Matthew Alai ma ona aiga faapea le Loia Sili a le malo, Lemalu Herman Retzlaff i le mae’a ai o le sauniga e aloaia ai le galue ai i le faamasinoga a Samoa

O le vaiaso nei lea na faaulufale ai i le faamasinoga maualuga e le afioga i le alii Loia Sili ia Lemalu Herman Retzlaff, loia e toalua ua aloaia le galulue ai i totonu o Samoa. O i laua ia o Matthew Eddie Joe Alai ma Taviuni Fonoti. Sa maua le avanoa o le Samoa Times e faatalanoa ai le susuga ia Matthew Eddie Joe Alai e tusa ai o le manaoga e fia galue ai i totonu o Samoa.

O Matthew ua faaipoipo atu ia Jewell e toalua o la alo, faatoa lua masina talu ona toe foi mai ai i Samoa. O lana tala o le manaoga lea o lona toalua, afai e mae’a le la faaipoipoga e foi mai e nonofo ai i Samoa nei. 

O le amataga o aoaoga sa aoga muamua ai i Otago University, ma faamanuiaina ai i le Bachelor of Arts. Sa toe taumafai mai i le Auckland University ma aveina ai lona Law Degree, o loo ia umiaina foi le tusipasi o aoaoga faatatau i le Tusi Paia. O lana tala o le oo mai ai ma talia i le faamasinoga a Samoa, faapea ai le Sosaiete a loia a le atunuu o lana faaeaea lea i ona mātua ma ona nuu o Moataa ma Iva i Savaii.

Sa talia foi Alai i le faamasinoga a le malo o Niu Sila i le tausaga 2016, sa ia faaalia, e ese le fiafia ina ua mafai ona taliaina o ia e galue ai i le atunuu na fanau ai, ae o le taliaina o ia i lona atunuu moni o Samoa o se tulaga tāua lea ma e ese mai foi.

O le saunoaga a le tamaitai faamasino ia Tafaoimalo Leilani Tuala Warren, e taliaina ai i laua ia, na mafuli i le loto maualalo o le tasi lea o vituti (virtue) o le soifuaga e talitonu a maua e le tagata i lenei ituaiga tofiga ma galuega e lē taumate lona manumalo ma faaeaina.

Na faaalia e Matthew Alai ua feauga lelei lava lea ma lona foi talitonuga, o le tala mai le Tusi Paia na ia aumaia e faapea….”God opposes the proud, but gives grace to the humble.”

O le susuga Matthew Alai o ona mātua o Vaagi Fiti Alai ma Nina Kirifi Alai o Moataa ma Iva i Savaii. 

O le a galue le susuga ia Matthew i le ofisa o le Loia Sili o le malo o Samoa.