Na fiu le alii o Taio e tau faafetaui mai mata o le teine o Luama, ae ua matua faamautinoa e Luama, ia aua lava nei toe tilotilo i le itu lea na ia iloa atu ai le tau falō mai o Taio. Pe tusa ma le tolu ni minute o tau faatalitali pea Taio mo se isi avanoa e toe oo ane ai ia Luama, ae ua faigata lava ona o le toatele o le aiga o loo feiloai atu nei i le teine ma talanoa atu i ai.
O le toeaina o Sio na vave lava ona ia lagona le alofa i le teineititi ina ua fusi mai ia te ia, e pei lava o se tasi o lana fanau, ma sa mate uma lava le ulugalii, ua tagi masusu le teineititi ona e pei o lea ua toe feiloai atu i nai ona matua, aua e mafana tele le latou mafutaga. Ua tele ina taape atu tagata faatalivaa ae o loo tutu ai pea le aiga lenei i totonu o le fale ma talatalanoa laitiiti, ma auauai uma ane le fanau a le ulugalii e faamasani i lo latou tausoga lea ua sau latou te nonofo.
O loo vina atu lava le ulugalii i le la fanau e faatopetope le latou feiloai ae sei o i le taavale ai ua maalili si teine o Luama i le malulu, ae o loo solomua foi ia Luama le manao pea e talatalanoa ma fai ana fesili i le au faatalivaa. E leai ma se isi o le aiga o mateia le pogai o nei gaoioiga a le teine, o loo fia faamautinoa e Luama ua alu ese atu le alii o Taio, ina nei toe faasalavei ane lava i luma pe a o atu nei i le latou taavale.
O le mafaufau o le teine i lea taimi, o lea ua alu ese mai Samoa ma ua tulaueleele nei i Niu Sila mo le faamoemoe na tuua ai nai ona matua. Lona uiga ua tatau ona suia mea uma, ua tatau loa i mea uma sa fai i Samoa ona tuu ai pea i Samoa, ae sagai tasi atu i le aoga na ala ai ona sau. Talu ai sa fai lava sina umi o tutu le aiga ma talatalanoa, sa iai lava i le mafaufau o Luama, ua tatau ona alu ese Taio mai le malae vaalele aua ua leva ona savali ese mai fafo.
Na matua sese Luama aua o le mea lea ua tupu nei ia Taio, na taunuu atu lona uso laititi ma lana taavale, ona tuu lea i ai o le ki ae toe alu le tama. Peitai nai lo le alu loa o ia, ua sau lelei lava Taio saofai atu i totonu o lana taavale, ae maka uma atu gaoioiga a Luama ma lona aiga lea o loo fai. O lea ua oso lava Taio i lana taavale e na te lei maua se numera o le tuatusi o le aiga o Luama poo se telefoni foi. Ua tonu ai nei i le alii, o le a faatalitali sei o ese le taavale a le aiga, ona mulimuli lea e tau lava o lona fia iloa o le fale o le aiga, ona amata ai lea o ana sailiiliga faaleoleo nanā, atonu lava na te toe maua ai se fesootaiga ma le tausala ua faavalea nei i ai lona mafaufau.
Ua tele lava le faaletonu o le fika a Taio, ma ua tau oso ifo ai ma lona ita. O le mea foi ua tupu, ua fai le tonu a le toeaina o Sio, o le a o sao loa i le faleaiga o le Kentucky sei tofo Luama i le moa falai a le tamaloa fai‘ava ua logologoā lona igoa, ma na atoa lelei le itula o nofonofo ai le aiga iina ma aai. Na afe ai foi ma Taio ma faatalitali i le paka o taavale, peitai ua fiu le tama e faatali le taimi e o ese ai i fafo le aiga.
Ua oso ane foi mafaufauga faatiapolo ia Taio, ‘toe lava o lou lalaa loa i totonu ma fesili sao ia Luama.’ Peitai na toe mau manatu Taio atonu ua tau lona mafaufau i uiga tamalii o le tamaitai a o la talatalanoa mai totonu o le vaalele, lea ua toe suia ai nei ona mafaufauga le lelei na tau fatufatu ae. Ua sisii lima o Taio ma tonu ai loa i lona mafaufau, e sili ai le foi filemu o ia i le fale, atonu lava e iai se aso e toe feiloai atu ai ia Luama aua o lea o le a aoga i Niu Sila mo se taimi umi, ma afai o le a nofo i Magele, ona manatu lea o Taio, atonu la e aoga le teine i se kolisi o loo iai i Magele. Ae afai lava e le toe maua se isi a la feiloaiga, ia e sili ai loa le toe faafoi filemu o nai ona lagona i si ana teine afakasi lea o loo faatali atu.
A o Luama, ua ataata malie lona loto i le umi lea e feofeoai solo ai le latou taavale ma lona aiga fou o le a nofo ai nei i Aukilani, aua o lona uiga ua tatau ona leva ona oo Taio i lona aiga, ma lona le iloa o lea sa maka atu lava o ia e Taio i fafo. Ai ana iai se mea e toe sau faafuasei ai Luama i fafo i le latou taavale, semanu e maua taitaia e le alii sa mai valea atu i fafo. Peitai ua uma lava masalosaloga o Taio ona toe ki lemu lea o lana taavale, ma alu ese loa.
