Ua suesueina e le Matagaluega o le Soifua Maloloina i le vaega o le tumama lautele poo le Public Health pe iai nisi o le atunuu na faatauina araisa o se uta o araisa a le kamupani siiatoa a Ah Liki lea na faia le faaiuga e lafoai ona ua leaga ma manogi le lelei, ae na maua ua toe faatau e nisi o le aufaigaluega a le kamupani siiatoa. E 1,212 taga araisa o le ituaiga o le Island Sun na aumai i se tasi o pusaoloa poo container na aafia i lea tulaga, lea na logoina ai e le kamupani siiatoa le matagaluega a le falemai mo se latou suesuega. Faaalia e le alii ofisa suesue sinia o le vaega o le Public Health o Seve Sinei Sili, na faia lana faatonuga e ave uma taga araisa e lafoai ona e aafia ai le saogalemu o le soifua o tagata pe a faatau. “Sa ou iai i le tanuina o taga araisa ma sa eli lava e le masini a le Ah Liki le pu ma lafoai uma i ai taga”… o le saunoaga lea a le alii ofisa.
Peitai na tei le alii ofisa ina ua faailoa i ai e le tusitala o loo suesueina e leoleo nisi o le aufaigaluega a le kamupani oloa siiatoa ona ua latou toe eli le lua ae ave nisi o taga araisa na lafoai ua toe faatau i nisi o faleoloa laiti i nuu ma afioaga i le talafatai o Apia. Faaalia e Seve e lei logoina i latou i lea tulaga, ae o le a agai loa e suesue ina nei faatau e nisi ona aafia lea o lo latou soifua maloloina. Na faamatala le alii ofisa e faapea o se pu i le pito i luga o le pusaoloa poo le container ua sao i ai le vai ma mafua ai ona sao i ai le lago ma ola ai le ilo ma aafia ai tagata araisa i se manogi matautia e le fia latalata i ai se tagata soifua. O lana tala o le pogai lea o le ave uma o le 1,212 taga ua tiai ma tanumia i le lua.
Suesuega a leoleo
Na faamatala se tasi o faioloa (taofia le suafa) na tei ina ua tu atu le taavale a leoleo ma fesili pe sa ia faataua ni taga araisa mai ni alii sa malaga i se taxi. Na ioe i ai le faioloa ma ia toe faafoi loa i ai ana taga araisa e lua. Faaalia e le Komesina lagolago o Leoleo, Papalii Li‘o Ta‘eu Masipa‘u, e toatolu alii faigaluega o le kamupani oloa siiatoa ua molia i le gaioiga, ae toafa i le ave taxi na faafoeina le taavale na alu ai le faatauga taga araisa. O suesuega foi ua maua ai e na o le 29 taga na faatau ma na pau lava lea. Ssa saunoa foi le alii Komesina lagolago o nisi taga na maua atu ua fua i taga pepa iila laiti ae e lei faatauina i tagata, ma na toe ao uma e leoleo ma ave e lafoai ona ua faaletonu. E ui ua taofia nei taulelea e toafa i le faia o lea solitulafono o le toe faatau o ni oloa ua faaletonu, ae o loo suesueina pea e leoleo le mataupu.
O le faamatalaga a le faioloa na toe ave ana taga araisa e lua e leoleo, e $60 tala i le taga na faatau atu ai e alii ua taofia nei e leoleo. E le o iloa pe na faapefea ona iloa le gaioiga a ia taulelea, ae na faaalia e le alii ofisa o le matagaluega o le soifua maloloina o le aso 12 o Iuni na tanumia ai taga araisa o le faaletonu ua aafia ai. Peitai na faaalia e le Komesina lagolago o le Matagaluega o leoleo, o suesuega a leoleo ua maua ane ai, o le va o le aso 20 ma le aso 21 o Iuni 2009 na faatino ai le faatauga taga araisa a i latou ua taofia nei ma molia e leoleo. O lona uiga e foliga mai e fitu aso talu ona tanumia taga araisa, ae osofai loa le lua na tanu ai, ma toe eli ane ai i luga taga e 29 ua toe maua nei. O loo talosia e le vaega o le soifua maloloina lautele e na o le pau lea o taga na faatau. Ae peitai na saunoa mai Seve i le tusitala o le a toe agai e eli i luga le lua na tanumia ai le 1,212 taga ma faitau pe moni faamatalaga a i latou ua molia na pau ia o taga na latou tiliva atu ma faatau i nisi o faleoloa laiti.
Fai mai leoleo o faleoloa i nuu e pei o Ululoloa, Tuaefu, Matautu-Uta i Apia, Vaipuna, Moataa ma Fagalii na faatau i ai taga araisa manogi leaga. E iai le talitonuga o taga sa lelei lava i le silasila faaletagata na faatau, peitai o le tala a le susuga Seve pe sefulu lava tagata na aafia i le faaletonu e ave uma ai lava le uta na aumai e lafoai ona ua aafia uma lava i siama e lepetia ai le soifua lelei o tagata pe a taumamafa ai.
