O loo maitauina le naunau taupati o le toatele o le paia ma le mamalu o tupu ma tamalii faapea alo ma fanau o afifio ma papaaao i le aai o Melepone, e faalautele le tomai ma le silafia i aoga o loo faatino fua e aunoa ma se totogi i lalo o polokalame a le malo o Ausetalia.
E pei ona sa ripotia muamua e la tatou tautua i le tausaga ua tuanai atu, le faamanuiaina o le toatele e ala i tusipasi i le mae‘a ai o aoaoga mo le tai valu vaiaso pe sili atu foi. O le toatele lava na maua tusipasi i le faakomepiuta (computers) mataupu o le Igilisi faatasi ma tusipasi mo pisinisi laiti.
O le Aso Lulu o le vaiaso na tea nei na amataina ai se tasi o aoga nei i lalo o polokalame a le Iunivesite o matata eseese le UIT of Technology i le pitonuu o Saint Albans. Na amataina i se sauniga lotu puupuu na saunia ma taitaia e le susuga i le faafeagaiga ia Pastor Analei Toomata ma tatala aloaia ai loa le faamoemoe.
E to‘a luasefulu ma le lua i latou ua resitalaina ma amata ai le aoga muamua lenei i lea foi pitonuu. O lenei anavatau lelei ma le tāua ua tino ma faataunuuina ona o le lagalaga ma le seu silasila a le faletua ia Vevela ma lona alii ia Maluaiga Fereti, faatasi ma le lotonuu ma le lagolagosua a o la tauaiga ma uo lea o loo toatele ai le aoga.
O le agaga faafetai ona o le mafai ona faaavanoa o latou afiafi tailua o vaiaso taitasi lea o le a faasavali ai le sailiina o o latou tusipasi.
Talosia ia tau lau o le faamoemoe faamanuiaina ma maua uma tusipasi mo i latou, ma ia avea o ni avefu‘a lelei mo Samoa, aemaise o le paia lautele o sailimalo i Melepone ma le malo tele o Ausetalia.
