O le afioaga o Sasina i Savaii na muamua oo i ai le galuega fesoasoani a se vaega o le fitafita o le sami o le Malo o Amerika o loo i Samoa e pei ona toe faafou ai le faleaoga tulagalua o lea afioaga. O le vaiaso nei e tatau ona maea ai le galuega a o lei toe tuua Samoa e le vaa i le Aso Faraile 10 o Iulai 2009. O le tasi vaega tele o le fesoasoani o togafitiga faafomai e faia fua e leai se totogi e faapitoa i gasegase o fofoga poo mata, oloa poo nifo.
O loo silasila foi i nisi ituaiga o gasegase o le a maua i suesuega a alii ma tamaitai fomai o le fitafita, ma afai e manaomia se taotoga o le a faatino ai lava. O afioaga o loo afea i le fesoasoani e aofia ai Lalomanu i le atu Aleipata o le a agai i ai le atunuu o alaala i lea vaega o Upolu, faapea le falemai o Sataua i Savaii. O le faalapotopotoga foi o le Koluse Mumu le Red-Cross o loo agai i ai le galuega fesoasoani mo le faia o nisi galuega o loo manaomia e lea faalapotopotoga. Faaalia e se tasi o tama matua ua leva ona fia maua se fesoasoani i le togafitia o ona fofoga (mata) o se avanoa e le au maua mo ia o le a saili ai se laveai o lana vaai ua le manino lelei. E maua ai foi ma matatioata vaaiga mamao ma matatioata faitau tusi e leai se totogi.
O le faalua lea ona afea Samoa e lenei fesoasoani o se vaega o galuega faasamaria agalelei a le Malo tele o Amerika o loo faasafua atu foi i isi motu o le Pasefika. Faaalia e se sui o le fitafita o le sami a lea Malo le alii kapeteni o le manuao o le USNS o Richard E Byrd, o le latou misiona ua ave ai le faaamuamua i le va lelei o le Malo o Amerika e ala mai i ana tautua faavaegaau ma atunuu o le Pasefika o loo galulue faatasi ma le Iunaite Setete. O se tasi itu na ia faaalia, e faapea o le maea o nisi o galuega laveai na faatino e le fitafita mo nisi o atunuu na aafia i mafatiaga ona o galulolo na mafua ai ona ae se finagalo o taitai o lona Malo e faatino i tausaga taitasi nei fesoasoani.
Sa aloaia le amataina o galuega fesoasoani a lea vaega o le fitafita o le sami a Amerika i se sauniga sa auai le alii Palemia, susuga Tuilaepa Lupesoliai Sailele Malielegaoi, lea sa ia faafetaia ai ma le agaga fiafia le Malo o le Iunaite Setete. Sa ia afea ai foi le taua o le galulue faatasi o le Malo o Samoa ma atunuu o loo latou faipaaga e pei o Niu Sila, Ausetalia, ma Kanata o loo iai foi lo latou sao i le galuega ua faatino e le fitafita a lea Malo. O le sui o le malo o le Iunaite Setete i Samoa na ia fofola faiga faavae autu a lona Malo e fesootai ma le fesoasoani ua afea faalua ai nei lo tatou atunuu. E iai nisi o o tatou tagata sa togafitia i nisi o gasegase i le tausaga ua mavae, ua toe maua le avanoa e toe siaki ai o latou aafiaga poo tumau pea ona lelei atoatoa e pei o fofoga poo mata sa faia i ai ni taotoga faafomai.