O le mea matautia lea ua atili faigata ai lagona o Taio, ona nai lo le ita i le mea ua fai e Luama ia te ia, ae ua atili ai ona faananau le alofa o Taio ma lona manaonao tele i lea tamaitai, ona ua ia mautinoa ai, o ituaiga o teine nei e le o toe mauagofie i nei aso, o se tamaitai e le avagagofie le loto. Aua e manatua e Taio le taimi na fai ai faamavaega a Luama ma i latou uma na o ane e faaee mai o ia, e talitonu Taio e iai se alii na ese ona foliga faanoanoa i lea aso ma atonu o se uo i le tamaitai. Ae na faualuga Taio, o ona foliga lalelei, ma nisi mea sa ia taumafai e faaofo ai le teine i totonu o le vaalele, e mautinoa lava e amata ai ona maluelue le loto o le tausala. Ae o lea la ua misi atoa na mafaufauga, ae le o tuu itiitia ai lona fia mafuta pea i ai, i lona talitonuga, afai ae ona maua le tausala, e le taitai ona toe popole pe masalosalo i le alofa faamaoni o lea tamaitai ia te ia. Ae paga lea, ua na o ni moomooga faivavale, ae ua mamao atu lava Luama i le vaai a Taio, lea ua toe faatutu atu nei le afi o lana taavale i le itu i sisifo i Aukilani.
Ua uma le tausamiga a le aiga, ona agai lea i le fale ma toe faaauau atili ai a latou tala agai i Samoa. Na matauina e le ulugalii e pei e le o atoatoa lelei le fiafia o le teine, ona fai lea o le tonu a le toeaina o Sio, ua tatau loa ona alu Luama sei fai sana moe leaga ua leva ona malaga mai le vaalele, ae faaauau foi isi fuafuaga a le aiga. Ua faigata ona moe si teine, ona e fai o lona misia o ona matua ma si ana uo pele o Pina, ae o loo felavasai foi i ona mafaufauga le mataupu i alii nei o loo tau fai faaofiofi uma ane a latou apalai. Ua nofo ifo le teine i lalo ma fai loa lana tatalo, ma augani ma loimata i le Atua, sei alofa mai ma faasino ia te ia le faaiuga tonu e ao ona fai.
Ua pupula mata o Luama ae ua ia lagona foi le musumusuga a le agaga paia i lona loto, ona tasi ai lea o lana faaiuga, e sili ona lelei pe a vave ona toe faamautu lana tali i lenei mataupu ina ia amata ana aoaoga i Niu Sila, ua matua kilia atoa lona mafaufau mai soo se mea e toe faalavelave mai. O le mea malie lea ua fai nei e Luama, e tasi lava le tusi na ia faia ae ua fuafua e fai ni kopi e tolu ona sui lea o igoa mo tusi taitasi, o le isi mo Pula, si alii o Lotuma, ma le lona tolu la lea o le a tuu i ai le suafa o le tama Niu Sila, si alii o Taio.
E faigofie lava upu o le tusi a le tamaitai: “Mo …. Ou te faamalulu atu ma faamalie i lou finagalo, pe afai ua ou filifilia lenei auala ou te talanoa atu ai, nai lo se isi a ta fesagaiga. Ae o le a tuusao le auga o lenei tusi ona ou te manatu, e leai se aoga o le tele o upu, ae nenefu ai le feau o loo fia momoli atu. E muamua ou te faafetai tele lava mo lou agalelei i le auala sa ta masani ma talanoa ai, ma o le a lē galo ia te au. Ae ou te fia faailoa atu faamolemole, o le a ou le toe mafaufauina lava se isi feiloaiga atili ma lau susuga. E le o se isi lava mafuaaga, ae faamolemole e na o lau aoga lava o loo ou moomia ona tuu atoa i ai lou mafaufau ma au fuafuaga i le taimi nei. Faamolemole, ou te le o faatalitalia sau tali mai, pau o lea, ia e finagalo malamalama i le itu o loo ou iai. Ae ou te faafetai tele mo le avanoa sa ta faamasani ai. Alofaaga, ….” ona saini loa lea o le igoa o le teine.
O le aso lava na sosoo ai na o ai Luama ma le isi ona tei teine lea e la te potu faatasi e lafo ana tusi i alii o loo i Samoa, faatasi ai ma lana tusi i ona matua, lea ua toe faamatala i ai lana faaiuga maumauai lea ua fai, ae o le tusi mo le alii Niu Sila, ua ia taofi pea ina nei iai se aso toe vaai i ai, ae ua lava le tusi e tautala mo ia. O le gaoioiga lea a Luama ua toa filemu ai nei ona lagona, ma i lona mafaufau, o lea o le a matua tapuni mau nei lea tusi o loo iai itulau tuai o lona olaga, ae ua nofosauni e susue se itulau fou ma amata loa le olaga fou i Niu Sila, i lona faanaunauga e tasi, ia matua aoga lona nofo ese mai ona matua, ia matua fai lelei lana aoga ia iu manuia lana taumafai.
Mo le au faitau peleina, ua faaiu ai foi iinei ma la tatou tala sa faasolosolo atu i nei mau aso ua tuanai. E faafetai atu ai foi i lo outou lagolagoina ma talisapaia lenei tala faasolo. Ae silasila ane pea i isi lomiga o le Samoa Times i vaiaso o lumanai, o le a iai foi se isi suiga matagofie i la tatou itulau lenei, auā lava le faamalieina o lau faitau.
Faaiuga
