O le malaga taamilo mai a le Samoa A i Ausetalia nei o le a avea ma auala lelei e tofo ai tama fou i le saoasaoa o le lakapi sefululima o loo ua iai nei.
O se taimi lelei e fetoai ai ma ‘au ua lava tapena i Ausetalia nei ma Niu Sila auā o le tulaga lea o loo moomia i Samoa, o ni ‘au se tele e lē gata i le agavaa a o le atoatoa o tapenaga tau seleni, fomai, inisiua ma alauni tetele.
E ui ina lami le Waratahs 85-5 i le Samoa A, i lana uluai taaloga na ave mamao i Tamworth i le Aso Faraile, aso 10 o Fepuari, ae mafanafana le tapuaiga ona o le taimi muamua lea ua taaalo faatasi ai tama mai Samoa.
E talitonu foi o nisi o nei tama o le a faauuina atu i ‘au iloga e pei o le Manu Samoa lea na iloga i le Ipu o le lalolagi ma toilalo ai foi Ausetalia. E masani na taaalo muamua ma se ‘au e pei o le Development XV a se ‘au supa sefululima, ae pagā lea ua amata i le toasā o le autele a NSW.
Ina ua toe taunuu mai i Sini le ‘au mai Tamworth na vaaia aiga ma uo o sagisagi fiafia atu auā le feiloaiga ma faamanuiaga. O loo faamautu le ‘au i le Kolisi a St Andrews i Camperdown e latalata i le taulaga tele.
E ui i le malolo a le ‘au i nei ‘ai tetele 85-5, ae manatua lava e tagata Samoa i Sini taaloga a le Waratahs ma le Manu Samoa i tausaga ua tea lea e ta‘ape mai lava ua matuā malolo le Waratahs.
E talitonu foi le toatele o le ‘au lenei a le Samoa A, e ono tulai mai ai nisi tama lelei mo le Manu Samoa. E pei o Logovii Mulipola sa taalo i le tausaga talu ai, Alafoti Faosiliva, Levi Asi Faamatala, Morgan Salesa ma Fautua Otto.
Ua toe vaaia i lenei tausaga le ‘afa iloga ia Faatalatala Fagasoaia lea ua silafia e le faiaoga Fepuleai Selefuti Patu le ono sosoo atu i ‘afa faaleoleo a le Manu Samoa mo Kahn Fotualii. O nisi o tama na Malaga mai i le 2011 e aofia ai le fulupeki ia Titi Esau faapea le loka ia Maselino Paulino faapea Afioae Maiava i le tulaga o le flanker.
Ma o le po la o le Aso Faraile, aso 17 na toe taaalo ai le Samoa A ma le Iunivesite a Sini a o lei malaga atu i Canberra mo lana taaloga ma le ‘au tauatia‘e a le Brumbies i le Aso Faraile nei, aso 24 o Fepuari. A mae‘a ona toe malaga mai ai mo Sini e fetaui ma le Junior Waratahs ma faasolo atu ai loa mo Kuiniselani ma Niu Sila.
