“E matuā matagofie vae o ē latou te aumaia le Talalelei”. O le gagana masani lea e gagana ai le toatele pe afai e matagofie se lauga/folafola a se faifeau lauga mai le pulelaa, ma o le upu moni o lea na gagana lē leoa ai finagalo o le aufaafofoga i le susuga i le faifeau faauuina o le ekalesia Destiny i Ueligitone, le afioga ia Taefu Pastor Heker Robertson i le Sapati na tea nei.
Na tasi le filifiliga a le ekalesia aoao i le afioga ia Taefu Pastor Heker Robertson ma le faletua e fai ma Taitai o le lafumamoe a le Destiny i Ueligitone, ma e ova ma le 10 tausaga o tautua faamaoni ai i laua i lea ekalesia.
Na faauuina le susuga i le faifeau fou i se sauniga tele ma le mamalu i totonu o le aai i Aukilani i le vaiaso na tea nei ma o le Sapati analeila na feagai ai le ekalesia ma le faafeiloaiga o lo latou faifeau fou ma le faletua faapea ma o la aiga i se mafutaga mafana ma le matagofie.
O le susuga i le faafeagaiga o le lupe faalele a lona itu tina mai le afioaga o Falelatai i le afio o le Aiga Tauaana ma la latou Tama, afio Fasavalu ma le aiga sa Fasavalu, susū lou Tapaau Tagaloa, alalatai Galu e Fa ma Salogo ma le mamalu ia te oe Falelatai.
O ia foi o le fuifui na fa‘ia mai le tumutumu e lona faasinomaga i le itu tama, o le afioaga o Salelologa, i le paia faasino i le afifio o Muagututia ma Luamanuvae, faapea Tinousi, susū Su‘a ma le Malelega a Malietoa, le mamalu i le Falefia ma le Falesalafai, le Lologapule ma le Faitoaga, na e lave i manino, lave i ‘aava.
O le faletua o le faafeagaiga le susuga ia Pastor Epirosa Uili- Robertson e mai le afioaga o Safotu, o le paia faasino i le afifio o le Falefā o le Aiga sa Umalau, ma le Alii o le Itu, ae o le mamalu foi i le fetalaiga ia Lavea faapea le Atipouniu ma le Faasau.
