Na lalaga faapitoa mai le alalafaga o Moataa i Samoa ‘ato matagofie ua mamanuina i le laei a Samoa na fai meaalofa ai i malo faaaloalogia (VIP) e selau (100), e ese mai ia i latou na auai i faaaliga o taleni eseese a le Pacific Fashion Festival. O lea faaaliga ma le faalauiloa na faia i le po o le Aso Toonai 19 o Oketopa i le Brisbane Convention & Exhibition Centre.
O se saunoaga a Feleunga Folau-Tupou (Vice President Pacific Fashion Festival), “E tatau ona faamamafa le faatāuaina o measina ma meataulima a o tatou tagata atumotu lava ia, e lē gata e lu’i ai foi i latou ia finau pea ma faamalolosi i taleni, ae fesoasoani ai le isi faipisinisi Pasefika i le isi tagatānuu mai le atu Pasefika ae sili ai ona unai malosi ina ia maua pea le naunau e atili faaiila taleni ma finau mo manuia.
Ua ono nei tausaga talu ona tatalaina aloaia le Pacific Fashion Festival, ua i luga o upega tafailagi le itulau e iloa ai i latou ma maua gofie ai e tagata. O lenei faalapotopotoga, e talu ona amata mai e leai se tupe o maua mai le malo poo se fesoasoani tuma’oti o lagolagoina se’i vaganā ai le eeli lava e faalauiloa la latou faalapotopotoga i aiga uo ma ē masani ina ia lagolago ma opogi a latou faamoemoe i tausaga uma.
O le faamoemoe tele na faia i le aso 19 o Oketopa, o se faaaliga laei, ma na taulia uma pepa ulufale e 400 sa faatauina. O le lagolago a tagata lautele na pei o se avega ua amo māmā na mitamita ai le komiti i le tulaga na vaaia i lea afiafi.
E to’a 13 i latou ua iai agavaa, poto ma tomai i le mamanuina ma le su’iina o nei laei felanulanuai na mataina ai le silasila i lea po, mai lea to’a 13, e to’a 3 ni alo Samoa na filofilo ai, ma na maofa le toatele o le fia selau o tagata na potopoto auā na matuai faamalieina le maimoa ia latou taumafaiga i lea afiafi. E 60 alii ma talavou lalelei na faalauiloaina nei laei matagofie.
O i latou nei e aofia ai Peter Tamasese (Peter Henry); Sharon Tuivaise sa mataina foi ana seevae (Uneeq Heels); ma le tamaitai talavou ia Tia Semi, o ia e pito laititi ai i designers sa faalauiloa a latou laei ma taleni.
O le uluai taimi lea ua faaulu ai lana taleni (Funk ‘n’ Soul) i lenei faalauiloa (Pacific Fashion Festival) le taleni a Tia Semi, na taufaipati ma tulai tagata ina ua savali mai Tia Semi ma lona palefuiono e faailoa ai lona mitamita tele i lana aganuu Samoa ma lana taleni.
O Tia o se tamaitai ‘afa Samoa, o si ona tamā o le Samoa ae o si ona tina o le Ausetalia, e lē atoatoa lona malosi e iai gasegase tumau e aafia ai, e logonoa toe aafia i gasegase nei (intellectual disability, Epilepsy and Cerebral Palsy) ae ua avea o ia o se tasi ua fai ma lu’itau i loto o le toatele ona o ia o se tamaitai faimeamafai, e ala i lana taleni o le su’isu’i aemaise le mataina o laei o loo ia su’iina.
E uma le po e lē uma tala i le matagofie o vaaiga o lea afiafi, e aogā e a’oa’o ai e fai lesona ai, e lu’i ai ma atili faamausali ai le fiafia i taleni ma meaalofa mai le Atua.
O le Pacific Fashion festival o se taumafaiga ua aloaia lona faavaeina, latou te faaalauiloaina taleni a faalapotopotoga mai atumotu eseese o le Pasefika e lē gata o i latou o aumau i Ausetalia nei ae faapea foi ma fafo atu i atumotu o le Pasefika. E toatele i latou ua i lenei faalapotopotoga e ‘oa i tamaoaiga, ituaiga mamanu, taleni, aganuu ma laei faaonaponei na filogia ma faailoa i lea po.
Na lologo le aofia i le saunoaga faapitoa a le tamaitai Maori (Elaine Lees) Tamaitai na sasaa ai le sauaina o ia ma pologa i le fasi soo e lona toalua. O le unaia e le Pacific Fashion Festival o tamaitai o sauaina pea ina ia mafai ona maua se iuga e ala i le faasoa ma talanoa ina ia maua se fofo e laveaina ai nei tina ma tamaitai o loo nofo pologa pea.
O faamoemoe i tausaga uma e saili seleni, e faapitoa lea e fesoasoani ai ona o le mafatia ma le sauaina o se vaega o nai tina ma tamaitai i se nofoaga poo i latou o aumau i pitonuu e iai mauga i Papua Niu Kini o loo faapea ona tumau pea i aso pogisa i talitonuga faanuupo ma fasiotia ai pea le itupa vaivai e pei ona silafia. (E maua atili i le Femili PNG) www.femilipng.org because
O nisi o taulamua i le komiti a le Pacific Fashion Festival e aofia ai Cassaundra Rangip (Founder, South America/PNG); Erue Bucher – (President-Board member, PNG); Feleunga Folau-Tupou (Vise President-Tonga); Sarah Jackson (Board Director/ Designer, South Sudan); Miriam Ratu-Fairhead, Secretary, Board Member, Designer Fiji), Sophia Finter, (Treasurer, Board Member, PNG); Kathy Jaeger (Events Management and Board member, Fiji); Nola-Louise Rasmussen (Public Relations, Board Member, Samoan); Deborah Fenwick (Designer, Board Member, PNG); Tate Wickham (Media & Marketing, Committee Kiribati); Donna Simmard (Committee, BOH, Australian); Karl Bouro (Media and Marketing, Committee, Solomon/PNG).
O le susuga ia Sulieni Layt ma Inez Manu-Sione sa fai ma fofoga o le po faapea Isita ma John mai le Pacific Wave Radio (tupulaga talavou)
