E ese lava le mafuaaga o le tulai i luma o le Faamasinoga faaitumalo i le vaiaso na tea nei, e se le gasu na la‘u e pagota e toatolu i le Faamasinoga. O le toatolu lenei na faamaonia le sosola ese mai i le toese i Tafaigata. O i latou ia o Pauli Samaoso, Visesio Aso e 21 tausaga ma Samuelu Masaga e 30 tausaga le matua.
O le faamatalaga a leoleo, o se malologa mai i galuega a pagota na sosola ai i tua ma le toese i latou nei. O le faamatalaga a alii nei sa ‘ai mago i fafo atu o le pa ae ua tetei i le tuuaia o latou. O le faamtalaga a le tamaitai Faamasino, Mata Tuatagaloa, a lē faanoi lava ua sola i tua ma le toese. O le nofoaga na maua ai nei alii o fafo atu o le pa.
E ta‘itolu masina ua faaopoopo i faasalaga faafalepuipui o nei alii. E faagasolo la le faamasinoga lea ae toe laga loa e pagota le manaoga e faaali le tulaga o iai lo latou nonofo ai i le toese.
O le faamatalaga a Pauli Samaoso, e fai o le fasi soo o latou, e leaga taumafa, e lē aai i isi taimi ma e lē o ni faiga nei ua talafeagai mo tagata soifua.
E faamata‘u i latou, o isi ia faamatalaga ua tuu atu i le Faamasinoga ma o se feiloaiga foi ma tusitala i fafo o le potu faamasino na faaalia ai e le alii lenei o Samaoso, e toe oo lava le falepuipui i se tetee e faia e pagota. Na ia toe faamanatu i tusitala le tetee i le lua tausaga talu ai lea na agai mai ai pagota i se pasi ae na faato‘ā mafai ona taofia ina ua oo mai le pasi i Pesega.
Faaalia e lenei alii o le tulaga foi lea e oo lava i ai ona o le leaga o le faiga o i latou e leoleo. “E toe oo lava i ai le falepuipui i Tafaigata ona e lē o lelei le faiga o pagota, e tumu le fanua i meatoto ae o le la e fia aai pagota,” o lana faamatalaga lea i tusitala.
Ua tuu e le faamasinoga le mataupu a lenei alii e laga i leoleo. O Pauli Samaoso lea na faasiilimaina le tamaitai o le InkPatch i Salelologa ma e lei leva nei ona faasala i le faomea ae o lea ua faaopoopo isi masina o lona faasalaga atoa ai ma alii e toalua ia na maua faatasi o i fafo o le pa e sio ai le toese ma fai le ‘aiga mago.