O le faamasinoga ua atoa le vaiaso talu ona faia suesuega e ala i molimau, peitai, na faateia le afioga i le Faamasino, Patu Tiavaasue Falefatu Sapolu, i le faailoa mai e le susuga i le alii loia, o le na tulai mo le ua molia, Lucky Nauer o Lotopa, le susuga Toleafoa Solomona Toailoa, o ia o le a le toe tulai mo Lucky Nauer, talu ai e le o talia e lea alii lana fautuaga. O le saunoaga lea a Toleafoa Solomona Toailoa, a o faatali le faamasinoga mo le taimi o tolaulauga faaiu a loia a itu e lua i le aotelega faaiu o molimau o lenei faamasinoga.
O lea faamasinoga ua faaleaogaina uma ona suesuega, e mafua mai i le suesueina o le maliu o le alii o Faleni Viavia o Laulii, i le aso 28 o Ianuari 2006. Mo le silafia e le mamalu o le atunuu, sa tulai le toalua o lea alii, le tina o Tuvaetasi Nauer, mo lana molimau e uiga i le mea na tupu. Na ia taua o le aso lea sa latou o ai i Satapuala i le latou aiga a o nonofo ai i lea tausaga (2006).
Sa nonofo i luma ma lona toalua, ae o tua o loo nonofo ai lona uso ma le la fanau e toatolu. O le taunuu o le latou taavale i Faleula i le faleaoga o Siaosi Palauni, na latou pasia ai loa le taavale a nei alii, o loo iai ma Faleni Viavia. Sa taua e Tuvaetasi, e lei umi lava ae sosolo ane loa le taavale a nei alii i le itu sese o le auala, ma faaleagaina ai autafa o le latou taavale i le itu o loo nofo ai.
Sa ia vaaia i lea taimi le taavale a nei alii ua tasoa mai tua o le latou taavale, ma tauai le latou taavale i atigifagu. Na tau fai saoasaoa uma taavale nei e lua, ma faia lava nei gaoioiga. Taua e Tuvaetasi, na toe liliu le latou taavale i Malie ma toe agai loa i Apia. Sa ia vaai atu ua toe sau foi le taavale lea a nei alii ma tuli mai le latou taavale, ma faia lava le mea lea o le tasoa o le latou taavale.
Na ia faaalia, na oo atu i Vaitele i le auala agai i uta i le kamupani a le Yazaki, ma afe ai loa le latou taavale. Sa tu le latou taavale, ae alu atu lava le taavale a nei alii ma soa le latou taavale ma mafuli ai loa. O lea taimi ua feei lana fanau ma ua opo ane e lona uso. E tu atu i luga ae tu i le manava o lona toalua. O le oo ane la a nei alii, sa faapea ona latou tauaia ai loa le latou taavale i maa. Na te lei iloa lona toalua i lea taimi, na o le isi alii na sau ta lona ulu i le atigi faguinu, ae futi e le isi alii le ulu o lana tamateine matua. Sa ia faalogoina loa i lea taimi le pa o le fana.
Sa fesiligia ai loa e le loia a le Malo, Leslie Petaia lea tina, poo fea na faapa i ai le fana, ae na ia taua, sa faapa agai i luga. Sa teena foi e Tuvaetasi le fesili a le loia a le Malo lea sa ia taua, e le o le mafuaaga o le faalavelave o tuuga taavale poo le tipi poo le pasia o le latou taavale e le taavale a nei alii.
O le alii leoleo satini sinia, Iosefo Tofaeono sa feagai ma le suesueina o lea mataupu. Sa ia faaalia ai, e taunuu atu o taatia mai le ua maliu i le auala i Vaitele na tupu ai le faalavelave. O lea alii na ia vaaia ni manua i luga o lona ulu, ma sa ia vaaia i lea taimi ua maliu lava.
O le aso 9 o Fepuari 2006, na suesueina ai Lucky Nauer, ma ia ioeina ai o le fana o loo i le fale o lona uso. O lea tamai fana o le ituaiga 38, ma e ono pulu e utu ai. A fana pulu o lea fana e alu taitasi i fafo pulu, ma e seiloga lava e amoki ona faatoa pa lea o le pulu e tasi. O lea foi ituaiga fana, e le mafai ona faatagaina i Samoa, ma e le mafai foi ona laiseneina.
Faaiuga a le faamasinoga e soloia le faamasinoga atoa
Ua ese le tulaga ua oo i ai le faamasinoga, o lea ua faatali o le vaega e sosoo ai o tolaulauga mulimuli a loia, ae peitai ua tulai le loia a le ua molia, Solomona Toailoa, ma faamavae mai lona tauaveina o le itu a Lucky Nauer.
E mafua ina ua le talia e lea alii se fautuaga a lana loia, Solomona Toailoa, mo le fia faia o sana molimau. Sa faailoa atu e Solomona i afioga i faatonu ma le afioga i le Faamasino Sili, o loia latou te faia fuafuaga poo a molimau e moomia, ma le le moomia, ae fua foi nei molimau i molimau a leoleo ma le vaega o le tulafono. Faaalia e Solomona, o lea la o le a see ese ia, ae finau pea e ia lana mataupu i lana lava aia tatau.
Fia moomia se loia faamaoni
O se mataupu sa tau faamalamalama e le afioga i le Faamasino Sili, Patu Tiavaasue Falefatu Sapolu, ina ua faaalia e Lucky Nauer, na te fia moomia se loia faamaoni e tulai mo ia. Peitai sa faailoa e le faamasino sili, e lelei uma loia ma faamaoni ae ona o le malosi o le mau a lea alii, e le gafatia ona ia faatupeina le totogi o le loia.
O se mataupu maaleale, ma o se mataupu tuga foi ona o le matuia o le moliaga o lea alii, o le fasioti tagata faamoemoeina. O le iuga o lea mataupu, ua finagalo le faamasino, e totogi e le malo se loia mo Lucky Nauer. O le vaiaso nei, o le a toe amataina ai taualumaga fou o le faamasinoga lenei. O le a toe amata fofoga ai molimau fou, atoa ma le loia fou.
