A atamai se tasi o le fanau e na te momoli le fiafia moni i loto ma finagalo o mātua ma totonu o aiga.
E lē uma le agaga faaagaeetia ma le agaga fiafia o aiga o le tamaitai o Faataape Togitasi Toe ona ua iu manuia lona taumafai.
Sa a‘oa‘oina o ia i le Iunivesite a Griffith ma faamanuiaina ai i le faailoga, Degree in Human Services and Criminology Criminal Justice.
O se tamaitai sogasoga ma tauivi, e lē faalogologo tiga ae finafinau atili, lea la ua ia faaeaea ma faafiafia lona aiga.
O si ona tamā o Togitasi Toe e mai le alalafaga o Satitoa Aleipata ma lona tina ia Susi Toe mai Sataua i Savaii.
Na matagofie le tuufaatasiga a aiga auā na mafuta ai ma le faletua malolo manumalo ia Siniu Tupu Tuia ma le aiga, faapea uo ma paaga a Faataape.
Manuia tele lou taumafai Faataape! Alofaaga e lē mavae mai ou mātua ma ou aiga uma i Samoa, Niu Sila, Ausetalia ma Amerika.
