Leiloa pe toe foi i Samoa e tali i ona tuuaiga

Ua fesiligia e nisi o le au fagaluega sinia a le Malo, poo fea ua fai i ai se mataupu sa tuuaia ai se tagata faigaluega sinia i le vaega o tupe a le Matagaluega o Tupe Maua i le ofisa o le tiute, lea ua taua e se molimau ua uma ona toe totogi e lea tagata faigaluega sinia sa avea ma se tasi o Pule Sili Lagolago, se vaega tupe e tusa ma le $18 afe tala sa tuuaia lona faaaogaina.
Ua faamavae lea tagata faigaluega ma ua malaga ese ma Samoa, ae e le o iloa poo ua suesueina e le Ofisa o le Suetusi sili a le Malo, ae pe ua oo foi le mataupu i leoleo mo suesuega.
Ua faaalia e se molimau faatuatuaina mai totonu o le matagaluega o tupe maua lea ua tuufaatasi ai le ofisa o le tiute ma le vaega o lafoga, ua faia e le Komisi e pulea tagata faigaluega a le Malo le PSC ni moliaga faasaga i le sa avea ma faauluuluga o le matagaluega, ua tuuaia ai i lona faamatala i le faatinoina o ona tiute ua mafua ai ona tulai mai le faaletonu ma aafia ai tupe a le ofisa.
Faaalia foi e le molimau faatuatuaina ua iu ai lava ina afaina ma le galuega a le faauluuluga ina ua le toe filifilia ae ua tofia nei i ai se tamaitai e avea ma Pule Sili o le Matagaluega o Tupe Maua e pei ona faailoa lautele le filifilia o Tekauita Lusia Sefo Leau, sa avea ma Pule Sili Lagolago o le matagaluega o tupe a le Malo.
Ua teena e le Komisi le PSC le iai o se faatamala o latou i le mataupu, ona ua faailoa mai e se alii ofisa sinia na faatoa iloa ane e le Komisi le faaletonu ae ua alu ese ma Samoa le tamaitai sa avea ma Pule Sili Lagolago i le ofisa o le tiute.
O lona tuua o Samoa mo Niu Sila e lea tagata faigaluega sinia mo le faia o ni ona aso malolo poo livi na faamavae mai ai lava ma le galuega.
O le taimi nei na taua e le ofisa sinia i le Komisi e pulea tagata faigaluega ua faamuta ai ma le mataupu i moliaga o le sa avea ma Pule Sili ona ua maea lana konekarate.
Ae mo le tagata faigaluega sinia o loo tuuaia e le o iai se silafia o le komisi pe ua toe foi i Samoa, ae ua uma ona tuuina atu le mataupu i leoleo mo le faia i ai o se suesuega.
O le faamatalaga mai a le ofisa sinia o le ofisa o le komisi ua iai suiga tetele i tulafono a le komisi mo ana tagata faigaluega, lea ua le toe faamagaloa ai se tagata e aafia i le faaaoga sese o meatotino a le Malo e aofia ai tupe, tusa lava pe 20 sene ae ave sao i leoleo e faia ni moliaga faasolitulafono.