O se alafua na faatatauina e le matagaluega Pacific Trust Canterbury mo le itu tau soifua maloloina e aofia ai le mafaufau afaina, tino maloloina aemaise o le vaai i le manuia lautele o aiga o tagata Pasefika.
Ua faapolokalamaina fonotaga a le atumotu lava ia e soalaupule ai mataupu i le latou lava gagana pei ona faatautaia e sui o le matagaluega amata mai le masina o Novema 2011, ma ua faaigoaina o le “ fanau ola”.
Peitai o le itu Samoa na faatatauina a latou faatasiga e tolu ma faagasolo i le hall ekalesia AOG (Shirley), o le EFKS (Woolston) ma faaiu atu ai i le St Pauls Pacific Church i le Aso Toonai 10 Tesema. O nei faatasiga uma sa taumafai e tulimatai ma taulogologo i o tatou tagata Samoa ina ia auai e faalogologo ma tufa mai ni o latou lagona faatasi ma ni fesili e fia malamalama ai auā se manuia lautele o le tausiga o aiga aemaise lava fanau.
Nisi la nei o lagona sa faaalia e le mamalu o le atunuu pei ona faamaopoopoina e le faletua Malu Tulia, Mark Esekielu, Pstr Ivan, Filoi Genevieve Togiaso ma isi sui o le matagaluega.
O ā faafitauli o feagai ma tagata Samoa?
• Itu tau tupe, ua utiuti le faasoa ma taugata le soifuaga.
• Soifua maloloina – manaomia se fomai faapitoa Samoa mo le Health Clinic, toe silasila le ofisa ia tasi le fomai e vaaia e lē ua gasegase ae soia fesuiai taimi uma.
• Mafaufau afaina (stress).
• Lagona maasiasi (feeling of embarrassment) ua leai se lafoga, ma tusilima i ai tagata ae o loo fia ulufale atu i le lotu pei ona masani ai.
• Afaina tausiga o fanau & a‘oa‘oga, pe a saputu mai faalavelave lautele aiga i Samoa.
• Paie e faamalosi tino.
Sa soalaupule ni auala e foia ai tele o faafitauli faaalia, foliga mai o le ma‘i numera tasi o le itu tau tupe le mafuaaga ua tau afaina ai le soifua maloloina. Ua tuufaatasia nei e sui o le matagaluega finagalo felanulanuai o tagata mo se latou ripoti ma‘oti e autalaina ai faafitauli o loo sa‘i ai le mamalu o le atunuu. Iai le faamoemoe e toe taliu mai le vaega faapitoa lea mo se feedback ma se tali faamaoni auā se fesoasoani e pei ona iai le latou auaunaga.
Sa auai nisi o le aufaigaluega a le Atua i le fonotaga EFKS Woolston, ma faamalosiau mai e uiga i le soifuaga o le tagata e ala i le mafaufau, tino ma le faaleagaga, sa faatāuaina tele le toaaga e talatalanoa faatasi ma fanau i totonu o lou lava lotoifale, ia aua ne‘i motu le laina o fesootaiga o mātua ma fanau, o le ola maloloina lelei lena i totonu o se aiga.