Tetee le auuso i moliaga, ma tatala ai i tua

David ma Richard Burgess o loo talanoa i le la loia
David ma Richard Burgess o loo talanoa i le la loia

E ui  i le tele o lipoti tusitusia faasaga i le auuso faipisinisi i Samoa, e aofia ai ma le faapea na faatietie mai i le tipoti mai Amerika ona o soligatulafono na laua faia i lea atunuu a’o nonofo ai i le silia i le 10 tausaga talu ai, peitai  e lei avea lena ma mafuaaga, e teena ai e le tamaitai faamasino o le faamasinoga maualuga, Tafaomalo Leilani Tuala Warren le talosaga a le loia o loo tulai mo David ma Richard Burgess, e tatala i tua e faatali ai le aso o le la faamasinoga.

O David ma Richard Burgess, o le auuso lea o loo tuua’ia i le soligatulafono o le gaoi matautia, atoa ai ma le faaoolima lea i se alii palagi faipisinisi ua tele tausaga o nofo i Samoa Mr David Main.

Ua laki e lei uma le ola o le alii faipisinisi i lea faalavelave, ae ua totō i le fatu o Main, lagona o le fefe ma le mata’u, aemaise lagona o le lē toe fia foi iai talu ona faaoolima ia te ia ni tagata i le taulaga.

O le faalavelave lea na tupu latalata ane i le faleaiga o le McDonalds i Apia.

Ma e faapea lipoti, na fasi le alii faipisinisi, ona faataatia ai lea, ae sosola tagata na faatinoa le solitulafono i le taavale ma ave nisi o mea totino a Main. Ma faatoa maua mulimuli ane e leoleo le taavale a Main i Vaitele.

Ae na faaalia e le tamaitai loia o loo tulai mo David ma Richard Burgess, o Theresa Momoisea, o le ofisa Loia o Stevensons i Apia, e na te finauina lava e sa’o ma faamaoni faamatalaga a Richard ma David ua tuuina atu ia te ia, e la te lei faataunuuina le soligatulafono e pei ona tuua’ia ai laua.

Saunoa foi Momoisea, o le taliaina e le faamasinoga o le tatala i tua o i laua ua tuua’ia nei, ua lagona ai lona fiafia, ona fai mai e lei faia e Richard ma David le soligatulafono.

Ua talafeagai lelei le talia e le faamasinoga o le tatala i tua oi laua ua tuua’ia ma le talosaga na talosagaina ai e Richard le Faamasino Sili ina ia tatala i laua i tua ma ni tuutuuga ona e fai uma a la pisinisi, ma e moomia le fia feiloai ma faafesootaia a la paaga faapisinisi e faailoa iai le mea ua tupu. O le mataupu lenei, na muai fofogaina i luma o le Faamasino Sili, Patu Tiavaasue Falefatu Sapolu ona faasee ane lea e fofoga i luma o le alii faamasino o Leiataua Daryl Clarke, peitai na toe faasee ese ma Leiataualesa ma avatu i le tamaitai faamasino, Tafaomalo Leilani, ona e masani lelei Clarke i lē ua aafia. I le folasaga a le tamaitai faamasino, e fua i folasaga a tamaitai loia o loo tulai mo leoleo ma le loia a le auuso, na manino ai le atugaluga o loo atugalu ai le itu a leoleo, ma lo latou teena o le talosaga e tatala i tua le auuso.

O le finauga a leoleo, e tatau ona silasila le faamasinoga oi laua o loo tuua’ia nei, na tipoti mai Amerika ona o le soligatulafono lava e tasi o le faaoolima, ma e lē saogalemu le tatala i tua mo le atunuu.

Peitai na finau malosi le tamaitai o Momoisea i lana folasaga tusitusia, talu ona tipoti mai i Samoa le aualii ia, e la te lei solia lava le tulafono.

E lē gata i lea ua fai a la pisinisi, ma ua tele a la galuega lelei ua fai mo tagata lautele.

Na finauina foi e Momoisea e faapea, o le a auiliili i le aso o le faamasinoga le mau, maumaututu, a se tasi o ana molimau o loo ia faamaonia ai, o le taimi ma le po lea na tupu ai le faalavelave, sa i le fale David ma Richard.

O le faaiuga ua tatala i tua i laua e faatali ai le aso o le faamasinoga, i tuutuuga masani o le taofia o pepa malaga, ma le faasā ona latalata i lē ua aafia.