Faavae le au siva Pasefika a le aoga Colwill i Massey

O se tala fiafia i matua Pasefika, aemaise lava Samoa, o aiga, uo ma e masani, ina ua tafa se finagalo o le alii pule, faapea le mamalu o le pulega a le aoga a Colwill i le itu i Sisifo o Aukilani, ina ia faavae ma amataina se au faafiafia a fanau Pasefika i totonu o le aoga. I le talafaasolopito ma le amataina mai o lea foi aoga mai le tele o tausaga ua mavae, sa lei mafai ona maua se avanoa faapitoa mo fanau Pasefika e faalauiloa ai a latou faafiafiaga e ala i siva ma pese a atunuu, e pei ona faatinoina e le tele o aoga o loo iai nei.
E mafua lea tulaga ona e lei afea lava i se finagalo o le pulega a lea foi aoga, le taua o tu ma aga faa-Pasefika. E le gata i lea ae lei mafai foi ona ausia e tamaiti Pasefika o loo aoaoina i totonu o le aoga, se numera e ono amata ai se fuafuaga faapea. Peitai o lenei vaitaimi ua faatupulaia le numera o tamaiti Pasefika, atoa ai ma le tuitui pea, ae faatino i le lagolago malosi tele o matua i polokalamefai a le aoga, o le mafuaaga tonu lea o le toe sasaa o le fafao, ma ua tafa ai le finagalo o le alii pule, ma le pulega e talia loa le manaoga sa faananau i ai le toatele o matua Pasefika, mo le faamoemoe e pei ona taua.
O le avanoa ua tuuina mai e le aoga e faatino ai lea manaoga mo tagata Pasefika, o se tulaga lelei tele, aua o le a mafai ai ona silasila ma vaavaai pe faalogologo foi le toatele o isi foi atunuu i pese, musika ma gaioiga ma taleni faatino mai tagata Pasefika, ma o le a avea foi o se avanoa taua tele, e faalauiloa atili ai Samoa ma le Pasefika i totonu o le siosiomaga o aoga taitasi i le atunuu.
O le afiafi la o le Aso Lulu o le vaiaso na tea nei, o le uluai taimi lea sa faaali ai tapenaga mai tamaiti aoga o atunuu eseese o le Pasefika, o loo aooga i le aoga lea a Colwill e ala ia latou faafiafiaga. E lei ofi le hall a le aoga i le mamalu o matua Pasefika, aemaise o le toatele lava foi o papalagi, sa lolofi atu e molimauina ma maimoaina foi le tulaga sa oo i ai le taumafai o tama ma teine o le aoga.
O le isi tulaga sa faateia ai le sui o le Samoa Times, ona sa vaaia i lea afiafi, e le gata i tamaiti Pasefika sa auai i au siva taitasi, peitai sa toatele lava foi tamaiti papalagi sa auai i le faatinoina o siva ma pese. Sa maua le avanoa e fesiligia ai nisi o tamaiti papalagi ma Initia ma isi foi gagana, poo le a le mafuaaga o le auai i faafiafiaga ae o loo faapitoa mo tamaiti Pasefika, ae na latou tali mai, ua faamaonia ai e tofu lava le tama ma le teine ma le sootaga vavalalata ma tamaiti Pasefika e ala i usuga gafa ma faia masani e pei ona silafia. E moni lava le upu a le atunuu, e laititi aa o le laau i aa o le tagata.
E faafetaia ai le saili malo o tagata Pasefika, atoa ai ma tagata Samoa i soo se matata i totonu o lenei atunuu ma le lalolagi atoa, ua maitauina ai le maalo pea le uiofe i tu ma aga a atunuu taitasi, ma avea lea ma tagavai i totonu o faigamea i atunuu ese.
O le maea ai o faafiafiaga i lea po, sa toe faafetai faapitoa ai le alii pule o le aoga ona o le taumafai o matua ma faiaoga, faapea foi tamaiti aoga i le latou pitolaau mo le tuufatasia, ma le faatinoina o vaega uma ua mafai ona faavaeina lea faamoemoe ua leva e lei tupu i talafaasolopito o lea foi aoga.
Sa ia taua foi i lana lava lea saunoaga le tele o le sao o le au faafiafia lenei i le aoga, ona o le a sitia ai foi nisi tulaga lelei o le aoga i le va ma isi foi aoga i totonu o le atunuu.