Tatala le Maota Gasegase o le Gagaifomauga i Safotu

O se aso tāua lea faamoemoe mo le itumalo o Gagaifomauga (1, 2, 3), le Aso Lua o le vaiaso ua tuanai, 28 Me 2013, ina ua umusaina ai le maota gasegase i Safotu, o le falemai faaitumalo o lea itumalo.
O le susuga i le Sea o le ekalesia Metotisi i Safotu, Rev. Tifi na taitaiina le sauniga, sosoo ai ma le saunoaga autū o le aso na saunia e le Alii Palemia, Tuilaepa Lupesoliai Fatialofa Sailele Malielegaoi.
Na faafetaia ai le itumalo ona e lei iai se fesoasoani a le malo i le galuega, na amata lava e le itumalo. Momoli foi le faafetai a le alii Palemia i le komiti a le itumalo mai Aukilani ona o le seleni lea na amata ai le galuega.
Na fai ma sui o le itumalo le tofa ia Tugaga Tevesi (tuua o Safune) e tali fuaitau i le saunoaga a le alii Palemia. Na mae‘a lea, ona sosoo lea ma le sui o le komiti mai Niu Sila, fetalai ai le tofa ia Sooalo Setu Mua e fai ma fofoga o le afioga ia Patele Felise Lemi, o le faatamā o le komiti mai Niu Sila, o nisi o le komiti na mafai ona auai i lea aso, aemaise nisi sa tapuai atu i Niu Sila nei.
Na faafetaia ai e le komiti mai Niu Sila le itumalo ona ua mae‘a le galuega sa latou feagai ai. Na sosoo ma le ootiina o le lipine ma asiasia foi le galuega.
Sa  molimauina ai le matagofie o le galuega i le maota gasegase, aemaise o le matagofie o le aso. Na faasopolia uma le malo i le Afioga i le alii Palemia, ma le kapeneta, minisita lagolago, ma faauluuluga o matagaluega, i faaaloaloga na ma‘au i ai Tupu o le Itu ma tooto o Finao aemaise le loaloa i le malosi o le itumalo.
O le tamā matua ia Lavea Loia na nafa ma faaaloaloga mo le malo, a o le Minisita o Tamaitai ma Aga-Fesootai, Afioga Tolofuaivalelei Falemoe Leiataua na fai ma sui o le malo.
Mae‘a le malo ona alo lea o le itumalo e fai faaaloaloga mo le komiti mai Niu Sila. O tulaga masani foi pei ona iai le malo. Toe tali fuaitau foi lea o le tofa ia Sooalo Setu Mua e fai ma sui o le afioga ia Patele ma le komiti na auai, aemaise foi o le tapuaiga a nisi o le komiti na faamuli atu i Niu Sila nei.
O tulaga ma faamoemoe faapenei, o le seleni lava le autū. O lenei faamoemoe, sa iai le aitalafu, e ova ma le $100,000 ae mae‘a ane le aso toe $50,000 le aitalafu, ona o le tele o meaalofa faatasi ai ma le $10,000 na toe faameaalofa e le komiti mai Niu Sila. Ona toe tulai lea o le Palemai ma ofo e totogi faauma e le malo le aitalafu ($50,000) o loo totoe, ona o le faagaeetia ma le fiafia i le amata mea o le itumalo ua māmā ai foi la latou galuega.
Na momoli le faafetai a le itumalo ia i latou uma na ulufia aao ona o lenei faamoemoe, na lafo tupe i le posiva.
O le komiti i Niu Sila, le afioga ia Patele Felise Lemi o le faatamā, tamā ma tina ma le loaloa o le komiti, aemaise le Afioga ia Muliagatele Faimalo Allan Stowers ma le kamupani o le Pacific Ezy Money Transfer, auā o le auaunaga lea na nafa ma le teumaluina o le tupe e aunoa ma se totogi,  seia oo ina faataunuuina le galuega.