Na logoina leoleo e ni tagata ma aiga tuaoi i lo latou molimauina o ni faatauga maruana poo laau faasāina o loo faagaioia e se ulugalii sa nonofo i se fanua i Vailoa ia Oketopa o le tausaga ua mavae 2011.
Na taunuu leoleo i le fale o le ulugalii o Pese Tuputala ma lona toalua o Violina Sasatuaumu Tuputala i le aoauli o le Aso Faraile 21 o Oketopa 2011 ma faapea ona valaau ane ai le tamaloa i ni faaupuga e faapea “Ua fai soo le tou le mafaufau, o lea ua leva ga ou faakali aku ia oukou”. E lei leva ae vaaia se tamaitai o se tasi o le aiga ua momo‘e ese ma se ato taitai poo se hand bag.
Na faavave atu i ai leoleo ma pue ma avane i le fale. O tolaulauga a leoleo i le faamasinoga i le mataupu na faaalia ai foi, a o faia feutanaiga ma le tamaloa o Pese ma lona toalua ae ua oo atu nisi o le aiga ma fai ni finauga ma leoleo.
O le taimi lea na vaaia ai loa le fafine o Violina ua tamoe faavave ese i tua atu o se pa ma se taga pepa ma ia lafoai i se pupu vao.
Na iloa atu e leoleo le gaioiga a le fafine ma faia ai loa le sailiiliga lea na maua ai i totonu o le taga pepa ni sikaleti maruana se 118 ma ni fatu o le laau faasāina se tasi le afe.
O le suesueina o le fanua ma le fale na maua ai ni laau malolosi poo fana, o le ituaiga o le 4/10 rifle ma se tamai fana puupuu o le 25mm pistol.
Ina ua molia le ulugalii e leoleo ma fofogaina o la moliaga sa tuuina atu a la tali tetee, ae ina ua oo i le aso e valaau ai molimau a leoleo na suia le la tetee i le ioe i moliaga.
O Pese ua 44 tausaga lona matua ma o se taimi muamua lenei ua aafia ai i se solitulafono.
O le tausaga e 1987 na ave ai i Niu Sila mo ni togafitiga faafomai i lona gasegase o le fatu.
Na ia faailoa i le ofisa faanofo vaavaaia o laau malosi na maua e leoleo sa ia aumai i se tulaga faaune (borrow) mai lana uo o Poni e faasesegi ai meaituaolo ua sua ai lona fanua, ma e lei teena e le itu a leoleo lea vaega o le faamatalaga a le tamaloa.
O laau malolosi e lua na maua e na o le fana puupuu 25mm pistol na molia ai Pese e leoleo. O lona toalua le fafine o Violina ua 44 foi tausaga o lona soifua ma o le taimi muamua foi lea ua molia ai i se solitulafono.
O lana faamatalaga i le ofisa faanofo vaavaia o le taga pepa uliuli na ia aveese mai se tasi o lona aiga ma togi i le togavao i tua o le fale sa iai ni vaega o le laau faasāina o le maruana. Mo itu lelei o i laua ua ioe i moliaga e fesootai ma le umia o laau malosi ma le umia o laau faasāina e tasi lava ua na o le suia o le la tetee i le ioe.
Mo le tamā o Pese ua faatāua e le faamasinoga ona aafiaga i lona gasegase o le fatu e ui na faaalia e le afioga i le Faamasino sili ua 25 tausaga talu ai sa faia ai lona taotoga i Niu sila peitai e lē o toe faia ni ana galuega mamafa talu lea tulaga i lona soifua maloloina.
I lona toalua o Violina ua na o le suia foi o lana tetee i le ioe, pau lea. I le silasila a le faamasinoga e lē tau fesiligia le matuia tele o le solitulafono o le umia o le laau faasāina ma o loo manino mai le faamoemoe o le ulugalii o le faia o se toga maruana ma le faamoemoe e faatau atu i tagata.
Ua faasala ai Violina i le 3 tausaga i le falepuipui ae o lona toalua o Pese ua pasasa ai le sala tupe e limaselau tala.
