Ua tolu nei vaiaso talu ona faavaeina ma amata le aoga ua faaigoaina o le Polynesian Kids Community School. O se anavatau tāua ma le aogā i le silasila a le paia ma le mamalu o le atunuu aemaise o tagatānuu mai isi atumotu o le Pasefika, ona o se avanoa muamua lenei i totonu o le aai ua faia ai se aoga e aoaoina ai le gagana Samoa ma isi gagana a le Pasefika.
Na asia e lo tatou ofisa i Melepone le aoga ma maua ai se feiloaiga ma le faatonu le faletua ia Vaifoa Galuega Kaio, ma ia saunoa ai e tolu tausaga o fuafua ma faataoto le miti seia oo ina tino mai i le faaiuga o le tausaga talu ai, ina ua malilie le City Council a le pitonuu o Water Garden latou te galulue faatasi ma ofo atu ai le fale e pei ona amataina ai le aoga.
O se fale malupuipuia mai le ala tele toe lelei ma mautu potu aoga faapea ofisa ma tulaga uma e manaomia mo aoga. Na saunoa Vaifoa ua silia ma le ivasefulu tamaiti ua resitalaina mai le lima tausaga e oo atu i le sefulu ma le lua tausaga le matutua.
Ua tolu vasega i le gagana Samoa, ma vasega e lua i le gagana Tonga, faatasi ma le vasega o loo a‘oina ai pese ma siva faa-Samoa, ma le faamoemoe o se taimi lata mai e amataina ai vasega i le gagana Fiti, Niue ma Rarotoga.
O loo amata foi ona silasila i le lumanai mo se afiafi se tasi o le vaiaso e lua ai aso aoga ma le Aso Toonai o loo faatamoe ai nei mo le tolu itula, mai le ‘afa o le valu i le taeao i le ‘afa o le sefulu ma le tasi, e onosefulu tala le pili o le tamaititi mo le tausaga atoa.
O se tasi o itu lelei o le aoga i taeao o Aso Toonai o le mafai lea ona agai mātua e fai a latou faatau pe momoli foi nai fanau matutua atu i taaloga, a o aooga le autinifu laiti. Na faatalatalanoa ma nisi o mātua i le Aso Toonai, ma maitauina ai le lagolagoina o le aoga aemaise o le agaga fiafia i lenei laasaga fou mo alo ma fanau i la tatou lava gagana.
Na saunoa foi nisi o mātua na soifua a‘e i Niu Sila ma Ausetalia, o le tasi o tulaga lelei o le aoga, ona ua faamalosia ai i latou e faaaogā la tatou gagana i o latou maota ma laoa, e talatalanoa ai i fanau.
O le komiti a le aoga o le faatonu le faletua ia Vaifoa, failautusi Penny Timu ae teutupe Elizabeth Lambert. O faiaoga Samoa o Carol Foisa, Sieni Mapusua, Faamao Togia‘i ma Ane Juanita Wright ma faiaoga Tonga o Unga Ofamaooni ma Mele Tuiaki. Alofagia e le Atua le aoga ma faamanuia i alo ma fanau o loo aoaoina ai.
