Na vaaia le mamalu o le Atua auā o lupe sa vao eseese a ua fuifui faatasi. Na potopoto aiga ma uo mai lea itu ma lea tafa o le lalolagi ona o le aso sa taupoina, o le faamanatuina lea o le 21 o le susuga ia Matthew Meni, o se alo e faasino i le susuga ia Iakopo & Eva Meni mai Aufaga i Aleipata & Aukilani i Niu Sila.
E ui lava ina lē iloa e tagata minoi i le uigaese o le vevela o le tau a Kuiniselani i lea aso, peitai na logomālie ma fiu foi le aofia e talie i le agamalie o le Fofoga tautai sa faafoeina le faamoemoe, o ia foi sa fai ma pule o le tausamaaga, e auā na faaali foi metotia masani ma tavili ata tifaga a le susuga ia Tavai Meni, na lē uma ai le fia faafofoga o le aofia.
O le susuga ia Tavai Meni ua lauiloa foi i lana tautua i le Radio Samoa1593 i Aukilani Niu Sila, ma na auai mai o ia ma le faletua ia Maria Meni.
O le susuga ia Rev Tapenaga Reupena o le Ekalesia EFKS Pine Rivers sa taitaia le sauniga lotu ma faagasolo ai polokalame o le afiafi. Na auai foi nisi faafeagaiga ma faletua ma le mamalu o le atunuu faapea le susuga ia Ps Andrew ma le faletua ia Lagi Schmidt o le toeaina o le Ekalesia Voice of Christ.
Na matuai fulifaō vaa o mala ae lagā vaa o manū ina ua tau lau o le faamoemoe, ua fata luga fata lalo i le maau ma le milomilosia.
O alofaaga mo lau susuga Matthew Meni mai ou aiga uma uo ma ē masani ae faasilisili ai alofaaga mai ou uso ma tuafāfine faapea ou mātua ia Iakopo ma Eva Meni.
