Radio Samoa: Faafeiloai atu i lau afioga Tuilaepa, lea ua maua le matou avanoa, faafetai tele lava le manatu mai. Malo le soifua. O le ta mataupu muamua lau afioga i le Palemia, o le mataupu lea sa vevesi ai foi le malo ma Satapuala. O ni lafoga a lau afioga lea ua iai le manatu o se tasi o sui faipule, le afioga ia Levaopolo Talitonu, aemaise foi le taitai o le Itu agai, fai mai ua tatau ona molia lau afioga i le Palemia, ona ua e solia le tulafono tumau o le Fono. Se‘i e faalautele lea mataupu, ma le agaga faaaloalo Tuilaepa?
Palemia: Pei o lona finagalo, sa lē tatau ona avea le mataupu i le tulafono ae fai e le Maota. E manatua o Levaopolo e fai si fou i totonu e lē malamalama i tulafono o le Maota, ma tulaga uma e masani ai ona faatino le tulafono. O le ala lena o lea e faavae ai lona taofi, e lē o malamalama.
E leai se mea e taofia ai le Palemia i le filifilia e le Palemia o le faatalanoa i totonu o le maota o le solitulafono, aemaise o le o ane pupuni le aualatele ma latou faatino ai ni uiga faatufanua, i le taofia faamalosi e faaaoga ai mea o auupega, o le solitulafono le mea lena, e lē tatau ona laa i ai le Maota, ua oo i le taimi e faatino ai le galuega a le tulafono ma leoleo. O le tulaga la lena pei e mafua ai le finagalo o le alii faipule, ae ou te lē tio foi i le faipule, e fou atu i le maota, e lē o malamalama i mea ia e talanoa ai ma le tulaga e tatau ona faatino ai tiute faalemalo.
Radio Samoa: Talitonu o lea ua māua atu, o lea o le a faatu ma fausia se fale e tusa lona tau ma le ‘afa miliona tala Amerika, ma fausia ai foi ni vae faapipii. O lea e fia mautinoa poo fea tonu o le a faatu ai?
Palemia: O le faamoemoe lena e faaaogā ai le mea lea e tu ai le flea maketi i Savalalo. Lea e lumafale mai i le auala lea e alu atu i Savalalo, ma le ogaeleele tele lena e lelei ona faaaogā lelei mo se isi foi fale o le malo, e atoa uma loa i ai ma mae‘a uma i ai loa ofisa e moomia e lo tatou Malo.
O le faamoemoe lena ina ia mae‘a uma a fale e moomia e le Malo ma faatino ai loa ana galuega, atoa ai foi ma nisi o vaega e moomia e tagata taitoatasi mo a latou atinae faapisinisi e fai i totonu o le taulaga, o mea ia e agai i ai fuafuaga mamao a le tatou malo. E pei ona silafia, o loo televave a le tuputupu a‘e o le tatou taulaga ma atinae avanoa e atiae ai o tatou tagata e fou mai le faiga o mea o ituaiga pisinisi eseese.
O le tulaga foi lea e maua ai galuega a tatou fanau. Manatua o itu tāua ia e mafaufau i ai taitai o atunuu magafagafa, o le vaai i atinae eseese ma avanoa, ina ia faatupu ai galuega, auā o le mea lea e tupu, e fia selau le aofai o tamafanau e nonofo mai aoga i tausaga uma. E tatau la ona faatupu avanoa e le malo ina ia maua ai galuega mo o tatou tagata. Ma o le auala a lena e tasi o lea foi e mafua ai ona faatalanoa pea ma le malo Niu Sila ma le malo Ausetalia, mo le faiga faavae lea e o atu ai o tatou tagata e galulue iina i Niu Sila ma Ausetalia faavaitaimi. O mea o fuafuaga mamao ia e fai e le Malo ina ia foia ai le taulaga manaomia e o tatou tagata o ni galuega fou.
O le uiga a lea e tasi na ala ai foi ona aumai le kamupani tele foi lea a le YAZAKI lea e maua ai le afe o a tatou tagata faigaluega iinei. A o mea a ia e masani ona tilotilo i ai tagata e sailiili masei. Soo se mea a e fai e le malo, nogo ma aumai lea mea e faaleaga ai se atinae lelei. O mea a na ua ta masani ai, ae ta te lē popole tele foi i ai, auā o tagata e mafaufau faapea, e pau a na o mea e latou te masani ai, na o le vaai masei, ae a tilotilo lelei ia latou mea la e fai, e aunoa ma ni mea lelei o latou faia.
Radio Samoa: E talitonu e pei foi ona silafia e le Atunuu, o loo iai pea se feteenaiga i le va o le malo ma le afioaga o Magiagi i le tulaga o a latou pili, pe a maea ona faapipii cash power. Fai mai latou, e tatau ona iai se vaega e faamagalo poo le faamagalo atoa, talu ai ona o lo latou vai ma le paipa o loo alu. O le ā se faalauteleina o lea mataupu lau afioga i le Palemia?
