O le vaiaso na tea nei na amata ai ona la‘u mai i Samoa o se uta o fagu honey mai i Samoa. O se maketi fou lenei ua leva ona taumafai le kamupani o le CCK e saili, ma o le agaga faafetai o le alii pule o lea kamupani i Samoa o Ken Newton, ona o lea ua tatala mai le faitotoa ina ia faatau ai mai i Niu Sila lea oloa.
E tatala mai lea maketi, ua faapea ona talia se uta tele e tusa ma le 3000 lita o le honey ua mae‘a ona aoina mo se maketi i Saina a le alii faipisinisi milionea lena e nofo i Niu Sila o Jack Chen.
O le kamupani o loo ua lua nei uta o le sua o le nonu ua avatu i Saina, lea e galulue faatasi ma Jack Chen, le Pure Pacifika lea sa folafola le ave o le honey ma le ava mai i Samoa e faaopoopo i uta o le suanonu lea ua lafo i Saina.
O loo tālia lava la lea feutagaiga ona o lea na ta‘ua e le Pure Pacifika o loo faatalitali le mae‘a ona faamaonia o nisi o pepa e faamaonia ai le faatau atu o le honey i Saina ona amata loa lea o lea foi taumafaiga fou.
Ua lē faatali lava la le CCK ona o lea ua tatala mai le avanoa mai se kamupani i Aukilani e la‘u atu ai i Niu Sila le honey.
O le faamuamua na ta‘ua e le alii pule o le CCK o le maketi i Samoa ma o le a fuafua lelei lava le uta e faatau i fafo ina ia mautinoa ai le maua pea o le honey i Samoa nei.
Faaalia e Newton e lē iloa poo le ā tonu le umi o le fefaatauaiga lea ua faia i Niu Sila ae o le manaoga ina ia faaauau ai pea ma o le a tālia pea le mae‘a ai o feutagaiga ma le maketi lea e i Saina ina ia faaopoopo ai le tupe maua e sau i totonu o Samoa mai i lea foi oloa.
Ua iai le fesoasoani ua maua e le CCK faapea isi sui o le asosi o faifaatoaga ua faia faamoega pi faapitoa mo le aoina o le honey ma o lea fesoasoani ua agai ai i afioaga le faatautaiga o ia foi ituaiga faatoaga.
O le faafitauli tele lava o le tatala mai foi o maketi mai i fafo e faatau atu ai ia oloa ae mae‘a ane ua lē faaauauina o na o le laititi o le honey e mafai ona ao atu i Samoa ma o le mafuaaga lea o le unai lea ua faaauala mai i le fesoasoani lenei mai i le Iuni a Europa ina ia faatautaia ai loa ia ituaiga faatoaga faapitoa.
O le honey mai i Samoa na ta‘ua e nisi o tagata faipisinisi mai i Niu Sila na malaga mai i Samoa nei, e faigofie ona tosina mai ai maketi i fafo ona e leai lava nisi vailaau e faaopoopo i ai – o le meli poo le honey lava lea e ao sa‘o mai i faamoega pi faapitoa ua tuu ai lagomeli, lea e tuufagu ma faatau loa i faleoloa.
Ona pau le faigata ona o nisi e foliga mai e fefefe i lagomeli ae o loo iai lava laei ma meafaigaluega ua mautu i soo se faatoaga ina ia mautinoa ai le saogalemu o tagata e faia ia foi ituaiga faatoaga.
O le masina fou foi la ua sauni atu nei le CCK e ave ai le uta lona lua o le honey i Aukilani i Niu Sila.
O le meli lea ua faatau atu i Niu Sila ua faapea ona aofia ai ma le honey ua sui ai le suanonu.
