Oloo tau togafitia nei ile maota gasegase i Ulumotootua se tasi o alii talavou mai le afioaga o Afega, o Murphy Ulumotootua, 20 tausaga ina ua faaoo manu’a iai se keni oni alii talavou se to’a 7 ile po ole Aso Faraile na tea nei, 16 o Fepuari i luma ane ole Maota Gasegase i Motootua.
O lē oloo aafia e faigaluega ai ile maota gasegase ma se tasi o ana uo lea na mānava ane ile afiafi ae faafuasei ona tau’ai ane ai ni atigifagu mai i lea keni o tupulaga. Na taumafai i laua e tamomo’e agai ile falemai peitai na tuli tatao atu ele vaega e toafitu ma fasi faamo’amo’a ai lē ua aafia.
Ose tala faanoanoa tele ile aiga o lea alii talavou ona sa talitali mai le mānava atu i lea afiafi ae logo atu le faamatalaga oloo taofia ai ile falemai.
Ose tasi o itu matautia tele ile vaega lenei na faatupuina lea faaoogalima, na uma loa ona faatino lea solitulafono ma o latou ave ai ma meatotino a lē oloo aafia e aofia ai lona ofuvae (short), o lona mitiafu fou, o seevae, ole pulou ma lana telefoni feaveai, o lona uiga e foliga mai ose osofaiga ase au faomea.
Na tulai mai lea faalavelave ile po ole Aso Faraile ae na muamua ai le isi faalavelave ile po ole Aso Tofi 15 o Fepuari lea foi na osofai ai e ni tupulaga talavou se tasi o alii e faigaluega ai ile umukuka ale maota gasegase.
I suesuega ale Talanoa mai Samoa, na maua ai e lē ole taimi muamua lenei ua tulai mai ai lenei faafitauli i luma ane ole maota gasegase i Motootua.
Na iai foi se tasi o alii talavou na agai atu ile falemai ae fesiligia ai e nisi o tupulaga talavou mo se tala se tasi ($1.00) se’i faatau ai se latou sikaleti, ae na tali leai iai lea alii talavou, peitai, ole faaupuga na o latou lafo ane, poo le ā le mea e feoai ai pe a leai ni tupe sosoo ai loa ma le faaoolima lea na laveai ai e nisi o ave taxi lea alii talavou.
Ole mau a nisi o tina na mumusu e faailoa mai o latou suafa, ua leva tele na fai le amio lenei a tupulaga nei, ole nofonofo i luma ane o faleoloa lea e faafesagai ma le falemai ma faataunuu ai a latou gaioiga nei.
O nisi o i latou na aafia, ole mamalu ole atunuu e agai atu e tausi ma’i ai i tagata o latou aiga o taofia ai ile maota gasegase, ole taimi la e agai ane ai e faatau i faleoloa nei ae osofaia ai loa ele tupulaga talavou lenei. Ile taimi lenei ua tuuina atu nei le tagi ale aiga o lē na aafia ile Matagaluega o Leoleo ina ia faia ai se faatatau i nei tupulaga.
Ta’ua ele tina o Murphy, o ia ole tina e lē fia pupula ile taimi muamua na ia vaia ai i foliga osi ana tama, ma ua tatau ona fai ai se fuafuaga ale Matagaluega o Leoleo auā a lē faia iai se faaiuga e mautinoa ole a faaauau ai pea lenei gaioiga lē alofa ma le lē mafaufau ma aafia ai nisi o tupulaga ole atunuu, aemaise ole Maota Gasegase oloo sulufai atu iai le atunuu ae foliga mai ua lē malupuipuia lea siosiomaga ona o nisi o tupulaga talavou lē mafaufau.
Saunoa le sui sooupu ole Matagaluega o Leoleo le susuga Auapaau Logoitino Filipo, ua iai i latou ua molia mai ile faaoogalima lea na aafia ai se tasi o alii kuka mai le maota gasegase peitai oloo tālia le lipoti a i latou na tiute ile po ole Aso Faraile ile isi foi faaoogalima lea na tulai mai i Motootua lava.
Ta’ua e Auapaau, ua autilotilo nei leoleo ise isi faiga e fai ai ile nofoaga lenei ona ua fai si tele o lipoti ua oo atu ia i latou oloo faia lea solitulafono, ma e telē le avanoa e faaono iai se isi tiute a leoleo ile vaega lenei ole atunuu ina ia mautinoa e malupuipuia le mamalu ole atunuu e autovaa atu ile Maota Gasegase i Motootua.
