O vaaiga eseese i fanau aoga a le Puna o le Atamai, ia latou teuga faasamoa ma latou polokalame na amanaia ai fanauiti ua maliliu i le misela i Samoa

E ui i lagona fiafia ma le faagaeetia o mātua ma aiga o fanau uma na faauuina i le taeao o le Aso Faraile 6 o Tesema i le Aoga amata a le Pasefika Early Learning, Puna o le Atamai. Ae sa lei taotaomia ai foi lagona o le faanoanoa ma loimata maligi o le toatele pe a mafaufau atu i le tulaga pagatia ma le matuitui o loo aafia ai si o tatou atunuu o Samoa i sauaga leaga ma le le alofa a le faama’i o le misela ae maise ai lava i nai alo ma fanau laiti.
Ma o le mafuaaga tonu lava lea na amatalia ai polokalame uma o le faauuga a nei fanau laiti a le Puna o le Atamai i Magele i se tutulai faaaloalo mo se minute se tasi o le filemu (minute of silent) ina ua mae’a ai le latou solo agai atu i totonu, e faailoa atu ai i nai o latou tei uma o loo mafatia i le misela i Samoa, latou te lē o tuuaunoaina i latou e faanoanoa toatasi ma tauamo toatasi le avega, ae o loo latou tausoaina uma lava faatasi ma i latou le mamafa ma le faigata o le avega.
Sa faamalosiau foi le susuga i le faafeagaiga taulagi ma o ia foi sa ta’ita’i i le sauniga le Susuga ia Pastor Vise e tusa ai ma le tāua poo le faatāuaina o le tulaga tamaititi poo le tulaga talavou foi o le tagata, ma sa ia faatusatusa foi i le soifuaga o le Alii Faaola o Iesu Keriso mai lona laititi ma talavou seia oo atu ina matua ma papatisoina.
Sa saunoa faamaise foi le Susuga i le Faafeagaiga i aiga uma o i latou ua aafia ma maliliu ona o le faama’i o le misela ma faafetaia ai le Atua ona ua ia amia se vaega itiiti, ae o loo tuua pea le toatele o alo ma fanau a Samoa.
O le susuga i le tamaitai Faatonusili o le aoga le afioga ia Taulamago Sue Ah Young sa fai ma sui o le laua vaa seelua ma si ona alii ia Valuniu Falefitu Ah Young e fai ma sui o le laumua a le PEL Puna o le Atamai e faafetaia mātua uma ma aiga faapea malo mai nisi o laumua eseese mai aoga amata i totonu lava o Niu Sila sa auai e molimauina le faauuga a le fanau aoga i lea taeao.
Sa taualuga i tufatufaina o tusipasi a le fanau faauu faapea ai ma nisi o le fanau i vasega amata, sa faafiafiaina foi le mamalu o le auvalaaulia ma mātua i faafiafiaga a le fanau faauu e pei o sasa ma siva faitaga o le kerisimasi atoa ai ma se tala sa o latou faatinoina e tusa o le fanau mai o le Pepe o le Kerisimasi.
Sa faaiuina lea faamoemoe i se saunoaga faamavae a le afioga i le Tootooalii ia Tofilau Malelega poo Mama Malelega ua lausilafia uma ai e le toatele lenei Tina i lana auaunaga, amata mai lava o se faiaoga i Samoa seia oo mai lava i Niu Sila nei ma avea o se Tina e faatuina ni auaunaga tau i a’oa’oga amata e aofia ai ma le PEL ma nisi lava o tautua tau i a’oa’oga.
Na tapenaina foi e le komiti o mātua ma faiaoga ni nai mealofa teutusi mo nai tamaitai faiaoga uma o ë sa fitaituga i le a’oa’oina o le fanau i lenei foi tausaga.