I lana faamavaega i le afiafi o le Aso Faraile o le vaiaso talu ai i luga o le TV3, na vaaia ai le faigata i le alii faasalalau o John Campbell, ona taofiofi ona lagona ootia a o taumafai sana faafetai ma faamavae mai i le aumaimoa.
E faigata ona tuua le mafutaga ma ona uso ma paaga i le galuega, aemaise ai lagona faagaeetia i le tali atu a le atunuu e lagolagoina ma talisapaia le telē o le sao o lenei auauna sa tauala mai lana polokalame lauiloa i luga o le televise tolu, le Campbell Live.
Ua tuua nei e le alii faasalalau o John Campbell aemaise i lana polokalame le Campbell Live, le galuega sa tautua ai mo le 24 tausaga i le televise tolu a Niu Sila. Peitai e oo mai lava i le taimi nei, e lē o nofo lelei pea i lagona o le toatele o le aumaimoa i le televise, le faamutaina faafuasei o lena polokalame tāua a le televise.
E tele tusitusiga i nusipepa i totonu o le atunuu, o lagona faaalia o tagata i luga o leitio ma fesootaiga televavave i upega tafailagi (social media) o loo faaleo ai lo latou lē fiafia ma le mau faitioga ua agai atu i le pulega a le TV3 talu ai le faaiuga e faamuta lena polokalame, le Campbell Live.
O se faapogai o loo ta‘ua ai le silasila mamao a le Pulega i ni ituaiga o polokalame e ono tosina i ai le toatele o tagata maimoa i televise, auā o le tele o tagata e maimoaina se polokalame, e iai foi lona itu lelei i le tosina mai ai o kamupani ma soo se vaega o pisinisi mo le faasalalauina i luga o lena ala televise ma o le tele foi lena o le seleni e sasaa mai i totonu o le pisinisi.
Peitai o loo faigata ona talitonuina e isi lena mafuaaga pe a fua atu i le anoanoai o tagata ua faaali lagona tetee ma le lē fiafia i le iuga ua faamuta ai le Campbell Live. Na ta‘ua le ofoina atu i le susuga John Campbell o se isi avanoa e la te tauave toalua ai ma se isi sui faasalalau se polokalame, peitai e lei talia e Campbell lena ofa a le televise, ae ua malie e tapuni loa lea itulau o lona soifua galue mo le TV3 ae agai atu mo nisi fuafuaga i se taimi mulimuli ane.
O le Aso Faraile la na se‘i mavae atu nei, aso 29 Me 2015 o le taimi mulimuli lena na toe silasila ai ma maimoa le atunuu i lenei polokalame sa sili ona nofotatali i ai le toatele i afiafi uma, le Campbell Live.
O se polokalame na mafai ai ona silafia e le toatele nisi o mea ogaoga atonu o ni mea e lē mananao i latou o aafia ai e faailoa mai luga faalauaitele, ae o le tomai lena sa iai i le alii faasalalau ma lana vaega, sa mafai ona latou lalaga mai i luga ma le lē fefefe, le tele o mea lililo ma faaalialia i lumamea, o se gaioiga na mafai ai ona toe faasa‘osa‘o le tele o ni mea na semanu e tanumia ai lava ma alu alu sese ai pea, ae o loo toatele nisi o loo afaina ma pagatia ai.
O tomai na o Campbell ua molimau ai foi le mamalu o Samoa, e pei ona iai nisi o mea iloga sa gugulu ai foi le atunuu i le vaitaimi ina ua mavae le tsunami na aafia ai Samoa i le 2009, lea na matuā oo ai lava lenei alii i Samoa ma taumafai e faatalanoa le taitai o le atunuu le afioga i le Palemia, i nisi o mataupu sa gugulu ai lena foi taimi i le lē amiotonu o le faaaogāina o tupe o meaalofa sa sasaa atu e le tele o malo mai fafo auā le toe faaleleia o Samoa i mea na faaleagaina i le mala faalenatura.
