O le Aso Tofi talu ai na tumutumu ai aiga, uo ma ē masani i le maota faamasino Maualuga i Sini Niu Sa Uelese auā le tapua’ia o le faaulufaleina aloaia o le alo talavou Samoa i le Bar a Loia, ia Filipina Loretta Leaututu.
O se aso o le olioli ma le fiafia i mātua le tina palagi ia Margaret ma le Afioga ia Aumua Ifale Leaututu Manuleleua o Vaimoso, Sataua, Faleasiu ma Falealupo.
E ono tausaga na tuliloaina ai aoaoga i le Iunivesite a Notre Dame e le tamaitai Loia Barrister i mataupu Loia ma le Commerce.
Sa ia faafetaia le lagolago mai o nai o latou mātua mai lava i le laiti seia aulia lona faailoga Loia. O Filipina o le ulumatua e luasefululima ona tausaga, o se fanauga e toafitu ma o se faataitaiga lelei mo uso ma tuagane laiti.
Na feiloai Aumua ma Margaret i le 1993 i le malaga mai a se ausiva Samoa i Ausetalia lea na masani ai loa le tama Samoa ma lana manamea Ausetalia. Faailoa e Aumua e lē faigofie le taimi na amata mai ai aoga a le fanau ma le faamalosiau.
E lolotu Katoliko i latou i le palisi palagi i Minto lea sa tapena ai lona soifua kerisiano sa maua ai lona toomaga ma malosiaga i taimi faigata o aoga faaloia. O Filipina o le uluai Barrister Samoa lea ua faaulufale ma o le a fesoasoani tele i tagata Pasefika aemaise Samoa i Sini nei.
