New Zealand 40 Wales 17
O le taaloga lenei na laveaia le faamavae a Tupuivao Steve Hansen i le tofi faiaoga a le All Blacks. Semanu e iu lona taimi i le faia’ina a le All Blacks pe ana leai le taaloga lenei mo le tulaga 3rd o le RWC i Iapani. O le taaloga foi lenei i le pine apamemea e leai sona uiga tele mo le All Blacks, pe malo pe faia’ina e lē toe ano i ai se isi. O le taaloga ma Egelani na ave uma i ai loto o tagata.
Peitai, ua aogā le taaloga lenei e manogi ai le faamutaina o le taimi o Hansen i le All Blacks ma le NZ Rugby. E lē na o Hansen, auā o le taaloga mulimuli foi lenei a le toatele e iai le kapetenei ia Kieran Reid, ma isi e iai Sonny Bill Williams, Ryan Crotty ma Ben Smith.
Ae e lē o se taaloga na tāua tele i talafaasolopito o le RWC auā e oo foi ia Uelese e toatele latou tama lelei e lei mafai ona taaalo ona o manu’aga.
Na uma lava le taaloga i le ‘afa muamua na sili ai ‘ai o le All Blacks 28-10 i le ta o le malologa. Auala i tatao e fa na sikoa e Joe Moody minute 5, ma Beauden Barrett minute 13, ma le lua a Ben Smith. O sikoa a Smith na maua i le faaiuga o le ‘afa muamua. O le sikoa mulimuli foi lea a le alii taalo mo le All Blacks, e lē toe taalo lava mo le ‘au e oo i le faavavau. O faiga lava ia o le soifuaga. E tāua tele ai lana sikoa lona lua atonu e lē toe galo ia Smith i lona olaga atoa.E tasi le tatao a Uelese na maua e auala ia Halam Amos, ma a’a e lua a Rhys Patchell, o le sala ma le a’a o le tatao a Amos. O le ‘afa lona lua na faaopoopo ai sikoa e lua a le All Blacks e auala ia Ryan Crotty ma Richie Mo’unga. O le tatao a Mo’unga na maua ua uma le taimi. E tasi le tatao a Uelese na faaopoopo, o le sikoa a Josh Adams.
Tupuivao Steve Hansen
Ua vela le tautua a Tupuivao ia Niu Sila ma le NZ Rugby. Ua faamavae i le atoa ai o le 16 tausaga o avea ma faiaoga, na amata mai i le 2003 seia oo i le 2011 na faiaoga fesoasoani ai i lalo o le pulega a Graham Henry. E lē na o le tele o tausaga e amanaia ai le tautua a Tupuivao, ae o le tele foi o manuia na maua e NZ i lalo o lana pulega. Ua tu tasi o ia o se faiaoga pito sili ona maualuga taaloga manumalo mo le All Blacks e 86%. E lua RWC na maua e NZ i lea taimi, ma le Bledisloe Cup e lei mamulu lava i le 16 tausaga.
E faapea foi lana kapeteni, o Kieran Reid ua faamavae nei i le mae’a ai o tausaga e 11 o taalo mo le All Blacks. E 127 taaloga a Reid mo le All Blacks ma taaloga e 52 na tulai mai ai o ia o le kapeteni o le ‘au.
E 107 taaloga na manumalo ai le All Blacks na taalo ai Reid, mai le 127.
Suiga mo Faiaoga a le All Blacks, manaomia se faiaoga Polenisia
O le mau lea a Sonny Bill Williams, fai mai a ia e ao ona sui i se Polenisia poo se tagata Pasefika le faiaoga o le All Blacks . E lē o toe mamao ona faailoa lea e NZ Rugby lē o le a avea ma faiaoga o le ‘au mo le isi fā tausaga. E foliga mai e toalua i laua o loo muamua i manatu o le Iuni e sui ia Tupuivao Steve Hansen, o Scott Robertson le faiaoga a le Crusaders ma Ian Foster le sui faiaoga a le All Blacks o loo iai nei.
Peitai, o le manao a Sonny e ao ona ofi atu i totonu se tagata Pasefika, Polenisia pe Maori, e fai ma faiaoga a le All Blacks. Na faalele ripoti i le vaiaso ua tea na sailia e le NZR le manatu o Dave Rennie e tulai ai mo le tofiga, o Rennie na faiaoga i le Chiefs, a’o ia foi o le tagata-whenua. A misi mai ia Rennie, ona faigata lea ona saili i se isi tagata Pasefika o loo faiaoga i le taaloga.
O loo iai Pat Lam na faiaoga i le Blues, o loo iai foi ma Tana Umaga, peitai o loo fesiligia lona agavaa mo lea tofiga. A’o Namulau’ulu Alama Ieremia foi lea na faiaoga i le Manu Samoa ae e lei manuia lana nofoaiga. O isi faiaoga Pasefika o loo i le taaloga i le taimi nei e iai Filo Tiatia ma Daryl Suasua.
New Zealand 40 (Tatao: Ben Smith (2), Beuden Barrett, Joe Moody, Ryan Crotty, Richie Mo’unga; Mo’unga 5 cons)
Wales 17 (Tatao: Halam Amos, Josh Adams; Dan Biggar con, pen; Patchell con)
Malologa: 28-10.
