E 62 i latou na taupati mai i se tasi o polokalame faaletausaga a le leitio a le Penina o Asuisui 1197am. O le afiafi o le Aso Sa, aso 11 o Tesema na tuufaatasia ai togi o i latou uma na taupati mai i le tausaga atoa.
O lenei lava polokalame ua faaigoaina o le “Paneta o le Ola” e amataina ia Fepuari e oo atu ia Novema i tausaga taitasi, ma ua tolu ai nei tausaga talu ona faagasolo mai i le 2009.
O le taimi foi lea na amata lagolagoina mai ai e le Afioga i le aloalii ia Galumalemana Naea Harry Timoteo ma le faletua ia Apu ma le kamupani a le Enchiro Laei ma Containers faapea le Screen Printing.
E lē gata o le faatupeina ae o faailoga i masina uma ma pepa malaga fua mo Sini ma toe taliu mai i le lua tausaga ua tuanai.
O le tausaga la lenei ua faamanuiaina ai le faletua ia Faafetai i le pepa malaga fua mo Niu Sila ma toe foi, ua saunia e le afioga ia Galumalemana Harry ma le aiga, faatasi ai ma le ipu sa sauniga e le Susuga i le faafeagaiga ia Pr Malologa ma le aiga.
O le Tulaga 2 o Selesa Aumau, tauaaoina le ipu ma le teutusi ma le toonai o le Aso Sa auina mai i le Uncle Sam’s Catering, Tulaga 3 o Fale Saveatama, ipu ma le teutusi, Tulaga 4 o Liuliuese Tu‘ifao, ipu ma le faamanuiaga o le Kerisimasi, Tulaga 5 o Titi Collins, ipu foi ma le faamanuiaga, Tulaga 6 o Fualaau Faolua, ipu ma le teutusi, Tulaga 7 o Lesa Tulifau, ipu ma le teutusi, Tulaga 8 o Luisa Ilimaleota, ipu ma le CD a Malila Brothers, Tulaga 9 o Fa Anisone, ipu ma le voucher mai le Runik, Tulaga 10 o Naseri, ipu ma le voucher auina mai i le Runik.
O le isi vaega sa maua mitiafu tusia ai le Penina o Asuisui. O ipu e tapenaina lava e le susuga i le faafeagaiga ia Pr Malologa ma le faletua ia Tamara Fuesaina.
O nisi la o kamupani sa lagolago mai i faaailoga o lenei tausaga, e aofia ai Galumalemana Naea Harry ma Apu o le Enchiro Laei ma Containers, Pr Malologa ma le aiga, le Susuga ia Niko Burgess-Runik Polynesian Town; Rosita Opetaia Sione o le Monavie; Leu Liu o le Leu Liu Transport; Merita Fiu Tona Iosua o le Jayna Polynesian D’Zine i Melepone; Fata Sagalala Alo o le Emanuel Painting Contractors; Maiava Jim Suimai Tui o le Try Me Electrical; Afioga ia Lupematasila Levae o le Lavina Recortz, fale puepese lauiloa i Ausetalia, faapea le faleaiga lauiloa Uncle Sam’s Catering Poulava Sam ma Lorna Matautia ma nisi o CDs na ofoina mai e le susuga ia Rino ma Daniel o le Malila Brothers.
O le auga lava o lenei polokalame ina ia faatuputele pea le fiafia e sailiili i Afioga mamana a lo tatou Atua. Toe momoli le agaga faafetai i kamupani sa lagolago mai i soo se vaega faapea le susuga ia Terry Filimaea Fauea e vaavaalua i taimi o polokalame.
Avea le nusipepa a le Samoa Times e faaleo atu ai se agaga faafetai i paaga masani a le Paneta o le Ola, Malo le lagolago mai. Ia outou maua uma se Kirisimasi fiafia ma se Tausaga Fou manuia, ma ia tatou toe feiloai i le masina o Fepuari i le tatou polokalame.