Palemia: O le tulaga lena o lea e faatalatalanoa i ai. Manatua lelei, o lea sa latou faia ni faiga faasolitulafono mo le sefulu tausaga, o le o atu o le au fuamita e fua mita, ae taofi faamalosi e faaaogā sese i ai le power o alii ma faipule. Sa taumafai a la le tatou faalapotopotoga o le EPC ina ia fofo mālie. Ae peitai ane, ua alu alu ua lē mafai e le minisita ma le EPC, aumai loa i luma o le Kapeneta, o ina tonu loa sa ou faatonua ai loa, e taatia mai loa o le a ou agai loa i ai e fai loa le iuga faalemalo.
O le iuga faalemalo la lea na fai nei, o le mataupu e solitulafono. Ma o lea la ua maea nei ona fuatia uma a latou mita, ma maua ai ma le anoano a o isi solitulafono, o le nonofo ma fai faamalosi a latou connection i le taimi lea ua faaaogā sese ai e alii ma faipule le latou power e taofia ai tagata faigaluega o le EPC e fua mita. O lea la e faagasolo nei le tulaga lena o le faifai mālie o le fesuiaiga i le cash power auā o le faiga fou lea, a uma a lau cash power ua pe lau moli, e toe alu foi toe totogi toe ola.
O le faiga otomeki la lena ua iai nei, ua faafaigofie ai lava i le EPC ona faatino lo latou faamoemoe, lea foi ua alu ai le malo, o uma ai a tagata uma, ua faigofie ai ona fuafua e aiga le latou pili o le latou moli, nai lo le mea lea na iai, o le alu ai a sau le pili ua afe tala, fiu loa e sue le tupe e totogi ai. Ae o le mea lea ua iai e fuafua lelei ai a e le tina ma le toeaina le lē toe soona faaaogā o le power. O le tulaga la lena o lea ua iai nei. E eseese la mea ia e lua.
O le tulaga lava o le totogiina o le pili, o lea e faatalanoa nei auā o lea foi e iai le latou talosaga, mo ni latou taui i mea ia. E le mafai la ona faia vave se tonu sei sailiili muamua pe sao mea latou te fai. Ae manatua foi o nuu uma o lea e sau ai le vai, o aga na faaletulafono, e faaaoga a le vai mo le faataumafalia o le atunuu. E fai loa se mea pei o le mea lea e fai mai ai Magiagi, o lona uiga ona tagi mai foi lea o nuu, o auala ia a le malo e alu atu i totonu, o poumoli ia e tai atu, ua tatau foi la ona taui.
O se manatu vaivai tele, e le mafai ona faia lena mea e se malo. O lona uiga e leai a se eseesega o lea mea ma le mea lena e fai iina i Niu Sila. A tu foi la le pou i totonu o lou fanua, e tatau foi la ona e fai i le malo e totogi mai le pou lea ua tu i totonu o lou fanua. E leai se mea faapena, e oo i le taiga atu o le malo, a e manao e ta‘i sou moli, o le mea e oo i ai o le toso atu o le uaea e ola ai lou moli. Ae lē o le toso atu o le uaea ae faapea mai, e totogi ona o lea ua sau i totonu o lou fanua le uaea. Ae o lea ua iai le komiti e faatalanoa mataupu ia. O le uiga a lea o tatou, e tatau a ona fai se mea fou sei maua ai se seleni, ae lē talafeagai ma le tulafono ma tulaga masani.
Radio Samoa: Sa ta talanoa i ni vaiaso se lua ua tuanai atu e uiga i le talo e pei ona auina mai i Aotearoa nei i Niu Sila. Ae o lea ua toe maua se tala faanoanoa, ua toe faatamaia foi nisi o afioaga ua toe lavea foi le talo i le anufe e pei ona lavea muamua ai i le lega. O le ā se silasila mamao a le malo o le ā foi se tulaga e oo i ai e fofo ai lea faafitauli a o lei tulai atoa mai i si o tatou atunuu?
Palemia: Manatua foi o le tulaga a lena o mea e tutupu pea i le soifuaga. Ae o le itu e faataua, o lea ua iai talo nei e tolu ua pei a o le tatou talo Niue, lea la e afua ai le avatu o containers ia e avatu e faataitai ai. Ae o lea ua maua talo, e tolu ituaiga o talo ia, lea e faaigoa o le Numera 1, Numera 2, ma le Numera 3. O le 1 la ma le 2 lea ua avaatu.
