Tialavea Tionisio Hunt Minisita o tupe maua

Tialavea Tionisio Hunt Minisita o tupe maua

I le sefulutasi o masina talu ona amata totogi lafoga a susuga i faifeau o loo tausia aulotu a ekalesia eseese i Samoa, o aulape o le tulafono o lafoga totogi ua molia ai uluai faifeau e toavalu o le Ekalesia Faapotopotoga Kerisiano Samoa. E lē o toe pogisa le atunuu i le mataupu lenei ma le teena e le fonotele i Malua i le tausaga nei o le totogi o ni lafoga a faifeau tausi nuu.

O lea teena ua toe faatali ai i se finagalo o le fonotele i Malua o le tausaga fou 2019. Peitai ua  faatino nei e le ofisa o lafoga i le Matagaluega o Tupe Maua le malosi o le tulafono ina ua molia  faifeau muamua e toavalu o le EFKS. Ua faaalia e se ofisa sinia o le matagaluega o le vaiaso na tea nei na amata ona faaulu ai i le faamasinoga moliaga ae ua lē mafai e le ofisa sinia ona faailoa suafa o faafeagaiga ua molia.

O le laasaga lea ua oo nei iai le finauga a le ekalesia ma le Malo i lafoga totogi a faifeau tausi nuu, ina ua mae’a le laasaga muamua na faia o le aveese mai o tupe mai teugatupe a faifeau i faletupe faapisinisi e totogi ai a latou lafoga. Na faaalia e le Minisita o Tupe Maua e mae’a loa le gaioiga lea ona faia lea o moliaga, ae e mafai foi ona oo le malosi o le tulafono i le aveese o meatotino e pei o taavale.

O le vaiaso nei o loo toe faasolo ai le faia o moliaga o isi faifeau EFKS ma o loo faasolosolo ona e lē mafai ona faatino i se aso e tasi lea galuega ona e fua i galuega a le ofisa o faamasinoga. Na fesiligia se tasi o faafeagaiga o lea ekalesia o loo tausi nuu i sona finagalo e tusa o le tulaga ua molia ai i latou i le lē totogia o lafoga a le Malo. “Ou te lē manao e faailoa lo’u igoa, ae o a’u o lea e totogi la’u lafoga ona ou te lagolagoina le finagalo o le Malo. E lē faia so’u manatu i faifeau e lē o totogia lafoga ona o le latou lava lena faitalia”.

O se finagalo o Tialavea i se lipoti i le Aso Toonai ua mavae o loo ia toe faamamafa ai le leai o se foi i tua o le finagalo o le Malo i le faatali se’i maua se finagalo o le ekalesia EFKS e pei ona toe ave ai le mataupu i se finagalo o le Fonotele o le tausaga fou.

O lafoga e totogi e faifeau tausi nuu e aveese mai tupe o loo latou maua i taulaga o le alofa poo le peleti. O tupe ia e maua i totonu o le tailua vaiaso o le masina.

O loo fua le lafoga e totogi i le aofaiga o le tupe o le alofa e maua i masina e 12 o le tausaga. O faifeau ei lalo ifo o le $15,000 le tupe maua o le alofa i le tausaga e lē totogia se lafoga.

E faatoa agavaa se faifeau tausi nuu i le totogi o lana lafoga pe a sili atu ma lea aofaiga le tupe maua i le tausaga.