Ua mavae atu le vaiaso na faatāuaina ai ma faamanatuina ai le faaaogāina o le gagana tautala faasamoa i totonu o Aotearoa nei, lea sa tapisa ai lava ma faasafua atu e ala i le aoaoina o fanau i totonu o le tele o aoga mai lava i aoga amata seia oo atu i Iunivesite.
A o le vaiaso na tea nei o le faamanatuina o le sisiina o le fu‘a o le saolotoga i totonu o si o tatou atunuu o Samoa, sa faapena foi ona tauaveina mai ai le faaauau pea ona faatāuaina le gagana seia oo ina faamanatuina ai loa i ni faafiafiaga ma le faaaliga aemaise o le faailoa atu e ala i lesona aoaoina mo le malamalama atili o fanau i totonu o aoga amata.
O le Aso Faraile na faatāuaina ai le faailoa atu o nisi o tu ma aga faa-Samoa i ni auala faaleaoaoga ma o se tulaga na matuā maofa ma faagaeetia ai mātua mai isi atunuu ma atumotu ona o le matagofie o a tatou foi tu ma aga.
I totonu o le aoga amata a Kids Count i Marne Road i le aai o Papakura, na faia ai ni faaaoaoga e le susuga i le tamaitai puleaoga o Sayonara Faamausili i le paluina o le ‘ava, o le faiga o le suafa‘i, o le kukaina o le kokoaraisa aemaise foi o le faaaoaoina i tamaiti ma faiaoga o le siva Samoa ona taualugaina loa lea e le taupou Samoa le tamaitai o Iliganoa Michelle Faamausili ma faailoa i le fanau lona laei o le malu.
Na maofa lava mātua ma faiaoga o lea foi pitonuu auā o le mea moni lava, o lea faatoa maua foi e nai fanau ma nai o latou mātua aemaise o le vasega o faiaoga lenei avanoa lelei faaauro, ua o latou tagatagai ai ma maimoaina le matagofie ma le manaia o nai a tatou tu ma aga.
E mae‘a galuega ma tuua foi le aoga o le Aso Faraile ua matuā fiafia ma faafetai le aiga faiaoga ona o le oloa luuluu o aoaoga na mafai ona maua e nai fanau i lea aso.
O lona uiga o le a fai pea ma polokalame tumau i totonu o aoga a le Kids Count lenei faaaoaoga lelei ma le tāua mo nai fanau laiti.
