O le aso 2 o Tesema o le tausaga nei lea ua fuafuaina e faailogaina ai e le Ekalesia Faapotopotoga Kerisiano Samoa i Niu Sila nei le atoaga o le 50 tausaga talu ona taunuu mai le Ekalesia i totonu o Aotearoa.
O se faamoemoe o loo ua matuā tapena i ai le Ekalesia, auā o lea ua mae‘a ona filifilia le komiti o tapenaga ina ia maopoopo ma lelei sauniuniga uma auā lenei lava faamoemoe.
O le susuga i le Toeaina, Rev Elder Lucky Slade o ia lea o loo avea ma Taitaifono o lenei komiti, lea o loo auai faatasi ma nisi o susuga i faafeagaiga ma tamalii foi ma faletua o e ua tusi aao iai le EFKS i Niu Sila mo le faamaopopoina o lenei komiti.
O le po o le Aso Faraile na se‘i mavae atu nei sa faapea ona faalauiloa ai se vaega muamua o tapenaga a le Ekalesia, aua le agai atu i le faailogaina o le aso ma le masina na sunui ai le faavae mautu o le EFKS i Aotearoa, ina ua malilie nisi o tamalii sa faapea ona uluai agai mai i Niu Sila i le po po fou o le sailiga manuia o le atunuu i Niu Sila.
O le tofa na a‘e ma le moe sa tuu atu pea i le Atua ina ia faapea ona iai se EFKS e tapuai saoloto ai ona tagata lotu o loo agai mai Samoa ma avea Niu Sila ma o latou atunuu ua faamautu mai ai, na ioe ai se taofi e tatau lava ona ave le feau i Malua ina ia pasia mai ai le faavaeina o le lotu i Niu Sila nei.
O le po la o le Aso Faraile sa faatumulia ai le hall a le EFKS i Papakura, lea o loo faifeau ai le susuga i le Toeaina, Rev Elder Tavita Taulealo ma lona faletua.
E lē gata ina faatumulia i susuga i faafeagaiga ma o latou faletua, ae faapea foi le paia maualuga o le atunuu sa auai atu e fia molimauina le vaega muamua o tapenaga a le komiti mo le faamanatuina o le aso soifua o le Ekalesia.
O le upega tafailagi poo le website, o se auala ua saunia faapitoa ina ia faapea ona fesootai ai ekalesia taitasi a le EFKS e le gata i Niu Sila nei ae ma le lalolagi atoa. O le a mafai e lenei upega tafailagi ona faalauiloa ai fuafuaga fai a le Ekalesia, o kalena faaletausaga, ma le tele lava o vaega tāua e tatau ona silafia e tagata lotu o le EFKS.
Talu ai ona o le saoasaoa tele o le tulaga ua iai le tomai i nei foi ona po, o le ala foi lea ua manatu ai le komiti, e tatau ona faavae le upega tafailagi lea ina ia o faatasi le suiga o aso nei ma le televave o fuafuaga a le Ekalesia ina ia talafeagai i itu uma. O se tasi lea o vaega sa faatāuaina i le saunoaga a le susuga i le Toeaina, Rev Elder Lucky Slade ina ua saunoa faapitoa e faamalamalama le tulaga e pei ona ua iai nei le upega tafailagi.
Na saunoa le susuga Lucky, o tausaga ua tea poo ananafi sa galulue ai mātua ma tuaa ua fai i lagi le folauga i o latou foi taimi. O latou taimi sa faatuina ai le Ekalesia e pei ona ua tupu ma ola i totonu o Niu Sila i ona tulimanu uma. O lea ua tulai mai faifeau ma mātua o nei foi vaitau, ia lea ua faia le upega tafailagi e faapea ona fai ma papa mautu i o latou foi taimi e ese mai i le tele o galuega sa latou asaina foi.
O le luitau lea ua faataoto auā tupulaga o aso nei ma le foaga o lalovaoa. Afai o lea ua iai le faavae mautu ma ua poupou atu e pei ona iai foi le upega tafailagi, o le fesili o le ā so latou foi sao mo a taeao pe a oo i o latou foi taimi?
Sa faapea foi ona faalauiloa ai ma le newsletter poo le tusi o loo lomia ai polokalame ma fuafuaga fai a le Ekalesia i totonu o lea masina ma lea masina.
E tali foliga tutusa lenei tusi ma upega tafailagi. O le auga lava ina ia vave ma lelei le fegasoloai o fesootaiga i totonu o ekalesia taitasi ma ona tagata lolotu.
O le susuga i le Toeaina, Rev Elder Tavita Tauleao sa saunoa i le amataga auā le momoliina o le viiga i le Atua, o le agaga faafetai ona ua faataunuuina ma le manuia le faamoemoe o le uluai laasaga o le polokalame ua faataatia auā le faailogaina o le 50 tausaga talu ona faavaeina le EFKS i Aukilani.
O le susuga i le Toeaina, Rev Elder Popo Su‘a, sa saunoa e faafeiloai le mamalu o le auvalaaulia, aemaise ai o le afioga i le Tamaitai Faipule, Leaufaamulia Asenati Taylor, sa auai i lea po.
Sa faatasi atu foi i ai ma le susuga i le faafeagaiga o le Ekalesia Metotisi, Unasa Uesifili, o ia foi o le sui o Samoa i le Fono Faufautua a Aukilani. Sa auai foi le susuga i le Toeaina, Rev Elder Eti Tamati ma lona faletua sa malaga mai Samoa.
O saunoaga ma foliga vaaia o lea afiafi sa auga uma lava i le agaga e tasi. O le loto o le fiafia ma le agaga o le faafetai i le Atua, auā o le fatu e tasi na totō i le 50 tausaga talu ai a o lenei ua fua mai ai le tele o Ekalesia EFKS i totonu o Niu Sila.
I nisi o lomiga o muamua mai, o le a taumafai le Samoa Times e faalauiloa atu ai le talaaga o le Ekalesia i totonu lava ia o Niu Sila mo le silafia e le atunuu, ae mo le tele o fuafuaga ma polokalame auā le alo atu i le faailogaina o le 50 tausaga o le EFKS i Aotearoa.
O le a faapea ona maua mai lea i luga o le upega tafailagi poo le website ua tatala ma faalauiloaina nei, o le www.efksnz.com.
