O le ā lava le tulaga maualuga e iai le mamā o maota ma laoa, o le tulaga matagofie o laufanua ma aai ae toe pa‘ū mai lava Samoa i lalo ona o le tulaga o iai fale-lē-ta‘ua. O le mau lea a le Alii Palemia, o ia foi o le Minisita o le Pulega o Tagata Tafafao Maimoa mai i fafo, le susuga Tuilaepa Lupesoliai Sailele Malielegaoi.
O lea ua faalauiloa e le alii Palemia fuafuaga a le Pulega o Tagata Tafafao ina ia faatutu nisi fale-lē-ta‘ua faitele i vaega eseese o le motu o Upolu faapea ai le motu tele i Salafai.
O le faalauiloa lea na sau ai ma le fautuaga lenei ina ia tumamā i fale-lē-ta‘ua. Faamatala e le Alii Palemia taumafaiga a le Malo i taimi ua tuanai ona o le unaiga o le tumamā lautele ma na ia faaalia ai o asiasiga na faia i ofisa na maua ai le telē o le faaletonu ma mafua ai loa ona fai suiga ua iai nei. Ta‘ua e le Alii Palemia ua vaaia nisi o ofisa ua tuu teu e faamanogi ai fale-lē-ta‘ua ma ua mamā. O le tausaga na tea nei lea sa ofi atu ai loa Samoa i le faalapotopotoga a Malo Aufaatasi ua patino le galuega i le unaiga o le mamā o fale-lē-ta‘ua ma o se alii ua faasuafa e Samoa ia Tuifalevao lea e faauluulu i ai lenei faalapotopotoga.
O lana galuega o le taamilo i le lalolagi ma faia lipoti i le tulaga ua iai fale-lē-ta‘ua i lea atunuu ma lea atunuu ma o Samoa le isi atunuu ua latalata ai i le 200 atunuu ua ofi atu i lea faalapotopotoga.
O le ofi atu i lenei faalapotopotoga o se faiga ina ia mautinoa le mamā lelei o nei fale ma e amata mai lava i le aiga ma fale faigaluega, o aoga ma isi nofoaga faitele lenei taumafaiga.
O Samoa e tele afioaga ua agai a latou komiti a Tina e faia asiasiga mo le faamamāina o fale-lē-ta‘ua a aiga taitasi ina ia tumau le mamā ma taofi ai le pepesi o faama‘i. O se galuega ua faafetaia e le Pulega o Tagata Tafafao maimoa mai i fafo ma le fautuaga ua faaauau nei ina ia alolofa le atunuu i fale-lē-ta‘ua fou ia o le a faatutu i vaega eseese o le atunuu, ina ia fai i ai le tumamā ma le teu mea lelei o le atunuu.
