Atamai e Tautua – 60 tausaga o le Kolisi o Samoa

E lei avea le maligi o timuga o le Aso Faraile le aso 31 o Me ma faavaivai i le faitau selau o alii ma tamaitai na aooga i le Kolisi o Samoa, i le taumafai lea e faamaopoopo a latou vasega taitasi atoa ai ma a latou taavale teuteuina i le faamanatuina o le 60 o tausaga o lenei kolisi tele i le atunuu.
O le itula e 2pm i le aoauli ae taofia loa feoaiga a taavale i le auala tele lea e agai mai i Vaisigano seia paia luma o le maota o le Malo i le Eleele Fou ae faaavanoa ai mo ni nai itula le savali tele a le Kolisi o Samoa ma ona sui tuai.
Na iloga le lanu samasama ma le lanu moli atoa o le taulaga o Apia i lea faatasiga tele ma na atili tumutumu lea nofoaga ona o le taimi lea faatoa mae‘a lava le sailiga siamupini o faagatama i le tai mo le faamanatu ai o le tutoatasi o Samoa.
O le tausaga e 1953 na faavae ai le Kolisi o Samoa ma o se aoga muamua a le Malo ua faavaeina e ese mai i aoga a lotu eseese i le atunuu aemaise le Kolisi o Avele lea sa faavae mai o se aoga mo le tomai o fai faatoaga.
O le tausaga lava la e 1953 na amata mai ai lenei savali ma faasolo mai ai lava seia oo i vasega o loo iai i le taimi lenei o le Kolisi.
O le saunoaga a le alii Palemia na faatalia le taunuu o lenei solo tele, e manino le tele o le sao o fanau a le atunuu na aoaoina i le Kolisi o Samoa mai i taitai o le Malo, le Palemene, itumalo, Ekalesia ma Nuu ma o le lu‘i ina ia unai le autū atoa o le faavae o lenei aoga ina ia Atamai e Tautua.
O le faamanatuga o le 60 tausaga o le Kolisi o Samoa ua laga ai le manaoga ina ia saga faaleleia le tele o nofoaga o le Kolisi i Vaivase ua fia faaleleia e pei ona iai se fuafuaga o tupe na aoina i tuufaatasiga uma o le faaiuga o le vaiaso mo lenei aso faamanatu o le a alu i le fausia lea o se fale taalo mo tama ma teine aoga ma le toe faaleleia o le malae tenisi ma isi malae taalo o le aoga.
O le afioga Le Mamea Sefulu Ioane na faapea ona ave i ai le faaaloalo o se tasi o le vasega faavae o le Kolisi, e saunoa ma faafetaia foi le lagolago a le Malo i le Kolisi o Samoa ma na vaevae i vasega faapea tausaga eseese le savali lenei. O se mafutaga na faatautaia i le Kolisi i Vaivase na vaevae ai foi vasega lava latou ia latou polokalame, ae o nisi vasega na faatasi i faletalimalo ma fale faafiafia i le taulaga mo a latou foi faamanatuga.
O le siva tele na faia i le Maota o le SCOPA i Vaivase na unai ai le sailiga o le seleni e pei ona ta‘ua mo atinae ia o le fale taalo ma malae taalo a le aoga ae o le sauniga lotu faapitoa e talosia ai lenei tausaga tāua i le talafaasolopito o le Kolisi na faatautaia lava i le Hall poo le Maota o le Kolisi i Vaivase i le po o le Aso Sa.
O le faamoemoe o sui tuai ina ia tumau le latou lagolago, ave foi le faamuamua i taumafaiga a le Kolisi i lenei vaitaimi i le toatele o fanau a le atunuu o loo aoaoina ai i lea nofoaga. O le tausaga lenei o le a ese le faasologa o suega ina ia ausia ai e fanau le aoaoina i le Kolisi o Samoa.
O tausaga taitasi sa fuafua lava i fanau ma le maualuga o a latou taumafaiga i mataupu eseese a le kolisi e agai i ai. O le tausaga lenei a fia ulufale le tama poo le teine i le Kolisi o Samoa o le a faia le suega ulufale i le faaiuga o le tausaga e pei ona vaaia i kolisi a lotu eseese ma o inā o le a filifili ai le fanau e sao atu mo aoga i le Kolisi o Samoa.