O le uluai tamitai ua avea ma ofisa Sili o pulega o le Matagalega o Faamasinoga ma le Faafoeina o Mataupu tau Faamasinoga, le faletua o Moliei Vaai

I le 16 tausaga o galue i le Faamasinoga a Niu Sila, ae valu tausaga o avea ma Pule o le vaega o mataupu mo tagata lautele a le faamasinoga maualuga a Niu Sila poo le Civil Section, e lei tāua tele i le faletua o Moliei Vaai, le totogi tēlē o loo ia maua, ae sa silasila i se avanoa e toe foi mai ai i Samoa e fai sana tautua mo le atunuu ina ua maua atu le tala o lana talosaga i le avanoa o le Ofisa Sili o le Matagaluega o Faamasinoga a Samoa, o ia ua filifilia. Ina ua maua le avanoa e faatalanoa ai le tamaitai Ofisa Sili i le sefulu o aso talu ona seei i le tofiga, sa molimauina lona ootia a’o saunoa e tali i fesili a le tusitala ona o lona lagona fiafia ua tali le Atua, aemaise sa ia faaalia o le faamanuiaina o lana talosaga o le valaau foi lea a le Atua ia te ia mo sana tautua i le atunuu.

“Sa fai la’u tatalo ma ou faafetai i le Atua, ma ou mafaufau foi o se avanoa tāua aemaise sa ou mafaufau i nai o’u mātua”. E lei manatu Moliei o ia le tamaitai muamua ua seei i le tulaga Ofisa Sili o le matagaluega o faamasinoga a Samoa o se tulaga ese auā sa ia ta’ua sa ia lagona e tutusa uma lava alii ma tamaitai i le filifiliga ae o le itu e sili ona ia faatāua poo le a sana maa o le a togi mo le siitia o le auaunaga a le matagaluega o faamasinoga a le atunuu. 

E tele luitau na ia ta’ua o le a feagai ma lona tulai mai o le faauluuluga ae o lona talitonuga e lē mafai ona liliuina atoa le auaunaga i ni suiga tetele ae amatamata laititi ma faasolosolo o le sini lea e ausia ai ni tulaga lelei i le agai i le lumanai o lana galuega fou.

“O la’u vaai o loo lelei ona faataoto taiala o fuafuaga alualu mamao a le matagaluega mai le taimi o le sa avea ma faauluuluga sa iai ma o loo taoto foi le faatinoga o le auaunaga i se tulaga ua maea ona tapena lelei, pau lava la’u vaai e tatau ona toe faaauau ma saili nisi faiga e unaia ai pea i se itu sili ona faigofie mo le mamalu o le tatou atunuu”. 

Na faaalia e le Ofisa sili nisi o faiga ma gaioiga o loo fai si tele o auala e faatino ai nisi o tautua a le faamasinoga, ae o le lu’itau lea mo ia o le saili poo le a se isi auala puupuu e mafai ona faatino ai ma fesoasoani ai i le atunuu e ala i le faaitiitia o le taimi e faasavali ai se mataupu. 

Na oo le fesili a le tusitala pe moni e toatolu ni faamasino o le faamasinoga o fanua ma suafa ua faamalolo le tumau, ma na tali Moliei e sa’o, peitai o le pitolaau a le Komisi o galuega a le Faamasinoga o le filifilia o ni sui o se komiti e suesueina le mataupu ua faamalolo ai ia faamasino e aofia ai se tasi o sui Pelesetene ma ni faamasino se toalua. O le afioga Sevealii Panapa Vee, Lavea Siaosi Hazelman, ma Nanai Pologa Ioane. Ua faamaonia foi e le tamaitai Ofisa Sili e toatolu ni faamasino fou o le faamasinoga o Fanua ma Suafa o le a faatautoina i se aso o le vaiaso nei. 

O loo faatali i se faamaoniga a le Kapeneta ona faatoa faamautu lea o le aso o le faatautoga. O ia faamasino fou o le a seei i le faatinoina o faamasinoga a’o avanoa nofoa o faamasino ua faamalolo le tumau sei faatali se taimi e maua ai se faaiuga o le suesuega. E lei faailoaina e le Ofisa sili le mataupu ua aafia ai ia faamasino e toatolu, ma nate lei mafai foi ona faailoa suafa o faamasino fou e toatolu seiloga ua maua se finagalo o le kapeneta.