“Fua le manao i seleni ua maua”, o le autu lea o le Tala autu o le Tupe a le afioga i le Palemia mo le tausaga faaletupe mulimuli a le faigamalo a le HRPP, ona mae‘a lea o le paeaiga faapalemene o loo iai nei.
Fai mai le minisita agai o Tupe a le Tautua Samoa le afioga Afualo Dr Woods Salele, e iloa i le autu o le tala o le tupe le tulaga ua iai tupe a le Malo. “Ua tau faasoasoa ma ua palasi lava tupe faaalu mo galuega o loo lumanai nei mo le isi 12 masina, talu talu ai le soona fai ma le faatautala”.
O le finagalo o Afualo o loo fua i nisi o galuega o loo faaalu ai seleni e pei o komiti a le Malo mo matagaluega lea o loo iai le latou tuuaiga o ni komiti ua soona faaalu ai tupe e totogi ai tagata o loo avea ma sui, ae o seleni ia sa tatau ona faaaogā tatau mo galuega o loo manaomia le ave i ai o le faaamuamua e pei o se uafu faavaomalo mo Savaii, aemaise o se malaevaalele lelei faavaomalo mo Puleono i Salafai.
Na saunoa le tasi o faipule o Salafai mo le itumalo o Faasaleleaga numera 2 le susuga Papalii Li‘o Masipa‘u, e lē o moni le mau tauave a le faigamalo o le HRPP o loo taulagi pea, o le mea e lelei i Upolu e lelei foi mo Savaii.
“A tou silasila i ai i le atinae o tagata tafafao, e matuā pa‘ū lava Savaii i le itiiti o tulisi o loo agai atu i ai, auā foi e leai se malaevaalele faavaomalo toe leai se uafu faavaomalo”.
“O le taulaga i Salelologa o lena ua outou vaai i ai, e lē o toe gaigoi se mea e tasi” “Ua uma atu nai toeaiina sa avea ma taitai o le Malo sa latou lagalaga lenei atinae tele, ae ua lē o toe faia lava se faamatalaga a le Malo poo fea ua agai i ai. “Na o le ave o tupe e faaleleia ai Upolu e pei o faletalimalo, uafu ma malaevaalele ae lafoai lava Savaii”.
O le saunoaga a le Palemia o le Minisita o Tupe i le faataatiaina o le tala autu o le 
tupe na ia faaalia ai, o le a siitia nisi o lafoga o galuega faatino i luga o oloa e pei o sikaleti, avamalosi ma faguinu suamalie.
Peitai o le a tumau pea ona leai se siitaga o le lafoga o le VAGST. Na faaalia e Afualo e ui ina faapea e lē o siitia lea lafoga ae o le siitaga o lafoga i tau o oloa e pei ona ta‘ua o le siitaga lava lea o le lafoga o le VAGST.
Ua faaalia e le Palemia i se talanoaga ma le nusipepa a le Malo o le Savali, ua mafua ona faitioina le tala o le tupe ua ia faataoto i le Palemene ona o togafiti uma ia o faatosina o le palota tele a le atunuu o le a faia i a Mati o le tausaga fou.
Ua saunoa foi le Palemia i lana polokalame masani ma le leitio o le 2AP i lena vaiaso ua mavae atu, e fiu e faamalamalama mataupu o le tamaoaiga i le Itu agai e lē fia malamalama.
Ae o finauga nei e masani ona faalogoina foi i isi atunuu e pei o Niu Sila o loo latalata mai i a Samoa, pe a oo ina lalata le vai vaa o le a faatini foe o se isi paeaiga faapalemene, ae ua sauni pati faaupufai uma mo le isi palota tele. “O lea sa matou fai atu lava e taofiofi aitalafu a le atunuu ua oo i le piliona, ae fai mai lava o loo gafatia, o le ā la le mea lea ua tulai mai i le tala o le tupe, o lona uiga ua soona faaaogā tupe a le Malo, ae o lea ua safa ai le atunuu”, o se finagalo lea o le taitai o le Itu agai le afioga Palusalue Faapo II i le feiloaiga ma tusitala.
Saunoa le taitai o le Itu agai pe ana lelei ona faasoasoa e le Malo seleni i galuega semanu e lē fai mai, ia fua le manao i seleni e maua.
O le aso 18 o Iuni o le a toe tauaofia ai le Palemene mo le talanoaina o le tala autu o le tupe faapea le tala faaopoopo o le tupe ua mae‘a foi ona faataatia i le Palemene.
