Ua lē toe maua le manaia o aso anamua, e moni o aso o le mativa ae lē mafai ona galo lona manaia ma le matagofie a’o mafuta faatasi fanau ma aiga.
O le suia foi o le soifuaga i lenei vaitau ina ua valavala ma fanau, ua pei o se ao e sau ma toe mou atu. E misia mafutaga o le ala lea na tonu ai i le manatu o le loomatua se’i malaga mai e fiafia ma fanau i lenei aai ona ua atoa nei tausaga e tele o le olaga.
O le aso 2 o Fepuari na atoa iai le 73 tausaga o Fiu Fetina’i Leaupepe Pita (Sili& Satupaitea ma Fasitoouta) Na faaipoipo atu ia Leaupepe Pita (Fasitoouta) o lē na avea ma faipule o le itumalo o Aana Numera Tasi i le vaitau o le 1973-1975 faapea le 1979-1981.
Lona Soifua Tautua i le atunuu:
1966 – Ulufale Fiu Fetina’i i le a’oga faatausimai i Mootootua.
1968 – Avea ma tamaitai Fomai pasi.
1969 – Faauluulu ia te ia le matagaluega o le operating theatre i le falema’i i Tuasivi.
1971 – Toe foi mai i Motootua ma toe galue i le operating theatre.
1972 – Toe malaga e galue i le falema’i i Lalomanu ma faauluulu iai le latou vaega o tamaitai tausimai i na taimi.
1973 – Toe taliu mai e galue i le falefailele (maternity ward) i Motootua.
1974 – Galue i le Ward o le aufatafatavaivai ma lepela (Isolation Ward) mo le 2 tausaga.
1976 – Galue e vaaia le falema’i a Afega.
1977 – Toe galue ma vaaia le itu o Fomai Mata (Eye Clinic) i Motootua, lea na taamilo ai ma le Fomai faapitoa mai Egelani o Dr Gillian Glover i Savaii e faia taotoga ma le vaaiga o mata (fofoga) o i latou na manaomia lena auaunaga.
1978 – Galue e vaaia le falema’i i Leulumoega mo le 2 tausaga. Sa galue foi i le Ekalesia Katoliko i le itu o le Aiga Fuafuaina (Family Planning & Ovulation Method) e taamilo i Savaii ma Tutuila.
1980 – Galue loa faa-Fomai asiasi komiti i le matagaluega a Leulumoega, amata atu i Nofoaalii, Leulumoega, Fasitootai & Vailuutai faatasi ai ma a’oga. O le taimi foi lea ua avea ma Peresetene o Tina i le ekalesia Katoliko o le Matagaluega a Leulumoega, ma faiaoga Aso Sa, seia oo atu i le 1986.
O le tausaga e 1987 na tuua ai loa Samoa i le aso 30 o Tesema ae malaga ane i Niu Sila mo sailiga fofo o le tamā o le aiga ia Leaupepe Pita aemaise o sailiga manuia o le nofoaalo e toafa, Tavu’i Nifae, Leaupepe Toni, Fuatino Matalena ma Filomena Leaupepe.
E 9 grandchildren ua iai nei ina ua atoa lona 73 o tausaga.
Na avea ma taitai e faia uma Aoga Aso Sa a Upolu West State a le ekalesia a le Au Paia o Aso e Gata Ai.
O le tausaga e 1988 na galue i Ueligitone i le kamupani fai faamalama o le Interlock, ma avea ai ma taitai Iuni o lea kamupani. O le 1989 ua galue faateine tausima’i i le falema’i i Ueligitone.
E tolusefulu tausaga o galue i Ueligitone faatasi ai ma le galue faafaufautua (counselling) i falepuipui. Na malaga ai foi i Samoa ma ofo fua atu lana auaunaga fesoasoani i taimi o mafatiaga o le atunuu i le Sunami i le 2009.
O le tausaga e 2016 aso 31 o Ianuari na litaea ai loa ma fuafua e toe taliu i Samoa i le tausaga lava lea e malolo i Samoa. Ua faamavae mai lana ekalesia i Ueligitone ae ua faaauau nei le matafale e tautua ai le ekalesia i Fasitoouta i le Ekalesia Katoliko.
Ua fausia nei lona maota i Vaitele Fou ma ua galue tauofo i le Samoa Victim Support o se faufautua. Sa asia le Nuu Paia i Ierusalema ma le Atu Kuki i le atoaga o lona 70 tausaga.
O le taimi faatoa taunuu i Ueligitone o se taimi sili ona faigata i le tau faasoaina o le seleni. A kuka meaai e le soona faia.
E to’a 6 le aiga, e na’o le 6 foi vaemoa e saka ma pateta a le tagata.
E manatua e le tina ia Fiu Fetina’i na vaitaimi, e leai se meaai e totoe ona e posi posi uma meaai o lea aso ma lea aso. Peitai o tua atu o lena ola posiposi ma le tau faasoasoa lea ua fanau mai ai le manuia.
E toafa le fanau ma ua tulaga lelei uma i galuega ma soifua manuia o latou aiga.
E momoli foi faamanuiaga a le Samoa Times mo le tina ia Fiu Fetina’i Leaupepe i le faailogaina o le 73 tausaga o lona soifua.
Tau ina ia faamanuia pea le Atua ma faaopoopo atu nisi tausaga se tele i lou soifua Tina!
