E lei faatamala le Faatonu o le tala i le “Fatu na Toto” faapea le aufaafiafia o lenei faaaliga e tusa o lo latou sao i le faamanatuga o le Vaiaso o le Gagana.
O le Aso Tofi 30 ma le Aso Faraile 31 o Me na faatumulia ai le Maota o le Malumalu o Elim i Elsdon i Porirua i le faaaliga o lenei tala matagofie.
E tusa ma le 500 le aofai o tagata na lolofi atu e maimoaina i nei po e lua, siva faasamoa ma siva faaonaponei a alii ma tamaitai o loo faatinoina lenei faaaliga uigaese i le maimoa.
O i latou na tapenaina lenei faaaliga e mai Tagata Whenua le toalua tamaitai ae mai Kuki Airani le tasi alii ae o le toatele o alo lava o Samoa.
O le fetalaiga ia Falemua Tolua Lualua e faamatalaina le tala i le gagana Samoa ae o lona alo tamaitai ia Tupe Lualua na faatonuina le faatinoga atoa o le tala.
Sa toatele na toe mananao e toe faaalia lenei tala i totonu lava o le laumua ma o loo iai le faamoemoe e toe faaalia i le masina o Iulai pe a fai e tusa ma tapenaga moomia mo lea faamoemoe.
Avea foi lenei avanoa e faamalo ma faafetai tele atu ai i le Faatonu ma le aufaafiafia o le Fatu na Toto ona o le faaaliga matagofie ua mae‘a lelei ai le faagasologa o le faamanatuga o le Vaiaso o le Gagana Samoa.
Talosia ia maua pea le malosi ma avanoa lelei e faatino ai le agavaa o tatou tagata i soo se taleni ua faaeaina ai Samoa.