O le talo la na e tusa ai ma sailiiliga a tatou saienisi lea ua agai i ai po tatou tagata. Ae o le mea a ia o faamai, ia o mea a na e le mafai ona taofia, a oo a i le taimi e oso ai le mai latou, pau a le mea tatou te taumafai e fai, o le fai o auala eseese e taofia ai. Manatua foi sa oo i le miliona a tatou pusa fa‘i e leai se ma‘i. Ona oo mai loa lea i tausaga faasolo mai le 62, 63, 64, 65, ua sasao faaafi le faamai, ma e tele a taumafaiga sa fai i le fa‘i, ae ua lē mafai ai.
O lea la e iai lou faamoemoe, o le aso 17 e tatau ona ou asiasi ai i Isaraelu, o le isi mea lea ou te alu e vaai, o le faiga o togafai i Isaraelu. Ua ou manatu o le a ou talosagaina Isaraelu, pe mafai ona fai se latou atinae iinei, e faaaogā ai a latou suesuega. O le tala o loo maua mai, o le tele o fai o loo toto i Isaraelu, o loo mafai ona latou aumaia le fatu e faaola ai le fai. A ola ae la le fatu, e fai sina malosi, e tetee atu ai i faamai. E le o mafai ona tupu le mea lena i Samoa i le taimi lenei.
O le mea la o loo fai nei, o lea a e agai i isi fai, e tai pei o le pata, tai pei o fai misiluki, e ono ituaiga fai misiluki lea o loo iai nei, pau ia o ituaiga o fai e lē o afaina tele i faamai. O lea a la e fai ma agai ai isi tagata i fai na, faapea foi ma le poi e tau le lavea tele i faamai. Ae o le fai a lea a Samoa o le fai palagi sa masani ai tatou, o le matua lavea gofie i faamai.
O le pau a le mea lea e fai e tatou, o le agai pea o a tatou saienisi e taumafai ina ia fai ni auala eseese, e pei foi o la tatou talo. Manatua foi toeitiiti atoa le sefulu tausaga ua le o toe maua se talo i Samoa nei. Ae o lea a sa galue galue a tatou saiensi, maua isi talo eseese, tolu sefulu ma ona tupu talo eseese, ae i na suesuega, lea na faatoa maua ai talo ia e tolu, e mapo tele i le taumafa.
Radio Samoa: Talitonu o si a ta gagana e ta te mitamita ai i itu e fā o le lalolagi. Ae talu ai, o lea ua māua o le a toe faaleleia. O le ā se tulaga o le a toe faaleleia, auā o le toatele foi a o nisi, ua faaaoga ni upu Samoa i le gagana peletania, e lē o fetaui le faaaogaina.
Palemia: Pe a nei ma le luasefulu tausaga, o fono pea faiaoga o le gagana, faiaoga i aoaoga, e iai sui o faiaoga iinei, o sui o faiaoga o le gagana i Niu Sila, Ausetalia, Amerika, Samoa i Sasae i Tutuila, i Hawaii. E o mai e fono iinei, ma talatalanoa i le faatuina o se Komiti faapitoa, o le latou matafaioi lea, o le silasila toto‘a i le gagana ma le faaleleia atili aemaise o upu foi e fia faaaogāina. O le taimi lena sa ou minisita ai o tupe, sa ou matua fautuaina le faamaea o a latou fautuaga ma aumai i le malo.
O le mea sa latou talanoaina, poo fea le atunuu o le a faatu ai se komisi o le gagna, pe faatu iina i Niu Sila, pe faatu i Amerika Samoa, pe faatu i Hawaii. Ae sa ou fautuaina i le taimi lena, e leai a se isi mea e faatu ai, e tatau ona faatu i le malo ma le atunuu e mafua atu ai le gagana, o inei i Samoa. Ae peitai ane, pei sa faatapepe a ona fai le galuega a faiaoga, ma faapena ai a ona lē mautonu. E iai le mafuaaga. O le lē mautonu, o nisi ia e taitai ai, na ona faaaoga o le gagana, ae o lea e suesue ai ni a latou mea, saili ai poo fea e ono faatu ai ae ono maua ai se galuega a ai, e maualuga le totogi e pei e manaia pe a fai i o i Hawaii, pe fai le komisi iina i Niu Sila, pe fai se komisi iina i Ausetalia, pe fai se komisi i i Tutuila ae mailei mai ai tupe a Amerika. Ia ua alu alu na mea, vaai atu a, na o fuamoa a mea e maua, e leai a ma se agai i luma. Lona uiga o le vaega lena, na ona faaaogā o le agaga o le fono o le gagana Samoa, ae ese mea la e nana ai lalo, o le suesue manuia, ae le o le agaga tonu o le faatino o se komisi e silasila toto‘a, i le gagana ma le faaaogāina ua masofasofa i le tele o nei mau upu, ae o la e tele upu a le atunuu. E mafai foi ona tele upu e mafai a ona fau e tatou a tagata e loloto i le gagana, o latou ia o Tulafale, o Faleupolu o afioaga.
