O lea foi ua oo i le vaitaimi o le toe amatalia o aoaoga i totonu o Iunivesite, ma o le Aso Toonai 25 Fepuari na faataunuuina ai le faamoemoe i totonu lava o le aoga, o le faafeiloai aloaia lea o fanau Pasefika ua ulufale atu i le Iunivesite mo lenei tausaga ua amata.
O le faletua ia Liz Keneti, lea e taiulu i le matagaluega o fanau Pasefika faatasi ma lana komiti faafoe sa faatautaia le polokalame atoa ma o lona sefulu ai lea o tausaga talu ona faagasolo.
Sa muai amata i le tatalo na saunia e Pstr Joseph Maea, na auai le pulega o le Iunivesite, Dr John Wood (Univ. Chancellor), Prof. Ian Town (DVC) & Dr Malakai Kaloamatangi (Director Pasifika Excellence) faapea le mamalu i matua, uo ma aiga ae maise nai fanau sa faatumulia ai le aso matagofie.
O le fofoga o le aso sa faatautaia e le tamaitai o Sia Evalu, ma faagasolo loa i timaiga faamalosiau mai le pulega mo le fanau aoga aemaise o le faafeiloai atu i le au tausaga muamua ua ulufale mai i le lotoā e asamo ai le poto.
Sa tufatufaina tusipasi mo i latou e to‘a sefulu ua ausia sikolasipi eseese mai le Iunivesite, o se mitamitaga foi lea i mātua ae sili ai le magafagafa o le tamaitiiti e faaaogā ma le tatau le manuia ua ofoina mai.
O nisi o tapenapenaga sa faia e faamalosiau ai i le fanau faato‘ā a‘e sa tapenaina e le faletua ia Sofia Daly (PhD student) ma Issac Manuel (Bachelor Engineering) atoa ai ma le saunoaga mai le tamaitai pule, Liz Keneti ina ia aua le palaai ma fefe e fesili, ae ia lototele e tauivi mo le finauina o le poto salalau, auā a lelei ma manuia na te faafeaoina oe i le lumanai.
Na faaiu i le tatalo ona tuumuli lea mo le taumafataga tele na saunia e le asosi a alii ma tamaitai Samoa o le Iunivesite.
Lisi o Ē ua Maua Sikolasipi
Emerging Leaders Scholarships: Mathew Elia, Levi Grady, Mele Tatu, David Wynyard, Maxie Duseigneur
Canterbury Bright Smart Scholarship: Nive Logopati
NZ Aid Scholarships: Catherine Paul, Hillary Tanielu, Joel Galeb, Vincent Fiuta, Michael Nafatali ma Jack Takae
A+ Students: Maxie Duseigner, Lesiele Filimoehala, Mele Tatu, Mathew Elia, Francis Ioane, Lincoln Valavala, Vanessa Faitaua ma Masina Fonoti
