Malo faaaloalogia, Faaao o le A’oga ma i latou sa fai sao i sauniga o le faauuga a le “Ia Malamalama Agape Bible College”

Malo faaaloalogia, Faaao o le A’oga ma i latou sa fai sao i sauniga o le faauuga a le “Ia Malamalama Agape Bible College”

“Ia Malamalama Agape Bible College” Logan City & Deception Bay

Ua i’u le tausinioga ae lē o le mutaaga lea. Ua mae’a se isi laasaga ae o le amataga fou foi lea o se isi sitepu. O le tauina o le taua faaleagaga, pologa, afu sisina ma gapatia i le ao ma le po, ona o le suesueina atili o Afioga Mamana a lo tatou Atua. E pei ona televavave ma saosaoa aso o le olaga ua tatou iai i lenei vaitau, ua faapea lava le leai o se toafilemu i se tagata e tauina le taua o mafaufauga.

E leai se vaipanoa o le loto, agaga ma le mafaufau e avanoa auā ua lē gata o le aiga, lotu, galuega ma isi lava tuatuagia, ae o se faaavanoa foi o taimi e suesue ai Afioga Paia a le Atua. Soo se tagata lava e galue malosi, finau, sogasoga ma faamaoni, e tauia ana galuega i se tali e iloga ona faafiafiaina ai, e le gata o si ona aiga, nuu ma le ekalesia, ona o nei avanoa faaauro e saili ai le Tusi Paia auā o le ‘auga lea o le manuia atalī o loo tausinio iai tagata ola uma. “O le lu’itau o le a’oga faale-Tusi Paia “Ia Malamalama Agape Bible College”, e lē o se lotu poo se ekalesia a ia faaaogāina soifua e tapena ai mo soo se valaauina ma a’oa’oina i Afioga Paia a le Atua a’o maua le soifua ma le ola ma maua avanoa i lenei olaga faigata ua fetuleni solo mai ai autau a le fili, luga, lalo, Sasa’e, Sisifo, Matu ma Saute. Ae o le tala moni afai e tumau se tasi ma latalata i le Atua e ala i le taumafa pea i upu o le ola, e matuai fiu le fili e talole solo e lē mafai ona maluelue.

Atonu foi fai mai manatu o isi “e faigofie  ona lue e le tiapolo le tagata e latalata i le Atua, ae fuafua lava i le ituaiga tagata ma lana auaunaga”, o se finagalo faaalia lea o le sui Peresetene, le afioga ia Toleafoa Papalii Poulava Sam Matautia i se faatalanoaga ina ua mae’a ma tini lau o le faamoemoe i le Aso Toonai na tea nei. Sa lei maua sona ata ona o le pisi i le tapenaina o le fofoga taumafa (Uncle Sam’s Takeaway), o ia foi sa fai ma fofoga o le faamoemoe e faafeiloai le paia ma le mamalu o Samoa, na tu tootoo foi auā faaaloaloga o le aso.

O i latou ua faamanuiaina i le vasega faai’u maua faaailoga o le BA ua iu manuia o latou taumafaiga faapea Faaao, Peresetene, faifeau ma faiaoga (le o auai Toleafoa Papalii Poulava Sam i se ata ona o le pisi)

O i latou ua faamanuiaina i le vasega faai’u maua faaailoga o le BA ua iu manuia o latou taumafaiga faapea Faaao, Peresetene, faifeau ma faiaoga (le o auai Toleafoa Papalii Poulava Sam i se ata ona o le pisi)

Ua atoa le 4 tausaga o saili le poto ma le atamai e ala i le faaailoga o le BA e pei ona finau iai nisi o lenei A’oga, “Ia Malamalama Agape Bible College” i Logan City faapea Deception Bay i Brisbane. O i latou sa faau’u mai i faailoga o le BA e aofia ai le faletua ia (1) Bessie Hytongue, (2) Belinda Misa, (3) Eleanor Misa, (4) Ps Faiumu Tala’i Faapito, (5) Ps Kilisimasi Hytongue, (6) Lona Mata’utia, (7) Ps Litisone Ah Sam, (8) Nofoa P Loia, (9) Ps Paovale Mateai, (10) Tauveve Campbell.

