O le faaaliga o lagona ma manatu o le toatele o tagata lotu i soo se fata faitaulaga ma tapuaiga i le lalolagi Kerisiano i le mataupu i le tuuina atu o tofiga maualuluga o ekalesia i tamaitai aemaise o le tofiga faifeau, o loo aliali mai ai le eseese o talitonuga o lotu eseese ma tapuaiga i lenei mataupu.
E oo lava i Samoa e lē o taliagofie i totonu o nisi o ekalesia le avea o tamaitai ma faifeau, e ui ua mafai ona talia e nisi lotu le filifilia o nisi tamaitai e avea ma Tiakono ae e lē o mafai lava ona talia e avea ma faifeau fesoasoani poo ni a‘oa‘o fesoasoani o loo iloa ai lea tofiga i ni fata faitaulaga. O le lotu Egelani ma le Agelikana sa faavae mai i Peretania tele.
O se tapuaiga kerisiano foi e tutusa ma le Katoliko le faatinoga o nisi vaega o a latou tapuaiga faapea aoaoga, ae e eseese i nisi vaega. Ua mafai ona avea tamaitai ma faifeau Patele o lea ekalesia ma ua ave foi i ai tofiga Tiakono, aemaise o lea tofiga e tusa ma faiga faavae ma tulafono a lea ekalesia, ua mafai ona latou faatinoina nisi o sauniga lotu. O le malaga asiasi mai i Samoa o se tasi o Akiepikopo poo taitai o le lotu na maua ai le avanoa o tusitala i Samoa e fesiligia i le tele o mataupu eseese.
Sa fesiligia lea taitai o le ekalesia le afioga Akiepikopo Jonh Sentamu i sona finagalo i le talia e le latou tapuaiga o le faauu o tamaitai e avea ma faifeau, ae o nisi ekalesia kerisiano e lē o talia ai.
O le tali a le alii faifeau na ia faapea mai ai, e lē mafai ona tautala i isi lotu ae o le ekalesia Agelikana ua iai se faaiuga na pasia i le lua tausaga ua mavae, na faatoa talia ai tamaitai e avea ma Patele.
O lana feau molimoli mai i lana tali i le fesili a le tusitala, afai o loo papatiso uma e lotu kerisiano alii ma tamaitai i le taimi o le papatisoga e pei ona mulimulitai ai i aoaoga a Iesu, aisea la e lē mafai ai ona avea tamaitai ma faifeau.
O le tasi vaega o lana tali na ia faapea mai ai, o Maria o le tina o Iesu na ia tauave le alii Faaola i lona manava o se faailoga lea o le tāua o le tamaitai.
O le malaga mai i Samoa o le Akiepikopo o le lotu Agelikana o le lalolagi na ia faauu ai se faifeau Patele i Samoa faapea ni Tiakono se toalima e aofia ai tamaitai e toalua, le susuga Papalii Sonja Matalavea Hunter ma Saitalia Lesatele Bourke.
O le susuga Moea‘iseu Raymond Daniel Betham ua avea ma faifeau Patele, ae o Maiava Iulai Blakelock Toma, Fuluomanu Henry Bryce, ma Tilafono Leatiogie David Hunter, o nisi ia o Tiakono fou o le ekalesia na faauu foi e le Akiepikopo Sentamu.
O se tasi o mataupu sa fesili ai i le alii faifeau o faaipoipoga a ituaiga tutusa o tagata poo gay marriage lea ua mafai e nisi o lotu ma tapuaiga ona talia lo latou faapaiaina.
Na manino le tali a le alii faifeau e lē o talia i le lotu Agelikana ae o loo faatāua ma talia nei ituaiga o tagata i totonu o le ekalesia. Na ia faaalia o tagata uma e agasala ma o le galuega a Iesu e lē faailoga tagata pe vavae ese ai ni ituaiga o tagata, ae o le faaipoipoga lava ia e tusa o le talitonuga o le lotu o se sauniga e tuufaatasia ai le alii ma le tamaitai.
