O le vaiaso lenei ua tauaao atu ai e le Faleaiga a le McDonalds i Apia faapea ai ma Amerika Samoa se tinoitupe e $150,000 (tala Samoa) mo le tapenaga o taaloga a Tupulaga o Malo o le Taupulega, lea e faia i Samoa i le isi tolu o vaiaso.
O le faleaiga o le McDonalds ua masani i le lagolagosua ua ia ave i le tele o taumafaiga i Samoa nei ma lona atinae, e pei ona iai le lagolago tele i le faaaliga tausala a Samoa i le tausaga ua tuanai.
O le Aso Gafua na potopoto ai sui o le komiti o loo faatautaia le taligamalo a Samoa i taaloga a Tupulaga o Malo o le Taupulega i le faleaiga i Apia ona o se fesoasoani ua maau i ai lenei faleaiga tele.
O le failautusi o le komiti o tapenaga a Samoa mo nei taaloga, le afioga Tuala Falani Chan Tung na fai ma sui o le Malo o Samoa e talia le foai.
Faaalia e Tuala o le pisinisi aupito tele lea lana foai ua faamatuu atu i le Komiti i lenei taimi ae ua tele kamupani ma ofisa ua alolofa atu.
O le tau atoa lava o taaloga i le silasila a le Komiti lenei e i le va o le $3miliona i le $7miliona tala e moomia auā le tali atu ai i manaoga uma o autaaalo e pei o nofoaga e faamautu ai, o le itu tau i felauaiga, o le tausiga ma isi lava manaoga mo autaaalo ae o le taimi lenei ua iai pasi ma taavale ia e i Sogi auā le felauaiga o autaaalo ma sui o malo o le a auai mai i nei taaloga.
E tusa ma le to‘a afe (1000) alii ma tamaitai taaalo ma sui o malo taitasi o le a tausinio i Taaloga a Tupulaga Talavou o Malo o le Taupulega ia ua fuafua e agai mai i Samoa nei mo ia tauvaga.
E iai foi le fono a Minisita o Taaloga a lenei lava Faalapotopotoga o Malo o le Taupulega e usuia i Samoa i le vaiaso tonu lava e amata ai nei tausinioga faavaomalo ma o le tele lava o le tupe o loo sailia e mo ia faamoemoe tetele.
O le faamatalaga a Tuala o le taimi lenei ua sili laitiiti atu i le $1miliona (tala Samoa) ua aoina a o faagasolo ai lava le sailiga i ofisa o le malo ma kamupani tumaoti mo se isi fesoasoani faaopoopo mo lenei taligamalo tele.