O le maoae o lea mea, e tele a mea e iloa ai mea faapenei, i le mamao tele o le tofa a le matai Samoa, o le toatele a o na matai na soifua ae a i le laueleele. E lei o foi e saili ni atamai i fafo, ae o le atamai a e maua i luga i le talanoa i mea o fonotaga ma le sailiga tofa ma le faautaga, i totonu o fonotaga e pei a ona masani ai Samoa mai anamua. E tele a la mea e atagia ai, ae na o le tasi le mea o le a ou avatua se faataitaiga e tasi. (omit) O le tulaga la e foi mai i lau fesili, i le masofasofa o le gagana lea e iai ma le tulaga o le leai o se itutino e latou te vaaitino i mea ia, ma e leai se isi mea e tatau ona faatu ai le komisi, e tatau ona faatu i le malo Samoa, na o le pau a lea o le malo o lea e tutoatasi, e lē o tutoatasi foi Tutuila latou.
O le tulaga la lena o lea ua uma ona pasia e le Kapeneta le tulafono ma o lea ua uma nei ona tea atu nei i le Palemene, le tulafono la lea ua faatonutonu ai le faatuina o le Komisi, e fai ma latou tiute tauave le tulaga o le gagana Samoa, e faatonutonu ma faasa‘osa‘o, ma tilotilo ai foi i polokalame, auā o polokalame ia e aoao ai le gagana Samoa i le ofisa o aoga, o le matuā tele o le faaletonu ia e iai. O le mea lea ou te vaavaai i ai, e sau isi fesili a nai isi tamaiti laiti, fai mai sei aumai faalupega o le tou nuu. Ona tau masalosalo ai lea, pei o le polokalame lena e tau sue ai mea a faiaoga, ae matuā leai ma se aoga i nei tamaiti alualutoto, e talanoa i faalupega o le latou nuu. Ae o lea la o le a faatu le komisi, ona mafai ai lea ona faatino nei mataupu ua leva ona feaveai solo ae leai se taunuuga. O lea la ua laa i ai le malo, ina ia fofo ai lea foi faaletonu ua leva ona faatalanoa e faiaoga ae leai se taunuuga. Ia o le faaiuga lena o lena mataupu ua e lagā mai.
Radio Samoa: Ou te talitonu e telē lava se galuega e tatau ona toe faia ma teuteu ai tulafono o faiga palota ina ia aua nei toe aliali mai ni mea piopio e pei ona tulai mai le tele o faamasinoga i le tatou faiga palota talu ai. O le ā se silasila mamalo a lau afioga i le Palemia aemaise foi le malo i le tulaga lea, o le ā se teuteuga ina ia tatou maua ai foi se toafilemu i le alu i luga o faiga palota?
Palemia: E anoano mau teuteuga ia ua uma ona pasia e le Kapeneta, lea ua tuu atu i luma o le Palemene, masalo ua lē o toe mamao ona faagasolo loa lea. O le isi teuteuga, o le a matuā soloia loa palota foi ia e taitoatasi lea ua leva ona iai, e lua nofoa, lea sa iai taulelea. Tulai mai ai taulelea e toalua, pau a ia o taulelea na saofai i le fono a matai i le Palemene. Lea la na ou faamutaina i le nofoaiga talu ai, i le itumalo lea o latou tutoatasi, ia na o matai e omai ai, poo fea a le nuu e omai ai, ae na o matai a o lea ua totonu o le lola palota e mafai ona tamomoe ai. Ia lea la ua toalua matai ia ua iai i totonu o le lola palota, ae lei suia a la le igoa, o lea a e alu a o le Aupalota Tutoatasi. Tasi la lena suiga o le a iai nei, o le a sui le igoa. E le toe taua o le Palota Tutoatasi, o le a ta‘u o le Itumalo o Palota Faapitoa mo le Taulaga i Sasae. O le a lua nofoa i Sasae, ae vaelua i le auala foi lea e agai i Moamoa, ia ma Sisifo. O Sasae la e alu atu i le itu i Sasae i le auala lea e alu i Moamoa, e amata atu ai i le uati e agai i le auala lea e alu i Moamoa, agai i o i Vailele, ona muta ai lea o i latou iina sa iai i le lola palota a le Tutoatasi. A o Sisifo, e alu atu a i le auala lena i le itu i Sisifo i Vaimea agai mai le Uati i Vaimea i Moamoa, agai i uta i Aleisa muta mai o i Faleula. O nisi la i tua atu iina, o latou i o i isi itumalo na o loo iai. Ae pau ia o le telē o le a iai, e lē toe oo i Savaii, e lē toe oo i tuā i Aleipata. O lena ua faafaigofie. O le isi teuteuga, e le toe iai ni itumalo e tailua nofoa. O le a talepe itumalo
