O ala o le tagata, e lē o le finagalo lea o le Atua. E fefulisa’i faalaau mamafa talitonuga ma lagona o le toatele o tagata e āfua ai ona tuua ekalesia e nisi, o nisi o le tele o meafai a le lotu, o nisi o sailiga manuia ua siitia ai aiga i nisi nofoaga, setete ma isi atunuu, siitiaga i a’oa’oga ma galuega, o nisi foi ua iai le lagona musu, a’o nisi, ua pau lava o filifiliga o le loto.
Pe iai la se naunau pe leai e toe taliu mai ai, peitai o ala lava o le tagata e lē o le finagalo lea o le Atua. Ae o lenei faatasiga, ua o ni ufi e tutupu i tino lagona faagaeetia, olioli, ma le fiafia tele o le ekalesia Samoan Logan City Seventh Days Adventist Church ona o uso sa vao eseese a ua fuifui faatasi o se aiga lava e tasi ia Keriso. O le aso 25 o Ianuari i le 7 i le afiafi, sa tuufaatasia ai e le ekalesia Logan City Samoan Seventh Days Adventist se faatasiga matagofie ua faaigoaina o le Home Coming Reunion 2019.
O se faatasiga pito sili ona tāua tele i le ekalesia ma ua faamauina i talafaasolopito o le ekalesia, e ala lea i le valaaulia o talavou ua leva ona tetea ma valavala sa tapuai faatasi i le tele o tausaga talu mai le tausaga e 1995.
O le itu sili ona tāua tele o le suiga i olaga e ala i le soifua i la le tino ae sili ai le faaleagaga e tusa o molimau a nisi, ma o se mafutaga faaauro e manatua pea.
O le guest speaker poo le failauga faapitoa, o se tasi o talavou iloga, talenia male agavaa i le folafolaina o le upu ale Atua le susuga ia Laolagi Timu ua faauu mai le A’oga faafaifeau ale ekalesia Aso Fitu i Avondale College.
O loo aumau nei i Melepone male faletua ia Helen male nofoaalo e toa 4.
O se faamanuiaga i le autalavou male ekalesia le fuai faimai male toe vaaia o nisi ua leva e lē o toe tapuai faatasi ae ua aga lava le tagata ia i lona tulimanu.
Na pātutu’i le malumalu tele o le ekalesia i le toatele o e na faatasi ma auai atu, ele gata o le afiafi o le Aso Faraile ae na aulia taimi o le sauniga i le Aso Toonai ma toe valaaulia ise taumafataga tele e fiafia ma talatalanoa ai. O polokalame ma tapenaga sa fuafuaina ele komiti o le autalavou 2019, sa tapena mamao mai i le masina o Novema 2018.
Pe ana le seanoa Ieova e lē mafai ona tini ma taunuu manuia.
O le faanaunauga o le komiti o le autalavou ia tumau pea ma maua sootaga i le va o uso tuagane/tuafafine e fefaasoaa’i manatu ma lagona lelei e tala’i ai le finagalo o le Atua a’o maua le avanoa, soifua ma le ola.
Komiti Autalavou
Youth Leader – Tuilaepa Sauita Magele
Assistant Youth Leader – Elsie Faatauu’u
Youth Secretary – Dayna Paletaoga
Faufautua/Advisor – Su’a Iese Moaga
Committee Members – Faga Matauaina, Elihon Taulapapa, Christabelle Puni, Bradford Feo, Dennis Vili, Julie Siolo, To’ivao Lama Puni, Georgina Paletaoga.