Na telē se aogā o lena sailiiliga mae‘ae‘a a Campbell i tupe ma meaalofa o le tsunami, auā na pei ai o se logo tagitagi i taitai o le atunuu, ina ia faaaogā tatau seleni ma meaalofa o loo gapatia ai o tatou tagata i atunuu i fafo aemaise foi isi malo e foai atu, aemaise ai o lea e tilotilo atu isi e pei o Campbell Live ma mataitu uma mea o loo faaaogā sese i ai nei foai faameaalofa ma faaaliali mai i luma.
Sa iai nisi na fesiligia lena gaioiga a Campbell, pe lē ua tuu atu fua lona isu se‘i tulou i pisinisi a Samoa, aemaise e peiseai ua aliali mai ai i le lalolagi atoa se faaletonu o loo iai le pulega a le atunuu, ae sa malosi foi le talitonuga o nisi, o se gaioiga alofa lea na fai e Campbell, auā sa alofa ia Samoa ma manao e faamafolafola mea uma o loo alu ai le afu o le toatele e saili auā se lelei o le atunuu atoa.
Na faamaonia e Campbell lona alofa fia fesoasoani ia Samoa, ina ua tulai mai le faafitauli na tau lavelavea ai le aulakapi a le atunuu, le Manu Samoa i se tasi o ona tama taalo na faasala i sana gaioiga lē atamai a o faagasolo le taamilosaga o le Ipu a le lalolagi i le 2010, ma tulai mai ai le salatupe e tatau ona totogi e $10,000 tala.
Na taulamua Campblell ma lana vaega, faatasi ai ma isi tamafanau a Samoa i le faiga o se sailiga seleni, na fai ai se papakiū sosisi ma faatau atu, ma na telē se fesoasoani i le kavaina o le sala tupe a lenei foi alo o le atunuu tainane le fesoasoani ai i le Manu Samoa i lena taimi.
Ae o le a sili ai ona lē faagaloina e Samoa lenei alii faasalalau i lona taulamua i le osofaia o le pulega a le Iuni lakapi a Niu Sila, mo se avanoa e tatau ai ona faia sa latou taaloga faitaulia ma le Manu Samoa i le malae o le Manu i Apia.
E umī le lisi o mafuaaga na otooto e Campbell i le pulega a le NZRU ua matuā tatau ma onomea ai le faia o se taaloga a nei atunuu e lua, o atunuu e faamemelo i le lakapi mai lava i le pepe meamea e oo i le tamā ma le tina ua pulapulalagoto le soifua, pe a fua ia Amerika lea na alu i ai le taamilosaga a le Olopeleki, ae toetoe o tagata uma na fesiligia e le Campbell Live i lena taimi e latou te lē iloa poo le ā lea aulakapi o le All Blacks ae poo fea foi e o atu ai.
O le iuga o lena taulu‘ilu‘i a John Campbell, o lea ua sauni mai le Manu Samoa faatali le taunuu atu a le Olopeleki mo le la taaloga faitaulia o le a faia i le Apia Park i se aso o le masina o lumanai nei o Iulai.
O se mea silisili lenei ua faia e John Campbell mo Samoa atoa, auā o le a faamauina i le talafaasolopito o lana lakapi, le uluai ulufale atu i Samoa o le aulakapi numera tasi a le lalolagi, e faia se taaloga ma lana aulakapi le Manu Samoa, aemaise foi se seleni tele o le a maua faafuasei ai e le malo i lena taimi mai le faitau afe ma afe o le a gasolo atu i Samoa mo lenei taaloga maoae.
I luga o le fesootaiga i le facebook, o loo faagasolo ai ni talanoaga a nisi foi o tamalii o Samoa o loo aumau i Niu Sila, e foliga mai o loo iai sa latou faaaloalo, o se taumafataga i aga ma tofo faasamoa, o loo fia faia faapitoa mo le susuga John Campbell ma lana vaega galulue, e faailoa atu ai le agaga faafetai o Samoa uma i ni ana foi galuega lelei sa faia mo le atunuu.
E lei faamautinoaina lena fuafuaga, ae o le a logo logo atu lava le mamalu o le aufaitau pe afai ae taunuu ma le taimi foi o loo fuafua e faataunuu ai.
