Tausaga 4 ua faaiuina lo latou taumafai

O le susuga ia Siteine Peterson e mai le Ekalesia a Iesu Keriso o le Au Paia o Aso e Gata Ai. Ua ia molimauina le telē o le tāua o le aoga Tusi Paia a le Ia Malamalama Agape Bible College i lona olaga faapea ma lona aiga. O se tagata e fiafia e sailiili ma suesue i aoga Tusi Paia, e pei ona ia tauavaeina ai lenei mataupu faale-Tusi Paia i le Iunivesite, peitai e lei mae’a ana a’oa’oga ona o tuatuagia i lona aiga.
Ma e lei mapu ai i i lona sailiili i se isi aoga o loo a’oa’oina ai le Tusi Paia. Na ia afea le aoga Tusi Paia o le Ia Malamalama Agape Bible College i Papatoetoe se’i faalogologo poo ā ni a’oa’oga o faatinoina ai. O lona manatu na o le ono ni masina e aoga ai i lea aoga ona toe suesue lea i se isi aoga, ae peitai ane ina ua ulufale i le aoga Tusi Paia ma ia maitauina ai o le aoga o loo i lalo o le faamalu o le AOG ma le Penetekoso, ma e leai ma ni tagata o le latou ekalesia o loo aooga ai, ae sa nofo ai pea se’i vaavai poo ā foi nei ituaiga a’oa’oga.
O lona tausaga muamua na ia iloa ai e tele ni a’oa’oga tāua o loo ua ia maua mai i le aoga, ua ia maua ai ni uo lelei, ma ua mafana ai le mafutaga ma tamaiti aoga uma ma lava o uso ma tuafāfine. Ua fiafia i mataupu eseese ua a’oa’oina ma o mataupu foi o loo a’oa’oina i totonu o le latou ekalesia. E lu’itau le tele o mataupu i lona olaga ae lē gata i lea o meaaoga e fai, faatasi ai ma le faasoa a tagata i faifeau ma tamaiti aoga uma, o le tu i luma o tagata faapea ma le faamalosia o le anapogi i vaiaso taitasi.
A oo foi ina tatala se mataupu e tele lu’itau e matala mai ai. Ua alualu le aoga ua ia vaavaai pea, ua pei o se aiga le aoga, e fetufaa’i tagata uma e faasoa faatasi i le olaga faletino ma le faaleagaga ina ia paleni itu e lua o le galuega. E eseese faiaoga e a’oa’oina le upu a le Atua, e iai foi faiaoga e malaga mai isi atunuu e fesoasoani i le faasoaina o le Talalelei a le Atua. E mafuta atu i tamā ma tina matutua seia oo lava i tupulaga talavou, ma o se siosiomaga ua fetaui lelei ma ia. Ua mae’a lana tausaga fa ma o se lu’itau lea i lona olaga ina ua faaiuina ma le manuia lona taumafai i totonu o le aoga.
O le Aso Toonai na fai ai le faauuga a le aoga i le hall a Samani Pulepule i Magele lea sa faauu ai i latou e 18 i le tausaga fa i le faailoga o le Bachelor of Theology ae o le tausaga 2 e 17 i latou sa faauu i le faailoga o le Associates of Arts in Theology.
O le susuga i le faafeagaiga ia Pastor Atinae Sola na faauu i le faailoga o le Master of Theology. O le susuga ia Siteine Peterson na sili i le vasega o le tausaga fā, ma o ia foi sa sili aoao i le tuufaatasiga o tamaiti aoga uma i aoga e 6 i totonu o Niu Sila atoa.
O le faletua ia Suitupe Mailo sa tulaga muamua i le tausaga 2 ma ua ia maua le sikolasipi e aoga fua ai i le aoga Tusi Paia i le tasi le tausaga, ae tulaga lua i le tuufaatasiga o tamaiti aoga uma i aoga e 6 i Niu Sila.
O le tausaga lenei ua amata ai se polokalame i totonu o aoga e 6 a le Ia Malamalama Agape Bible College i totonu lava o Niu Sila e sailia ai tamaiti aoga e toalima pito i luga e ausia togi ua faatulagaina e le aoga. Ma o le aoga i Aukilani o loo maualuga maka o tamaiti aoga i lenei tausaga.
O le tausaga fā o loo sili aoao ai le susuga ia Siteine Peterson mai Aukilani, tulaga lua o le sui mai Te Puke, tulaga tolu o Jasmine Meleisea o Aukilani, tulaga fā o le sui mai Te Puke ma le tulaga lima e maua lea e Josie Mapuilesua o Aukilani. Tausaga 2 ua sili aoao ai le sui mai Ueligitone, tulaga lua o Suitupe Mailo mai Aukilani tulaga tolu Vailoa Kirifi o Aukilani, tulaga fā o Ene Sooa mai Aukilani ma le tulaga lima ua faamanuiaina ai foi le sui mai Aukilani ia Atapana Meleisea.
Ua faamutaina a’oa’oga a le Ia Malamalama Agape Bible College i lenei tausaga ma le faamoemoe maualuga ua telē se lu’itau ua maua mai e tamaiti aoga mai le tausaga fā e galulue ai i totonu o a latou ekalesia, ae tapena ai isi tamaiti aoga mo le tausaga fou auā le faamae’aina o a latou a’oa’oga.