O le faamatalaga lea a le pulenuu o le afioaga o Eva ina ua tulai mai se faalavelave na osofai ai e se alii talavou o lea afioaga se isi alii talavou ma motu ai le lima o le alii na osofaia.
O lea e taofia i le falemai tele i Motootua lē ua aafia ma e leai se manaoga e talanoa i lenei mataupu ae o le faamatalaga a le pulenuu, Matamea Sivao o le lapataiga lea ua ave e le pulega a alii ma faipule o le afioaga o Eva, ona o le taumafai e tuuiitiitia le tulai mai o nisi vevesi i le va o aiga o nei alii talavou.
O le faamatalaga ua oo mai i le tatou ofisa i Samoa nei, o le itu lea, na mafua le misa ona o fanua ma na iu ina agai atu ai le alii ua tuuaia ma se agaese ma osofai le alii lea ua taofia i le falemai ua aafia lona aao.
“E lē o iai lava se manaoga o le afioaga e toe tulai mai nisi vevesi ma e maaleale lava le mataupu i le taimi lenei, e faigata tele ma o le mafuaaga lena o le faasa o soo se isi o le nuu ona soona tautala fua a o talia ai togafitiga o le taulealea ua lavea”. Na faaalia foi e le tofi o le afioaga, ua mae‘a ona gaioi le nuu e taofi le tulai mai o se isi vevesi ma ua taumafai lava le nuu e faaauau feiloaiga ma aiga e lua ina ia tau tuuiitiitia ai le loto tiga ma le ita i le tulai mai ai o lenei mataupu.
“O aulape uma foi ua mae‘a ona faatautaia,” o lana faaaliga lea i le sala ua mae‘a ona tuu atu e le afioaga i le aiga o lē ua tuuaia i lenei osofaiga.
“Ua oo mai foi i le nuu lipoti faapea ua mae‘a ona oo atu le tina o le alii o loo tuuaia ma sui o lona aiga i le falemai o loo taofia ai le taulealea ua faamanualia ma asi lē ua aafia,” o se faamatalaga lea a le alii pulenuu.
E ui la ua faapea ona teuteuina le mataupu e le afioaga, ae o loo iai lava le lipoti e faia e le falemai agai i le Ofisa o Leoleo.
O le fesiligia o le afioga i le Sooupu o le Matagaluega a Leoleo ma Falepuipui, le Komesina Lagolago, Leaupepe Fatu Pula i le mataupu, na ia ta‘ua ai e lei faalogo i se faalavelave faapea ma na ia faaalia e lei oo atu lea mataupu ia te ia.
Atonu o le taumafai lava ina ia tau faafilemu le mataupu ua mafua ai lea faamatalaga auā o lea na iai molimau i le afioaga faapea na agai atu leoleo ina ua tulai mai le faalavelave ma o i latou ia na toe eli i luga le aao o le alii na faapea ona motusia i le osofaiga auā a latou sailiiliga ma suesuega.
Faaalia e le afioga i le pulenuu, ua tuu atu pea Leoleo e faaauau a latou suesuega ona o lea ua tulai mai le solitulafono ma e taatia pea i le Matagaluega lea vaega o le mataupu ae o le taimi lenei o le laitiiti lava o le faamatalaga e soona alu i fafo, ua ta‘ua e le alii pulenuu, o le faaitiitia foi lea o le avanoa e toe tulai mai ai ni vevesi.
