O le mataupu i le faatauina e Toluono Feti o fanua o ni tina se toalua o Theresa Taufau Stowers ma Rosita Bourke lea sa tuuaia ai lea tamalii ma le tina o Vaselisa, ua mae‘a ma ua aumai le iuga a le faamasinoga ua faamaonia faiga solitulafono sa faatino ai lea gaioiga.
O fanua o ia tina e nonofo mau i Niu Sila ma o la aiga, sa aveesea ma faatau e Toluono ona o le la masaniga ma le tina o Vaselisa Stowers lea ua faamaonia e le faamasinoga sa iai se mafutaga faapouliuli na faia i le va o lē ua molia ma lea tina o loo tuli lona faasalaga faafalepuipui ona o le mataupu lava lea i fanua.
E 15 moliaga o Toluono ua faamaonia e aofia ai moliaga o le taufaavalea, fai faamalosi o ni gaioiga ma le faia o ni faamaumauga sese. E fesootai uma moliaga i le gaioiga na ia faia faatasi ai ma Vaselisa na faatau ai le fanua o Theresa ma Rosita, o ni tina e iai lo la sootaga faaleaiga i le Stowers.
Ua 60 ma ona tupu tausaga o Toluono ma sa avea ma Pule o le faalapotopotoga o le malosi tau eletise le EPC i ni tausaga se tele, a o lei faamavae i se vaitaimi o le tausaga e 2004 i le 2005.
O le palota tele o le tausaga e 2006 na manumalo ai i le palota mo le tofi faipule o Palauli lea sa tulai ai i le lima tausaga o le paeaiga ua mae‘a atu, ae o le palota tele o le 2011 lea na lē toe filifilia ai. O le va o le tausaga e 2004 faasolo mai i le 2005, 2006, 2007, 2008, 2009 ma le 2010, sa faatino ai le solitulafono.
Na muamua i le faatauina o le fanua o Theresa ma o se gaioiga na sailia ai e Toluono pepa o faamaumauga o le fanua mai le ofisa o loo lesitala ai fanua i le matagaluega o punaoa faalenatura ma le siosiomaga.
O le ofisa loia o le afioga Tuimalealiifano Vaaleto‘a sa faia pepa na liliu ai le faatauga o le eleele.
Peitai na faato‘ā iloa e Theresa o lona fanua ua ese le tagata ua lesitala ai ina ua malaga i Samoa ma le faamoemoe o le a faaaogā le fanua mo se atina‘e o lona aiga.
O le taimi lea na faato‘ā iloa ai le mea ua tupu ma sailia loa se fesoasoani i le faamasinoga lea na faamaonia ai o se auala faaalatua na faia e Toluono ma Vaselisa na aveesea ai le fanua o lea tina ua matua, e pei ona faaalia e nisi o ona alo ua silia i le 80 tausaga o lona soifua.
O le mae‘a o le faamasinoga lea na malaga mai ai i Samoa le tina o Rosita Bourke ma sailia foi le tulaga o loo iai lona fasi fanua o se vaega o le esetete a le au Stowers i Alafua lea foi e aofia ai ma le tina o Theresa. Na maua ai foi e Rosita o lona fanua ua aveesea o sana meatotino ae ua ese le tagata ua faatau i ai e Toluono.
O le faatinoga o pepa na liliu ai ia fanua sa faia lava e Toluono ma Vaselisa i luma o le loia o Tuimalealiifano. O le faaiuga ua aumai a le faamasinoga ua teena ai le molimau a Toluono faasaga i le alii loia ma le lē maua o faamaumauga o lisiti o tupe na ia totogi atu ia Vaselisa mo le faatauina o fanua.
O le faaiuga a le faamasino o Pierre Slicer ua faaalia ai le talitonuina atoatoa o le molimau a Tuimalealiifano i lona teena o tuuaiga ma molimau a le ua molia ile auala na faia ai pepa o le fanua. Faaalia e le faamasinoga o le alii loia sa faia lana galuega ma lona talitonuina atoatoa o Toluono ona o se tagata e maualuga lona tulaga aloaia auā e lē gata sa avea ma Pule o se faalapotopotoga a le Malo, ae o le taimi foi lea o loo ia umia le tofi faipule o le Palemene.
O le Aso Lua, 27 o Mati 2012 o le a toe valaauina ai le mataupu lenei mo le sailia o se aso e lauina ai se faaiuga a le faamasinoga.
