E faatupu manatu i mātua le maliu o se alo tamaitai talavou o le atunuu sa aoga faasikolasipi i Fiti i lona gasegase na toe aumai ai i Samoa ua lē maua se togafiti i le atunuu sa aumau ma aoaoina ai.
O se tala faanoanoa mo aiga ma mātua aemaise o uo mamae ma ē masani ina ua latou maua le tala o le gasegase o le tamaitai o le a lē faailoaina lona suafa ona o le puipui i lagona oi latou o loo mafatia ai.
O le masina na tea nei na toe aumai ai i Samoa mai Fiti le tamaitai ua lē aoga i ai ni togafiti ma ave loa i le numera tigaina o le maota gasegase o Tupua Tamasese Meaole i Motootua. Sa taofia ai mo ni vaiaso ma taumafai ni togafitiga auā ua ia lē iloa se tagata.
E faigata ma faamomoi loto tala esese o le gasegase o le tamaitai, ona e tele lava tala i le faapea mai na faalauatau. O se gaioiga ua tatou iloa a faia i se tagata e aafia ai vai ma faiga faataulaitu. E tele lava mafuaaga o ia faiga faanuupo. A lē ita i le tagata o le fia faiavā poo le fia fai tane i ai. Ua tele lava mea faapenei ua tutupu ua tatou faalogo pea i ai.
Na faamatala se molimau sa talanoa ma se tasi o le aiga o le tamaitai e faapea, o se tafaoga na alu a o iai i Fiti le tamaitai mo aoaoga. O ia ma lona uso o loo aoga sikolasipi foi ma nisi a la uo. Na foi ane le tafaoga i le po ona tausasami lea i meaai na avatu. O le po lava lea na oso ai le gasegase i le potu o se fale sa faamautu ai le tamaitai ma nisi tagata.
Na ave i le falemai ma taofia ai peitai sa fiu togafiti a fomai i Fiti ua aliali mai lava ua tigaina, ma ua lē iloa se tasi.
Na faia ai loa le faaiuga e sili ona aumai i Samoa mo nisi sailiiliga a fomai pe maua ai se laveai. Ae na siliga tali i seu se fesoasoani. O lona taoto ai i le falemai i Samoa sa molimau mai nisi o fomai ma tausi soifua e ogaoga auga o le gasegase ma sa tapu pe faasā ai e fomai soo se tasi e oo i aiga o le tamaitai ona oo i ai. O auga faigata e pei ona faamatala se tasi o tausi soifua, e tai foliga i le ma‘i o le Ebola peitai e lē o le gasegase lea ae o ona auga e faapea uma lava. O le mafuaaga lea na malu puipuia ai tagata mai le oo atu e asiasi i le gasegase.
Ua lua nei vaiaso talu ona falelauasi le tamaitai i lona aiga, ae o se gasegase ua faatupu manatu i mātua o loo aooga fanau i Fiti ona mataala i ai. O fautuaga faamatua e tatau ona ave i ai, ia aua le soona feoai i lea atunuu auā e leiloa ni faaletonu e tutupu mai ai.
O faamaisega i mātua ma aiga faapea uso ma tuagane ma uo ma aumea mamae ona o le motusia o le mafutaga ma fanau i se taimi o le talavou o le olaga, aemaise o nai fanau sa feagai ma aoaoga mo se manuia o aiga, ae ua momotu faafuasei e gasegase ma le oti le mafutaga.