O le faaailoga o le AA ua atoa le lua tausaga sa faamanuiaina ai i latou  e aofia ai (1) Faalupega Tofa, (2) Maria Lale, (3) Metotisi Laloata, (4) Sulesa Togia, (5) Talalelei Togia, (6) Tuugasala Muaulu, ma (7) Vaiola Amituanai.

O nisi na faamanuiaina i le tausaga muamua e aofia ai (1) Colleen Lawrie, (2) Ps Eneliko Mago, (3) Faalogo Tiavaseu, (4) Josephine Hytongue, (5) Julia Moli, (6) Mere V  Young, (7) Misa Tutonu Toomata, (8) Ruth Cook, (9) Silaloata Sopoaga Tofa, (10) Siolovalu Toomata, (11) Sootaga Luatua, (12) Ps Sydney Tauti, ma (13) Tau Faimalo.

 Faaao o le “Ia Malamalama Agape Bible College”, ma le ofisa faapea le vasega a le AA faauuuga sa faia i Brisbane

Faaao o le “Ia Malamalama Agape Bible College”, ma le ofisa faapea le vasega a le AA faauuuga sa faia i Brisbane

O i latou uma nei sa a’oa’oina i le A’oga i Logan City faapea se vaega mai Deception Bay. E tusa ma le 31 tamaiti aoga sa faauu i le Aso Toonai 22 o Setema, lea sa faatumulia ai le sauniga sa faia i le malumalu a le Ekalesia Samoan AOG i Inala, (faafeagaiga ia Ps Amataga ma le faletua ia Faye Tamamasui).

Na mae’a ona see atu lea i le hall a Musalemi mo le taumafataga ma e lata i le afe i latou sa auai e faaailoa lo latou agaga mitamita ma le faagaeetia i o latou aiga sa faamanuiaina mai le A’oga a le “Ia Malamalama Agape Bible College”.

Na maualuga le aso i saunoga ma faamalosiau mai ana auauna faaao o le Aoga sa auai le susuga ia Dr Peniamina Williams mai Niu Sila  faapea Dr Ieti Mageo mai Hawaii, faapea foi Dr Seuga Aumua (AIM Logan City). O nisi foi o Peresetene a le “Ia Malamalama Agape Bible College” sa fai sao i sauniga o le faamoemoe e iai ia Ps Lea’ega Fialelei mai Sini,  Ps Lo’i Oofu mai Melepone,  Ape Talosaga Ueligitone, faapea le susuga i le Aposetolo Joshua Asafo taitai aoao o le Hosanna Brisbane Church sa auai ma le faletua ia Helen Avia. E toatele nisi o malo faaaloalogia sa auai, faapea faafeagaiga ma faletua aemaise o  tau ‘aiga, uo ma e masani o le aufaauu.

O le Ofisa o le A’oga i Brisbane o tu mai le foe:

Peresetene: Ps Fereti Purcell

Sui Peresetene: Toleafoa Papalii Poulava Sam Matautia

Failautusi: Iosefa Collins

Teutupe: Rev Talavou Poasa

Peresetene (Deception Bay): Ps Toluono Li’o

O le a logoina lava le aso e toe a’e ai le a’oga mo le isi kuata faapea  i latou e fia ulufale ma faaauau suesuga faale Tusi Paia ma  fesootaiga, valaau  mai Ps Fereti Purcell poo Toleafoa Papapalii Poulava Sam i le telefoni 0421 803 126.

Ua toe taliu i fanua le toatele o le auvalaaulia faapea Faaao o le A’oga na malaga mai, e foi lava le faafetai i le Tupu o Tupu i le lagi, ua iu ai ma le manuia mea uma.

Malo tauivi! Malo finau mo le sailiga o fetu i tou pale! Viia le Atua.

Le vasega sa suesueina Tusi Pasi faapea Dr Peniamina Williams, Dr Ieti Mageo, peresetene ma le ofisa

Le vasega sa suesueina Tusi Pasi faapea Dr Peniamina Williams, Dr Ieti Mageo, peresetene ma le ofisa