O le vaiaso lenei ua asia ai Samoa e le ofisa Sili o Taaloga a le Taupulega o David Grevemberg e vaavaai i tapenapenaga a le malo ma tagata o Samoa i le taligamalo tele lea ua faia mai i Samoa nei mo taaloga lona lima a le Tupulaga o Malo o le Taupulega.
O le masina o Setema lea e faagasolo ai ia taaloga faavaomalo i Samoa nei peitai ua mae‘a se asiasiga muamua a le komiti o loo faafoea taaloga nei ae o lea ua asiasi mai le pule o taaloga a Malo o le Taupulega aemaise i le itu mo tupulaga talavou.
Faaalia e lea alii i se pepa faalauiloa o lana asiasiga i Samoa nei, o lea ua manino le auga o nei taaloga ina ia mautinoa le atinae o tupulaga talavou mo taaloga tetele faavaomalo o le lalolagi ma e silia i le to‘a 1000 o le a iai i Samoa mo lenei faamoemoe tele ma o le mafuaaga lea o lona malaga mai i Samoa ina ia mautinoa o lava nofoaga ua aofia i lenei taligamalo ia lelei ma atoatoa mo le feagai ai o tupulaga o lea lio o atunuu ma tausinioga o taaloga eseese.
O le asiasiga a le ofisa o Malo o le Taupulega mai i Peretania na malaga mai ai i Samoa nei i le masina na tea nei na o latou asiasia ai foi faletaalo ma nofoaga o le a faamautu ai tama ma teine talavou o le a tausinio i nei taaloga tetele ma o le latou lipoti na toe foi ma i latou ua mafai e Samoa ona talimalo i ia taaloga ma ua mafai foi ona o latou talimalo i le fono a minisita o taaloga a malo e silia i le 100 ia o le a malaga mai mo lea fono faavaomalo i le taimi tonu o taaloga nei a Malo o le Taupulega.
O le alii lenei ua faauluulu i ai taaloga faavaomalo nei na ia faaalia o le a iai ma le avanoa e talanoa ai ma le taitaifono o le komiti o sauniuniga a Samoa mo taaloga nei le alii Palemia ma o le a faapea ona toe talatalanoa i nisi o manaoga o Samoa ina ia mautinoa e lelei le taligamalo o le a faatautaia nei.
O le a iai ma feiloaiga ma le pulega o taaloga ma le komiti o taaloga a le Olimipeka i Samoa nei, le SASNOC aemaise o le a maua le avanoa e feiloai ai foi lea alii i tama ma teine taaalo a Samoa lava ia o le a tausinio i ia taaloga.
O loo faagasolo lava foi tapenaga a au a le tupulaga talavou a Samoa mo ia taaloga faavaomalo ma o le a faapea ona maua le avanoa e maimoaina ai e Grevemberg nisi o aoga ma a latou tapenaga i Samoa lava ia mo lea faamoemoe.
O le aso 5-11 o le masina o Setema lea o le a faagasolo ai nei taaloga faavaomalo i Samoa.
