(L-R) Ta’uo Emile, Rev Niuia Ulugia Sauafea (Failautusi Aoao), Rev Petaia Setu (Taitaifono), Toeaina Rev Dr Vili Iosua, Toeaina Rev Malaefono Pritchard, Faumui, Misa Viali Stan Lesa

(L-R) Ta’uo Emile, Rev Niuia Ulugia Sauafea (Failautusi Aoao), Rev Petaia Setu (Taitaifono), Toeaina Rev Dr Vili Iosua, Toeaina Rev Malaefono Pritchard, Faumui, Misa Viali Stan Lesa

O le mae’a ai o le Koneferenisi a le Ekalesia Aoao Metotisi Fou a le Atua i lona Laumua i Vaitele i Samoa, na faauuina ai mo le uluai taimi nisi mo le galuega Faamisionare a le Ekalesia. O i latou ia e aofia ai le susuga i le Failauga ia Misa Viali Stan Lesa, Misa Lotovale Faafeii ma Ta’uo Ta’uo.

O se faatofalaiga na tofa iai le susuga i le Taitaifono o le Ekalesia Aoao ma le vasega o Toeaiina o Faasinoti Taitasi o le Koneferenisi. Ae ua o se finagalo foi e lei a’e fua, pe a fua atu i le vave ona tali mai o le Atua i lea fuafuaga.

O le taliu mai ai o le usugafono o le Koneferenisi, ae to’ai mai loa ma le telefoni mai nisi o aulotu i le setete o Kuiniselani, ona o lo latou fia malamalama atili i le uiga o le Ekalesia Metotisi Fou a le Atua, e pei ona latou faitau iai i le nusipepa.

I se finagalo o le susuga i le Toeaina o le Faasinoti a Ausetalia ia Dr Vili Iosua ma alii Misionare, o lea na malaga atu ai loa le Toeaina ma le alii Misionare ia Misa Viali Lesa, ina ia feiloai ma ia aulotu ma faamalamalamaina le Auga ma le Autu o le galuega a le Metotisi Fou a le Atua.

I le mae’a ai o lea fesilafa’iga, na tatalo ai loa aulotu nei, ina ia taatia atu le mataupu se’i soalaupuleina e o latou aiga lotu, ona toe logoina mai lea o le Toeaina ma alii Misionare i se faaai’uga o le a faamautuina i ia feiloaiga.

O le taeao lava o le aso na sosoo ai talu mai le vaiaso o lea uluai feiloaiga i Kuiniselani, na toe valaau mai ai loa le susuga i le Taitai o le aulotu a Ipswich e faailoa mai ai le talisapaia e aiga lotu o le faavaeina loa o le galuega ma le Ekalesia i le Faamalu o le Metotisi Fou a le Atua i le Lalolagi.

O le Aso Toonai 15 o Setema 2018 na to’ai taunuu ai loa le Taitaifono ia Rev Petaia Setu ma lona faletua, ae faapea foi le vasega o le Au Toeaiina o Faasinoti a Niu Sila ma Ausetalia, ma feiloaia loa ma le galuega fou ma amataina ai loa nisi o a’oa’oga ma faamalamalamaga, i uiga o le Faavae o le Ekalesia Aoao, aemaise o ana aiaiga faamau o le faagaoioiga o le Feau ma le Galuega a le Atua e tusa ai ma le faasinomaga o lona Faavae ma le Galuega.

O le Aso Sa 16 o Setema i le itula e 10.00 i le taeao, na tauaofia ai loa le Aiga Fou o le Atua, faapea Taitai o le Ekalesia ma aiga ma paaga, e latou te molimauina le uluai fatu o le Galuega ua totoina i Kuiniselani, e ala lea i le Sauniga Lotu Faapitoa.

O le susuga lava i le Toeaina o le Faaasinoti a Ausetalia i le ia Dr Vili Iosua na ia taitaiina le sauniga, ae lagolagosua iai le Au Toeaiina ma le Failautusi o le Ekalesia Aoao, le susuga ia Rev Niuia Ulugia.

O le Taitaifono ia Rev Petaia Setu na ia fofogaina le Lauga ma le Upu Folafola, ma faapea foi ona ia faapaiaina ai loa le susuga ia Iosefatu ma le faletua e la te tausiaina le galuega, seia aulia lo laua faauuina aloaia i le tofiga Faifeau Tausinuu i le Koneferenisi a le Ekalesia Aoao i le isi lua tausaga o lumanai i le 2020. Na faapaiaina ai foi ma susuga i Failauga e toatolu e faapea foi ona faato’a faapaiaina taualoa i Tusi Tofiga i le Koneferenisi lava o le 2020. O se tasi o aulotu i Kuiniselani, sa auai faatasi ai ma lo latou faifeau i le Sauniga Lotu lea, o loo tuuina atu pea iai le avanoa e mafaufau atili ai, ona logoina ai foi lea o le Toeaina o le Faasinoti a Ausetalia mo le faamoemoe lava e tasi, pe a taoto iai so latou finagalo mautu ma le autasi.

O le Osiga Feagaiga faale-Metotisi Fou a le Atua, e ese mai Osiga Feagaiga o loo faia nei e le EFKS, Metotisi, Katoliko ma nisi foi Ekalesia. Ae o aga ma le Faavae o le Metotisi Fou a le Atua, e faia le Osiga Feagaiga a le Faifeau ma le Aulotu, o le Ta’utinoga e faia i lo latou va ma le Atua i le Sauniga Lotu o le Aso Sa.

E leai ni femolia’iga o tupe ma toga ma palapalamalo. O lona Faavae o le Sauniga Lotu ma le Ta’utinoga i le va o tagata lotu ma le Faifeau ma le Ekalesia Aoao i luma o le Atua. A mae’a le sauniga, o le a lava se iputi ma se sanuisi e tapenaina e faailogaina faatasi ai le galuega fou o lena lava. Pau o le vaega e vaaia o nai teutusi mai isi aulotu e faimeaalofa ai auā le amataina o le galuega tau amata, ae leai ni faaaloaloga faaleaganuu e faia ai.

Na pau foi lea o se vaega na tapuaao iai le faifeau ma lona faletua ma le aiga lotu, ua na’o se taumafataga na talisua faatasi ai i lea aso ina ua mae’a le Sauniga paia o le aso. Ae faapea foi sui o aulotu taitasi sa faaleoina a latou meaalofa mo le Ekalesia fou, ona saunoa lea o Faumui mai Niu Sila e faafetaia le agalelei e ala i le taumafataga matagofie.

Sa saunoa foi le susuga ia Iosefatu e fai ma sui o le laua aiga ma le faletua ia Faasu Tafa ma si a la aulotu, e toe faafetaia ai le galuega a le Taitaifono ma Toeaiina, aemaise lava i le vasega o Misionare ona o le taunuuga lelei ua iai nei mo latou. O loo iai foi le faamoemoe o le a faia pea ni mafutaga faaleaiga o le Atua a le Faasinoti a Ausetalia i le agai i luma.

O ē na malaga mai mo le faamoemoe; Rev Petaia (Taitaifono) & Faletua ia Sosefina Setu (Samoa), Rev Niuia Ulugia Sauafea (Failautusi Aoao), Toeaina Rev Malaefono Pritchard & Faumui (Faasinoti Niu Sila), Toeaina Rev Dr Vili Iosua & Faletua ia Folose Iosua, Misionare Misa Viali Stan & Faletua ia Maima Faatoga Lesa, Misionare Ta’uo Emile & Faletua ia Anita Ta’uo, ma Misionare Misa Lotovale Faafeii (Failautusi Campbelltown).