Ua faasala e le faamasinoga le alii o Tafuna Tauialo i le 3 tausaga i le falepuipui, i le moliaga o le umiaina lea o le fualaau faasāina o le methamphetamine (aisa) e tusa lona mamafa ma le 25.8 kalama. Ua faasalaina foi i le 3 tausaga i lona aumaia lea o lea fualaau faasāina i totonu o le atunuu, ma o lea faasalaga e toese mai ai le taimi sa nofo taofia ai a’o faatali ai lona faamasinoga. O le faaiuga na tuuina mai lea e le alii faamasino ia Leiataualesa Daryl Clarke i le faamasinoga maualuga i Mulinuu i le Aso Faraile ua mavae. O le alii o Tafuna Tauialo 45 tausaga o le afioaga o Foailuga i Savaii ma Amerika, sa soifua mai i Amerika Samoa, ae na malaga mai ma nofo i lona aiga i Foailuga i Savaii.
Sa toe malaga atu lea alii i Amerika Samoa ma faaauau ai ana aoga i le vasega 11. Na malaga atu i le malo tele o Amerika, mulimuli ane ai nonofo ma lona aiga i Alaska, lea sa faigaluega ai i se vaa fagota mo le 22 tausaga.
Ua faaipoipo lea alii ma e toafā ona alo, toatolu mai lona toalua muamua ma le toatasi i lona toalua o loo la nonofo nei. O le molimau a lona toalua, na ia ta’ua ai i le faamasinoga, le tele o le aafiaga o lo latou aiga ina ua tulai mai le faafitauli lenei ia Tafuna. Sa ta’ua foi o le galuega a lea alii sa tausi ai lo latou aiga faapea ai foi ma lona aiga i Savaii. Sa faafofoga foi le faamasinoga i le tele o mau lelei i le olaga o lea alii mai lana faifeau faapea le matai o lona aiga aemaise ai lona tina. O tulaga e ogaoga ai le solitulafono a lea alii ona o le vaai lea o le itu a leoleo i aafiaga pe a faasalalauina lea fualaau faasāina i le atunuu. E lē gata i lea o le aofaiga o le mamafa o le fualaau faasāina sa maua i lea alii, ua faailoa ai o ia o loo auala mai ai (supplier) lea fualaau faasāina i totonu o Samoa. O lea foi sa maua le nanā ai e lē ua faasalaina nei o le fualaau faasāina, atoa ai ma le lē saogalemu o le fualaau faasāina sa maua i lea alii i tulaga tau puipuiga o tuaoi (border protection) o le atunuu.
E ui i lea sa amanaia foi e le faamasinoga le tulaga lelei o le soifuaga o lea alii e pei ona molimauina. E lē gata i lea ae o le tulaga ua tetea ai nei ma lona toalua ma lana fanau, e lē latalata le tulaga o nofoaga, aemaise i le falepuipui e itiiti poo le leai foi o se avanoa o le a mafai ai ona fesootai.
Ae i le filifiliga a le alii faamasino mo lana faaiuga sa ia tuuina mai ai tulaga nei, e tāua mo le silafia, o le taumafai ina faaitiitia ma aua lava ne’i faamalosia tagata e faaulufale mai fualaau faasāina i Samoa. Na faailoa foi e le alii faamasino o le tulaga lava o loo vaai i atunuu e iai Niu Sila ma Ausetalia i le taofia ai o fualaau faasāina nei, o loo taumafai foi Samoa ina ia faatinoina. E ui e lē lava a tatou meafaigaluega mo le puipuiga lea, ae taumafai lava ina ia aua lava ne’i maua’a nei fualaau faasāina i lo tatou atunuu. O le mataupu lenei sa tulai mai i le aso 23 o Aperila o le tausaga ua mavae ina ua taunuu ai Tafuna ma lona atalii i le malaevaalele faavaomalo i Faleolo, o le siaki masani a le vaega o le custom faapea le quarantine aemaise ai le K9 unit i le ofisa o leoleo sa maua ai fualaau faasāina lea na molia ai Tafuna.
O se tulaga na faafetaia ai le galuega a le K9 atoa ai ma le naunautaiga ia saga iai pea nisi taifau faapea e pei o Inspector Flynn mo galuega nei a leoleo ina ia malupuipuia Samoa mai le faaulufale mai i ai o fualaau faasāina nei.
