O le malumalu lenei i Sini Ausetalia o loo teu ai le tagavai o le Vaa le ‘Savali o le Filemu’ na malaga atu ai Ioane Viliamu ma le Talalelei i Samoa.
O le Faamanatuina la o le Talalelei lona 182 tausaga na faailoa mai ai e le susuga i le Faafeagaiga ia Rev Allan Filipaina le faaopoopo mai o se Ekalesia Fou mai Aukilani o loo feutagai nei.
E lei finagalo Rev e faailoa aloaia mai le Ekalesia ae peitai o se taimi i luma o le auina mai ai se atoaga.
O le Ekalesia Faapotopotoga Kerisiano a Ausetalia ma Niu Sila (EFKAN) o loo ia lona Malumalu i Melepone lea e galulue ai Rev Luaei Asi Siaoloa ma lona faletua ia Elisapeta.
O Papatoetoe i Niu Sila o loo galulue ai Rev Falefa Savea ma le faletua ia Motootua. O le Ekalesia i Te Atatu o loo i le tausiga a Rev Ioelu Siaoloa ma le faletua ia Sheryll aemaise ai ma le Ekalesia Fou lea o loo sauni e faaopoopo mai. I le taimi nei o loo ua faasafua atu foi le galuega tala‘i a Rev Allan Filipaina i se tasi o Ekalesia mai Kanana Fou i Amerika Samoa sa sailia so latou Faafeagaiga fou.
O le taimi muamua foi lea ua toe tatala ai le Pusa o loo faailoa ai le Fu‘a o le ‘Lupe Siliva’ na agiagia i le taunuu atu o le Savali o le Filemu i Sapapalii i le 1830.
E pei ona silafia o le Fu‘a lava lenei sa faapine ai le taunuu atu o le Talalelei ma talia e Malietoa e tusa ma le valoaga a Nafanua i le sailiga Malo a Malietoa ma Su‘a lea na taunuu atu ua uma Ao ma papa ae na o le Malo Taliilagi.
Na mafai ona silasila ai foi le atunuu na asiasi atu i foliga o le Vaa o le ‘Savali o le Filemu’ lea na faaee atu i le Malumalu lenei i Balmain ma molimoli atu ai le Upu o le Ola i Samoa.
O le LMS poo le London Missionary Society lea na galulue ai Ioane Viliamu na suia le igoa o lea faalapotopotoga, le World Christian Mission poo le Faalapotopotoga Kerisiano a le Lalolagi.
O le tausaga e 1962 lea na tutoatasi ai Samoa na suia ai foi ma le igoa o le LMS i le EFKS e pei ona iai nei le Ekalesia Faapotopotoga Kerisiano Samoa ma le EFKAN le Ekalesia Faapotopotoga Kerisiano a Ausetalia ma Niu Sila.
