalesia Soofaatasi a Samoa, le Susuga i le toeaina, Rev. Elder Oka Fauolo.
O se tama ua tele tausaga o lana auaunaga faafaifeau, faafaiaoga ma faataitai o le atunuu.
Ua silafia uma foi le matua o le soifua i le tama, ae o tala o le amia ai e le Atua o lea auauna, e faigata lava ona talia e le toatele ona o se tasi lenei o taitai o Samoa ua leva tele ona lotolotoi ai i soo se vaega o le atinae o Samoa.
O le vaveao o le Aso Faraile o le vaiaso na tea nei na “maliu filemu” ai le Susuga i le Faifeau Toeaina i lona aiga i Vaoala.
“Ua leva tele ona finau le tama ia Oka ma lona faatafa gasegase,” o se saunoaga lea a le Faafeagaiga o le Ekalesia Faapotopotoga Kerisiano Samoa i le afioaga o Vaoala, le susuga Rev. Ioane Petaia.
“O le vaitaimi lava o le Kirisimasi na faataotolia ai le tama ia Oka i le Maota Gasegase ma na tauivi mai ai lava ma lona ma‘i.”
O le aulotu i Vaoala sa lolotu ai le Susuga ia Oka Fauolo ma le faletua ia Soo, ma na ta‘ua e le susuga ia Rev. Petaia, o se faatama e pele i agaga o lana aulotu ma e malosi lana lagolago i le faatinoga o galuega faafaifeau i totonu o le Ekalesia i Vaoala.
E pei lava ona silafia e le toatele, o le susuga i le Toeaina ua tele tausaga o galue o le pule aoga o le Kolisi Faafaifeau i Malua.
O se tama ua tele foi tausaga o agai i ai le atunuu mo fesoasoani i le itu tau aoaoga i lona tomai i galuega suesue aemaise lava i le talafaasolopito o le lotu Kerisiano o le lalolagi.
E tele foi galuega a le Malo na faamoemoe i le tomai o lenei tama ma lana taitaiga. O se tama e talia soo se tasi e tapa lana fesoasoani i nei suesuega e pei foi ona vaaia ai i le tele o taimi i luga o le televise, luga o le leitio faapea ai ana folasaga i luga o nusipepa.
E lei iai se polokalame aloaia o toe sauniga o lenei tama iloga o le atunuu ae na ta‘ua e le Failautusi o le EFKS le susuga Rev. Dr Iutisone Salevao, o loo tālia foi se faamatalaga aloaia a le Ekalesia i le maliu ai o se tasi o ana auauna aupito matua aemaise o se tasi ua tele tausaga o taitai i le Ekalesia Faapotopotoga Kerisano Samoa.
Ua iai foi le talitonuga o le a tālia foi se polokalame faapitoa i le toe taliu mai ai o le faigamalaga a le Malo lea e taitaia e le Alii Palemia i Amerika Samoa mo le Fu‘a a Tutuila ma Manu‘a lea e faamanatuina i le aso a taeao.
I lona tofiga o le Taitaifono o le Fono a Ekalesia Soofaatasi i le atunuu, na vaaia le malosi o lenei taitai e lagolago i isi ekalesia e ese mai i lana lava lotu le EFKS.
O se tulaga na vaaia ai lona taitaia o le tele o sauniga mo isi ekalesia i totonu lava o le atunuu, ma lona auai foi i le tele o faatasiga na faatautaia e isi aulotu i totonu o Samoa.
E toatele o le a mautinoa lava le fia auai i toe sauniga o lenei tama aemaise o le fia molimau foi i le soifua auauna o le susuga i le toeaina, le susuga Oka Fauolo, ae o le taimi lenei ua tālia pea le aiga faavauvau i se polokalame aloaia o toe sauniga o lenei tama iloga o le atunuu.
